ފަސްޓު ކުލާހުގައި ދަތުރު ނުކުރައްވާނެ ކަމަށް ވިދާޅުވިނަމަވެސް، ފަސްޓު ކުލާހުގައި ދަތުރުކުރައްވައި 3 މިލިއަނަށް ވުރެ ގިނަ ރުފިޔާ ޚަރަަދުކޮށްފި

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އަދި ނައިބު ރައީސް ހުސެއިން މުޙައްމަދު ލަތީފު ފަސްޓު ކުލާހުގައި ދަތުރުނުކުރައްވާނެ ކަމަށް ރައީސް މުއިއްޒު ވިދާޅުވެފައި ވަނިކޮށް، ނައިބު ރައީސް ފަސްޓު ކުލާހުގައި ކުރެއްވި ދެ ދަތުރުފުޅެއްގެ ޖުމްލަ ޚަރަދު ތިން މިލިއަން ރުފިޔާއަށް އަރައިފިއެވެ.

ރައީސް މުއިއްޒު އަދި ނައިބު ރައީސް ހުސެއިންގެ ރަސްމީ ދަތުރުފުޅުތައް ވީހާވެސް ޚަރަދު ކުޑަވާނެގޮތަކަށް ކުރައްވާނެ ކަމަށް ރައީސް މުއިއްޒު ވިދާޅުވީ، އެމަނިކުފާނުގެ ފުރަތަމަ ދަތުރުފުޅު، ތުރުކީގެ ދަތުރުފުޅަށްފަހު ނޫސްވެރިންނާ އެކު ބޭއްވެވި ނޫސްވެރިންގެ ބައްދަލުވުމެއްގައި އެވެ.

Advertisement

އެގޮތުން އެދުވަހު ރައީސް މުއިއްޒު ވިދާޅުވީ އެމަނިކުފާނާއި އެމަނިކުފާނުގެ ނައިބުވެސް ފަސްޓު ކުލާހުގައި ދަތުރުކުރައްވަން ބޭނުންފުޅުނުވާކަމަށާއި، އެކަމަކީ އެ ދެބޭފުޅުން ވެސް ނިންމެވި ނިންމެވުމެއް ކަމަށެވެ.

"އަޅުގަނޑު ބޭނުމެއް ނޫން ފަސްޓު ކުލާހުގައި ދަތުރުކުރާކަށް. ބިޒްނަސް ކުލާހަށްވުރެ މައްޗަށް ދާކަށް ބޭނުމެއް ނޫން. ނައިބުރައީސްވެސް ބޭނުމެއް ނޫން.،" ރައީސް މުއިއްޒު އެދުވަހު ވިދާޅުވިއެވެ.

އެހެން ނަމަވެސް ނައިބު ރައީސް ހުސެއިން ޗައިނާ އަދި ސްވިޒަލެންޑްގެ ޖެނީވާ އަށް މި ޑިސެމްބަރު މަހުގެ ހަތަރަކުން 14 ގެ ނިޔަލަށް ކުރެއްވި ދަތުރުފުޅުގައި، ނައިބު ރައީސް ދަތުރުކުރެއްވީ ފަސްޓުކުލާހުގައެވެ. އެގޮތުން އެ ދަތުރުތަކުގެ ޓިކެޓަށް ނައިބު ރައީސަށް އެކަނި ވެސް 353،750.22 ރުފިޔާ ޚަރަދުކުރި އިރު، އެ ދަތުރުފުޅުގައި ނައިބު ރައީސް އާއެއްކޮށް އިތުރަށް ބައިވެރިވެވަޑައިގެންނެވި 16 ބޭފުޅުންގެ ޓިކެޓަށް، ގާތްގަޑަކަށް ދެ މިލިއަން ރުފިޔާ ވަނީ ޚަރަދުކޮށްފައެވެ.

އޭގެ ތެރޭގައި ބިޒްނަސް ކުލާސް އަދި އިކޮނޮމީ ކުލާހުގައި ދަތުރުކުރެއްވި ބޭފުޅުން ވެސް ހިމެނިވަޑައިގަންނަވައެވެ. އެގޮތުން މުޅި ދެ ދަތުރުގެ ޖުމްލަ ޓިކެޓުގެ އަގަށް އެކަނި ވެސް 2،413،029.54 ރުފިޔާ ނުވަތަ 2.4 މިލިއަނަށް ވުރެ ގިނަ ރުފިޔާ ވަނީ ޚަރަދުކޮށްފައެވެ.

މީގެ އިތުރުން ޗައިނާ ދަތުރުގައި ޖުމްލަ 12 ބޭފުޅަކަށް ލައްކައަކަށް ވުރެ ގިނަ ރުފިޔާ ޕޮކެޓް މަނީގެ ގޮތުގައި އަދި އެހެނިހެން ޚަރަދުތަކުގެ ގޮތުގައި އެ ދަތުރަށް އެކަނި ވެސް ފަސްދޮޅަށް ހަހާށް ވުރެ ގިނަ ރުފިޔާ ވަނީ ޚަރަދުކޮށްފައެވެ.

ނައިބު ރައީސްގެ ޗައިނާގެ ދަތުރުފުޅުގައި ޗައިނާގެ ވަފުދުގެ ބޭފުޅުންނަށް އެކަމޮޑޭޝަން، ފަރިއްކޮޅުގެ ޚަރަދު އަދި އެތެރޭގެ ދަތުރުފަތުރުގެ ޚަރަދުތައް ހަމަޖެއްސީ ޗައިނާ ސަރުކާރުންނެވެ.

މީގެ އިތުރުން، ނައިބު ރައީސް ސްވިޒަލެންޑްގެ ޖެނީވާއަށް ކުރެއްވި ދަތުރުފުޅުގައި:

އެ ދަތުރުގެ މުޅި ޖުމްލައަށް 595،779.14 ރުފިޔާ ސަރުކާރުން ވަނީ ޚަރަދުކޮށްފައެވެ.

އެއާއެކު މުޅި ދެ ދަތުރުގެ ޖުމްލަ ޚަރަދުގެ ގޮތުގައި 3،189،544.58 ރުފިޔާ ނުވަތަ 3.18 މިލިއަން ރުފިޔާ ސަރުކާރުން ވަނީ ޚަރަދުކޮށްފައެވެ.