ވަޒީރުންނަށް ރުހުން ދިނުމުގެ މައްސަލައާމެދު ގޮތެއް ނިންމުމަށް، ސަރުކާރުގެ މަސްއޫލިއްޔަތު އަދާކުރާ މިންވަރުބަލާ ކޮމިޓީން ތާވަލުކުރި ކޮމިޓީ ބައްދަލުވުން ކެންސަލްކޮށްފިއެވެ.
މަޖިލީހުގެ އިދާރާއިން މި ކޮމިިޓީ ބައްދަލުވުން އެޖެންޑާކުރީ 23 ޑިސެމްބަރުވީ ހޮނިހިރު ދުވަހުގެ ހެނދުނު 09:00ށެވެ. ނަމަވެސް ކޮމިޓީ ކެންސަލް ކޮށްފައިވަނީ ކަނޑައެޅިފައިވާ އަދަދަށް ކޯރަމް ހަމަވާ ވަރަށް މެމްބަރުން ނެތުމުންނެވެ.
ކޮމިޓީ ބައްދަލުވުން ފެށުމަށް ހަތަރު މެމްބަރުން ތިއްބަވަން ޖެހޭއިރު، ހޮނިހިރު ދުވަހުގެ ބައްދަލުވުމުގައި ހާޒިރުވެ ތިއްބެވީ 3 މެމްބަރުންނެވެ.
މީގެ ކުރިން މަޖިލީހުގައި ވަޒީރުންނަށް ރުހުން ދިނުމުގެ މައްސަލަ ޖަލްސާއަށް އެޖެންޑާކުރިއެވެ. އެއީ ނިމިދިޔަ ހޯމަ ދުވަހުގެ ޖަލްސާއަށެވެ. ނަމަވެސް އެކަން އެގޮތަށް ނުކުރެވޭނެކަން ފާހަގަކޮށް މަޖިލީހަށް ހުށަހެޅި ނިޒާމީ ނުކުތާ ބަލައިގަނެ، ވަޒީރުންނަށް ރުހުން ދިނުމުގެ މައްސަލަ އެޖެންޑާއިން ނެގުމަށްފަހު، ރުހުން ދިނުން އަނބުރާ ކޮމިޓީއަށް ފޮނުވަން މަޖިލީހުގެ ރިޔާސަތުން ނިންމަވާފައިވަނީ ނިމިދިޔަ ހަފުތާގެ ތެރޭގައެވެ.
އެ މައްސަަލަ އަނބުރާ ކޮމިޓީއަށް ފޮނުއްވާލެއްވީ މިދިޔަ ހޯމަ ދުވަހު މަޖިލިސް ފެށުމާއެކު، ތުޅާދޫ ދާއިރާގެ މެމްބަރު ހިސާން ހުސައިން ނިޒާމާބެހޭ މައްސަލައެއް ނަންގަވައި ފާހަގަކުރެއްވި ކަންކަމަށް ބެއްލެވުމަށް ފަހުގައެވެ.
އޭނާ އެ ނިޒާމީ ނުކުތާ ނެންގެވީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 129 ވަނަ މާއްދާގެ (ހ)ގެ ދަށުން ވަޒީރުންގެ މަޖިލީހަށް ރައީސުލްޖުމްހޫރިއްޔާ އައްޔަންކުރައްވާފައިވާ 22 ވަޒީރުންނަށް ރުހުންދިނުމުގެ މައްސަލަ، ސަރުކާރުގެ މަސްއޫލިއްޔަތު އަދާކުރާ މިންވަރު ބަލާކޮމިޓީން ދިރާސާކޮށް ނިންމިގޮތުގެ ރިޕޯޓާ ގުޅޭގޮތުންނެވެ.
