އެމެރިކާގެ ދަށުނުވެ، ވިލާތުގެ އިއްތިޙާދުންވެސް އަމިއްލަ ފިކުރެއް ތަރައްޤީކުރަން އެބަޖެހޭ... ނޫންތަ؟

އެމެރިކާގެ ހަގު ބައިވެރިއެއްގެ ގޮތުގައި އޮތުމުގެ ބަދަލުގައި ވިލާތުގެ އިއްތިޙާދު (އީޔޫ)އިން އަމިއްލަ ތަޞައްވުރެއް ގެންގުޅެންޖެހޭ ކަމަށް ބެލްޖިއަމްގެ ކުރީގެ ބޮޑުވަޒީރު ޔީވް ލެތެޣްމެ ވިދާޅުވެއްޖެއެވެ.

މިދިޔަ 20 އަހަރު ދުވަހުގެ މާޒީއަށް ބަލާއިރު، ޗައިނާއާއި ވިލާތުގެ އިއްތިޙާދާ ދެމެދު ކުރި ވިޔަފާރީގެ މިންވަރު ވަނީ ގާތްގަނޑަކަށް 9 ގުނަ އިތުރުވެފައެވެ. ވިލާތުގެ އިއްތިޙާދުން ޗައިނާގައި އިންވެސްޓްކުރި މިންވަރު ވަނީ ގާތްގަނޑަކަށް 3 ގުނަ އިތުރު ވެފައެވެ. ޗައިނާއިން ވިލާތުގެ އިއްތިޙާދުގައި އިންވެސްޓްކުރި މިންވަރު ވަނީ ސުން ރޭޓުން، އަދުގެ 104.4 ބިލިއަން އެމެރިކާ ޑޮލަރަށް އަރާފައެވެ.

ދުނިޔޭގެ އިޤްތިޞާދު ހެޔޮ ފާލަކަށް އެޅެމުން ދާ ދިއުން މަޑުޖެހިފައި އޮތް އޮތުމާ ޚިލާފަށް، ޗައިނާއާއި އީޔޫއާ ދެމެދު، 2022 ވަނަ އަހަރު ރެކޯޑް މިންވަރަކަށް ވިޔަފާރިކޮށްފައިވެއެވެ. ދޭދޭ ވިޔަފާރީގެ އަގު 847.3 ބިލިއަން ޑޮލަރަށް އަރާފައިވާއިރު، މިއީ އަހަރުން އަހަރަށް ބަލާއިރު 2.4 ޕަސެންޓްގެ ކުރިއެރުމެކެވެ.

އެއްބާރުލުން ދިނުމުގެ ދިގު ރާސްތާ ގުޅުންތައް ބަދަހިކަމުގައި ވީނަމަވެސް، ވިލާތުގެ އިއްތިޙާދާ ޗައިނާއާ ދެމެދު ދޭތެރެ ދޭތެރެއިން 'ކުނި' ޖެހެއެވެ. ނަމަވެސް، އެ ގުޅުމަކީ ކުރިއަށް ގެންދެވެން ޖެހޭނެ ގުޅުމެއް ކަމަށް، ޗައިނާ ސެންޓްރަލް ޓެލެވިޜަނަށް ދެއްވި އެކްސްކްލޫސިވް ބަސްދީގަތުމެއްގައި ލެތެޣްމެ ވަނީ ފާހަގަކުރައްވާފައެވެ.

އައު ޙާލަތްތަކަށް ހޭނުމަށް، ޤާއިމުވެފައިވާ ބާރުތަކަށް ބައެއް މައްސަލަތަކާއި ގޮންޖެހުންތަކާ ކުރިމަތިލާން ޖެހުމަކީ ހައިރާންވާންޖެހޭ ކަމެއް ނޫންކަމަށާއި 'ދޮންބޮޑު ނުވާނަމަ' ކޯޅުންތަކާއި ދެކޮޅުވެރިކަމުގެ ގިނި ގަދަވެގެން ނުދާނެކަމަށްވެސް ބެލްޖިއަމްގެ ކުރީގެ ބޮޑުވަޒީރު ވަނީ ވިދާޅުވެފައެވެ.

ވިލާތުގެ ބައެއް ގައުމުތަކުން ޗައިނާއާ މެދު، "ޑި-ރިސްކިންގް" އާއި "ޑިކަޕްލިންގް" އިސްތިރާޖުތަކެއް ނުވަތަ އިޤްތިޞާދީ ސަލާމަތީ އިސްތިރާޖެއް ބޭނުންކުރަން މަސައްކަތްކުރި ނަމަވެސް، ލެތެޣްމެ ވިދާޅުވާގޮތުގައި މަލްޓިލޭޓަރަލިޒަމާއި މިނިވަން ވިޔަފާރިއަކީ މޮޅު ނަތީޖާއެއް ހޯދުމަށް އޮތް ރަނގަޅު ރާސްތާއެކެވެ.

'ޑީ-ރިސްކިންގް' އަކީ، މާލީ އިދާރާތަކުން ކްލައިންޓުންނާ ދެމެދު އޮންނަ ވިޔަފާރީގެ ގުޅުންތަކަށް ނިމުން ގެނެސް ނުވަތަ ނުވަތަ ގުޅުންތައް ހަނިކޮށް، ރިސްކް މެނޭޖްކުރުމުގެ ބަދަލުގައި އެ ބަޔަކާ ދުރުހެލިވުމުގެ އަސާސް އެކުލެވޭ އިސްތިރާޖެކެވެ. 'ޑިކަޕްލިންގް' އޭ ބުނެއުޅެނީވެސް ހަމަ އެފަދަ ގޮތަކަށް ބަޔަކާ ވަކިވުމަށެވެ.

ޗައިނާއަކީ ބައިނަލްއަޤުވާމީ މައިދާނުގައި އެމެރިކާގެ އެންމެ ބޮޑު ވާދަވެރިޔާއެވެ. އަދި އެންމެ ވަރުގަދަ ހަތުރުވެސްމެއެވެ. ބައިނަލްއަޤުވާމީ ފެންވަރުގައި އުފެދޭ އެކި މައްސަލަތަކުގައި އިރާއި ހުޅަނގަށް ދުނިޔޭގެ ފިކުރު ބެހިގެން ދާއިރު ގިނަ ފަހަރަށް އެމެރިކާ ކޮޅަށް އަރަނީ ހުޅަނގު ނުވަތަ ވިލާތުގެ ޤައުމުތަކުންނެވެ. ޗައިނާއާ އެއްގަލަކަށް އަރަނީ އިރުމަތީ ބިތުގެ ގައުމުތަކާއި ބައެއް ޙާލަތްތަކުގައި މެދުއިރުމަތީގެ ބައެއް ގައުމެކެވެ. ކަން މިހެން އޮތްއިރު މުޅި ދުނިޔެއަށްވެސް އެންމެ ޙައްސާސް އެއް ސަރަޙައްދު ކަމަށްވާ ދެކުނު އޭޝިއާ ސަރަޙައްދުގެ އިސްތިރާޖީ ކޮންޓްރޯލް ނެގުމަށް ޗައިނާއާއި އެމެރިކާއިންވެސް ދަނީ ސީދާގޮތުންނާއި ނުސީދާ ގޮތުން މަސައްކަތްތަކެއް ކުރަމުންނެވެ.