ދަރިވަރުންނަށް ފިލާވަޅު ދަސްކުރުމަށްވެސް މިސްކިތް ބޭނުންކުރެވޭނެ
އިސްލާމިކް މިނިސްޓަރު، ޑރ. މުހައްމަދު ޝަހީމް އަލީ ސައީދު ވާހަކަފުޅު ދައްކަވަނީ
ރާއްޖޭގެ މިސްކިތްތައް ތައުލީމާއި ތަރުބިއްޔަތަށް، އަދި އިސްލާމީ އިޖްތިމާއީ ކަންކަމަށް ބޭނުންކުރެވޭ މަރުކަޒުތަކަށް ހައްދަވާނެކަމަށް، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިސްކިތްތަކާބެހޭ ގައުމީ މަޖިލިސް އިފްތިތާހުކުރުމަށް ބޭއްވި ރަސްމިއްޔާތުގައި މިނިސްޓަރު ވިދާޅުވީ، މިސްކިތްތަކަކީ ހަމައެކަނި ނަމާދުކުރާ ތަންތަން ނޫންކަމަށާއި، ކިޔެވުމަށްވެސް ބޭނުންކުރެވޭނެ ކަމަށެވެ. އަދި ދަރިވަރުންނަށް ފިލާވަޅު ދަސްކުރުމަށްވެސް މިސްކިތް ބޭނުންކުރެވޭނެކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، މިސްކިތްތަތަކީ ތައުލީމާއި ތަރުބިއްޔަތަށް، އަދި އިސްލާމީ އިޖްތިމާއީ ކަންކަމަށް ބޭނުންކުރެވޭ މަރުކަޒުތަކަކަށް ހަދަންޖެހޭކަމެވެ.
މިނިސްޓަރު ވިދާޅުވީ، މިސްކިތަކީ ފިކުރީ އެއްބައިވަންތަކަމާއި އިޖްތިމާއީ އެއްބައިވަންތަކަން ގާއިމްކޮށްދޭ މަރުކަޒުތައް ކަމަށެވެ. ފިކުރީ އެއްބައިވަންތަކަމަކީ އެތަނުގެތެރެއިން ދެވޭ އިލްމުކަމަށާއި، އިޖްތިމާއީ އެއްބައިވަންތަކަމަކީ ނަމާދުގެ ތަރުތީބުތައް ކަމަށެވެ. ޖަމާއަތުގައި ނަމާދުކުރުމުން ސަވާބު އިތުރުވާކަމަށާއި، ރަހުމަތްތެރިންނާ ބައްދަލުވާކަމަށް މިނިސްޓަރު ވިދާޅުވިއެވެ.
މިނިސްޓަރު ޝަހީމް ވިދާޅުވީ ދީނުގައި އިޖްތިމާއީ ސަފުތައް ތަރުތީބު ކުރެވިފައިވަނީ ވަރަށް ހިކުމަތްތެރިކަމާއެކު ކަމަށާއި، ގާތުން ދުރަށް އިޖްތިމާއީ އެއްބައިވަންތަކަން ގާއިމްކުރުމުގެ އަސާސްތަކުގެ މައްޗަށް ކަމަށެވެ. އަދި އިސްލާމީ ފަލްސަފާ ގާއިމްވެފައި އޮތް ގޮތަށް މި ސަގާފަތް މުޖުތަމައުގައި ތެރޭގައި ދަމަހައްޓަންޖެހޭ ކަމަށް މިނިސްޓަރު ޝަހީމް ވިދާޅުވިއެވެ.
