ތޭރަ މެންބަރުންނަށް ޝިޔާމް ޖެއްސެވީ ޖޯކު، މަޖިލިސް ތެރޭގައި ވަދު އަޅައިފި!

މި ނިމިދިޔަ ހަފްތާގައި ނޫސްތަކުގެ ފަލަޞުރުޚީގައި އޮތް އެންމެ ހޫނު ޚަބަރަކީ، ރައްޔިތުންގެ މަޖިލީހުގެ 13 މެންބަރަކު ވެރިކަން ކުރާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) އަށް ސޮއިކުރެއްވި ވާހަކަ އެވެ. އިދިކޮޅު އެންމެ ބޮޑު ޕާޓީ އަދި ރާއްޖޭގެ ސިޔާސީ މައިދާނުގައި އެންމެ މެންބަރުން ގިނަ ޕާޓީ، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަށް ނިސްބަތްވާ 13 މެންބަރަކު، އެ ޕާޓީން ވަކިވުމަކީ އާދައިގެ ކަމެއް ވެސް ނޫނެވެ. މަޖިލީހުގެ މެޖޯރިޓީ ޕާޓީން 13 މެންބަރަކު، ޕީއެންސީ އަށް ސޮއިކުރެއްވީ މިދިޔަ ބުރާސްފަތި ދުވަހުގެރޭ އޮތް ޚާއްސަ ޖަލްސާއެއްގަ އެވެ. އޭގެ ކުރިން ވެސް ރަށު ތެރޭގައި އެ ވާހަކަ ދެކެވުނެވެ. ސަރުކާރުގެ ބޮޑެތި ހުށަހެޅުންތަކާއެކު، ބައެއް މެންބަރުން ސަރުކާރު ހިންގާ ޕާޓީއާ ގުޅޭ ވާހަކަ އެވެ.

ސަރުކާރުން ސިފަކޮށްފައިވާ ގޮތުގަައި، އެއީ ސަރުކާރަށް ލިބުނު ވަރަށް ބޮޑު ކާމިޔާބީ އެކެވެ. އާނއެކެވެ! ކާމިޔާބީ އަކަށް ބައްލަވާށެވެ. އަތް ވެސް ޖައްސަވާށެވެ. ހަވާ ވެސް އަރުވާށެވެ. ބޮނޑިބަތް ކައްކައިގެން، ބޮޑު ކޭމެއް ވެސް ބާއްވާށެވެ. ނުވިތާކަށް، މިޔުޒިކް ޝޯވްތަކާއި، ލަވަ ބާޒީތައް ވެސް ބާއްވާށެވެ. ސަރުކާރަށް ލިބުނު އުފަލެއްގެ ބޮޑު ކަމުންނެވެ. އެކަމަކު، އެ ޖަލްސާ އިން އަހަރެންނަށް ފާހަގަވި ކަމެއް ހިއްސާކޮށްލާނަމެވެ. ފަހަރުގައި ޖަލްސާގައި ތިއްބެވި، "ޢިއްޒަތްތެރި" 13 މެންބަރުންނަށް މިކަން ފަހުމުނުވެ ވެސް އޮވެދާނެ އެވެ. އެހެން ވެސް ވެދާނެ އެވެ. ފައިސާގެ ދަޅަ އާއި، ދެން ވެސް ދުނިޔެވީ އެހެން ކަންކަމަށް ހެއްލިގެން ދިޔަ ބަޔަކަށް، ހަމަ ރަނގަޅަށް ވެސް ދުނިޔެ ފެންނާނީ ސައިބޯނި ބޮތްކެއްގެ ސިފައިގަ އެވެ.

