23 ވަނަ ގައުމީ ކެޑޭޓް ކޭމްޕް އިފްތިތާހުކޮށްފި
މިކޭމްޕެގެ ތެރެއިން ކަނޑައެޅޭ ބައެއް އަސާސީ ހުނަރުތައް ކެޑޭޓޫންނަށް ތަޢާރަފް ކޮށްދިނުން ވެސް މި ކޭމްޕްގެ މަޤްޞަދުތަކުގެ ތެރޭގައި ހިމެނޭ
23 ވަނަ ގައުމީ ކެޑޭޓް ކޭމްޕް އިފްތިތާހުކުރުން
23 ވަނަ ގައުމީ ކެޑޭޓް ކޭމްޕް ކ. ގިރިފުށީ ޓްރޭނިންގ ސެންޓަރުގައި އިފްތިތާހުކޮށްފިއެވެ.
ހޯމަ ދުވަހު ފެށި މި ކޭމްޕު އިފްތިތާހް ކުރުމުގެ ގޮތުން ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ އެމްއެންޑީއެފް މެރިން ކޯރގެ ކޮމާންޑަރ ބްރިގޭޑިއަރ ޖެނެރަލް އަޙްމަދު ޣިޔާސްއެވެ. މިމަހު 24 އިން ފެށިގެން އަންނަ މަހުގެ ތިން ވަނަ ދުވަހުގެ ނިޔަލަށް ކުރިއަށްގެންދާ މި ކޭމްޕްގައި 42 ސްކޫލަކުން، 120 ދަރިވަރުން ވަނީ ބައިވެރިވެފައެވެ. އެއީ 80 ފިރިހެން ދަރިވަރުންނާއި އަދި 40 އަންހެން ދަރިވަރުންނެވެ.
މި ކޭމްޕްގެ މަޤްޞަދަކީ، މި ކޭމްޕްގައި ބައިވެރިވާ ކޮންމެ ކެޑޭޓަކީ ވެސް މުޖްތަމައަށް ފާއިދާހުރި އަދި ދިމާވާ އެކިއެކި ހާދިސާތަކުގައި ރޭވުންތެރިކަމާއެކު އެހީތެރިކަން ފޯރުކޮށްދިނުމުގެ ގާބިލްކަން ހުރި ޒިންމާދާރު ރައްޔިތަކަށް ހެދުމެވެ. އަދި ކޭމްޕްގައި ބައިވެރިވާ ދަރިވަރުންގެ މެދުގައި އެކުވެރިމާއި އެއްބައިވަންތަކަމުގެ ރޫހް އާލާކުރުމެވެ. މި ކޭމްޕެގެ ތެރެއިން ކަނޑައެޅޭ ބައެއް އަސާސީ ހުނަރުތައް ކެޑޭޓޫންނަށް ތަޢާރަފް ކޮށްދިނުން ވެސް މި ކޭމްޕްގެ މަޤްޞަދުތަކުގެ ތެރޭގައި ހިމެނެއެވެ.