އެ ޖަލްސާގައި ވާހަކަ ދެއްކެވި އެއް ބޭފުޅަކީ މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަދި ޕީޕީއެމްގެ ނާއިބު ރައީސް އަޙްމަދު ޝިޔާމް އެވެ. ވަޒީރުގެ ވާހަކަފުޅު ފެއްޓެވީ، އެމަނިކުފާނުގެ ވުޒާރާ އާއި އެމަނިކުފާނުގެ މަސައްކަތުގެ ދާއިރާއާ ގުޅުވާލައިގެންނެވެ. އާދެ! މަސްވެރިކަމުގެ ސިނާއަތާ ގުޅުވާލައިގެންނެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަށް ވަޒީރު ދެންނެވީ، އެރެޔަކީ މަސްވެރިކަން ވަރަށް ތިޔާގި ރެޔެއް ކަމަށެވެ. އެކަމަށްޓަކައި މާތް ﷲގެ ޙަޟްރަތަށް ޝުކުރު ވެސް ދެންނެވި އެވެ. މަސްވެރިކަން ވަރަށް ތިޔާގިކަމުން އުފާވެރި ރެޔެއް ކަމަށް ވެސް ވިދާޅުވި އެވެ. ދިވެހި ރާއްޖޭގަައި މަސް ބާނާކަން ފާހަގަކޮށް ވިދާޅުވީ، އެމަނިކުފާނުގެ ވަރަށް ގާތް އަޚުންތަކެއް، "ދިވެހީންގެ ރާއްޖެ"އާ ގުޅިވަޑައިގެންފި ކަމަށެވެ.

އާދޭހެވެ! މިއީ ހަމަ ރަނގަޅަށް ވެސް، ވަޒީރު އެއްކަލަ 13 ޢިއްޒަތްތެރި މެންބަރުންނަށް ކުރެއްވި މަލާމާތެކެވެ. މޫނު މަތިން ގަދަކަމުން ހިނިފުޅުވެޑުވިގެން ހުންނެވި ނަމަވެސް، މިއީ އެވެރިންނަށް އެއްލާލި "ގައު ބުރި" އެކެވެ. ކުރިން ވެސް ދެންނެވި ފަދައިން، ފަހަރުގައި އެވެރިންނަށް މިކަން ފަހުމު ނުވެދާނެ އެވެ. މަސްވެރިކަން ވަރަށް ރަނގަޅަށެވެ. ސަރުކާރުން މަޖިލިސް ތެރޭގައި ވަދު އަޅާލީ އެވެ. މަސްވެރިކަން ތިޔާގިވެ، ދަހިވެފައި ތިބި ވަރުން، ހުސް ބުޅީގައި 13 މަސް ބާނައިފި އެވެ. އެވެރިން ތިބީ އެހާ ވެސް ބޮޑަށް ދަހިވެފަ އެވެ. މަޖިލިސް ތެރޭގައި ވަދު އަޅައި، ޖެހުނު އެއްޗެއް ސަރުކާރުގެ މަތި ބަރު އޮޑި އަށް ދަމާ ނެގީ އެވެ. އެ މަސްކޮޅު ކިރާލިއިރު، އިންތިހާ އަށް އަގު ވެސް ފަލަ އެވެ. ކިލޯކިލޯ އިން ކިރުމުގެ ބަދަލުގައި، ސަރުކާރުން ކިރާލީ ފަހަރަކު މަހެކެވެ. ބިލު ކޮޅު ފެންނާން ނެތް ކަމަކު، މަހެއްގެ އަގު ހުރީ 1.3 މިލިއަނުގައި ކަމަށް ރަށު ތެރޭގައި އެބަ ކިޔަ އެވެ. އެހެންވިއްޔާ، އަމުދުން ސަރުކާރުން ބިލު ކޮޅު ދައްކާނެ ހެއްޔެވެ؟

ދުނިޔޭ ހިނގާ އުސޫލަކީ އެއީ އެވެ. އިންސާނީ ޠަބިއްޔަތަކީ ވެސް އެއީ އެވެ. މުދަލާއި، ފައިސާ އަދި ދުނިޔޭގެ އުފާ އިސްކޮށްފި މީހަކު، ގެއްލިގެން ދާނެ ކަމީ ޔަގީން ކަށަވަރު ކަމެކެވެ. ދުނިޔެ މިއަދާ ހަމަ އަށް ދެއްކީ ވެސް އެ މިސާލެވެ. އަމުދުން، ޑިމޮކްރަސީ ކަމަށް ދައުވާ ކުރާ ނިޒާމުގައި ވެސް ކަން ހިނގަނީ ތިޔަހެނެއް ނޫނެވެ. ތިޔައީ މުސްތަޤުބަލަށް ދިނަ ނުބައި މެސެޖެކެވެ. މިއަދު ހުސްބުޅީގައި ގަން ބަޔަކު، މާދަމާ ވެސް ނުގަންނަންވީ ސަބަބެއް އެބަ އޮތް ހެއްޔެވެ؟