އެ ނިޒާމީ ނުކުތާ ބަލައިގަތީ މަޖިލީހުގެ މެޖޯރިޓީ ލީޑަރާއި މައިނޯރިޓީ ލީޑަރާ މަޝްވަރާކުރުމަށް ފަހުގައެވެ. އެގޮތުން ކުރި މަޝްވަރާތަކަށްފަހު، އެ މައްސަލަ ގަވާއިދާ އެއްގޮތްކުރުމަށް ކޮމިޓީއަށް އަނބުރާ ފޮނުއްވާލެއްވިކަން ވަނީ އިއުލާންކުރައްވާފައެވެ. އެ ޖަލްސާއާ ހަމައަށް ސަރުކާރުން އަލަށް އުފެއްދި ވުޒާރާތަކުގެ މެންޑޭޓް ރައްޔިތުންގެ މަޖިލީހުން ފާސްކުރަން ފޮނުވާފައެއްވެސް ނުވެއެވެ.
ރުހުން ދިނުމުގެ މައްސަލަތަކުގައި އަމަލުކުރަންޖެހޭ ގޮތް، މަޖިލީހުގެ ހިންގާ ގަވާއިދުގެ 200 ވަނަ މާއްދާގައި ވަނީ ބަޔާންކޮށްފައެވެ. އެގޮތުން އެ މާއްދާގެ (ރ)ގައި ކޮމިޓީގެ ރިޕޯޓް އޮންނަންޖެހޭ ގޮތް ވަނީ ސާފުކޮށް ބަޔާންކޮށްފައެވެ. އެ މާއްދާގެ (ރ)ގައި ބުނެފައިވަނީ ރައްޔިތުންގެ މަޖިލީހުގެ ރުހުމަށް އެދި، ނުވަތަ މަޝްވަރާއަށް އެދި، ނުވަތަ ލަފައަށް އެދި ފޮނުވާ ކަމަކާ ގުޅޭގޮތުން، ކޮމިޓީއަށް 2 ގޮތަކަށް ގޮތް ނިންމިދާނެކަމަށެވެ. ނަމަވެސް ކޮމިޓީ ރިޕޯޓުގައި ބުނެފައިވަނީ ނޮވެމްބަރު 17 2023ގައި އައްޔަންކުރި ވަޒީރުންގެ ކިބައިގައި، ރާއްޖޭގެ ޖުމްހޫރިއްޔާގެ ގާނޫނުއަސާސީގެ 130 ވަނަ މާއްދާގައި ވަޒީރުންގެ މަޖިލީހުގެ މެމްބަރުންގައި ފުރިހަމަވާންޖެހޭނެކަމަށް ބަޔާންކޮށްފައިވާ ޝަރުތުތައް ފުރިހަމަވާކަމަށް އެކަންޏެވެ. އެ ރިޕޯޓުގައި، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 136 ވަނަ މާއްދާގެ (ހ)ގައި ވަޒީރުންގެ މަޖިލީހުގެ މެމްބަރަކު ކުރުން މަނާ ކަންކަމުގެގޮތުގައި ބަޔާންކުރާ ކަމެއް އެއިން ބޭފުޅަކު ކުރައްވަމުން ނުގެންދަވާ ކަމަށްވެސް ވިދާޅުވެފައިވެއެވެ.
އެހެންނަމަވެސް އެ ރިޕޯޓުގައި، ރައީސުލްޖުމްހޫރިއްޔާ އައްޔަންކުރައްވާފައިވާ 22 ވަޒީރުންގެ ތެރެއިން އެއްވެސް ބޭފުޅަކަށް ރުހުން ދިނުމަށް ފެންނަކަމަށްވެސް ނުވަތަ ނޫންކަމަށްވެސް ފާހަގަކުރައްވާފައެއް ނުވެއެވެ. އެހެންކަމުން ކޮމިޓީ ރިޕޯޓުގައި، ވަޒީރުންނަށް ރުހުން ދިނުމަށް ފެންނަކަން ނުވަތަ ނޫންކަން ސާފުކޮށް ނެތުމުން ،ރުހުން ދިނުމުގެ މައްސަލަތަކުގައި ކޮމިޓީން އެކުލަވާލާ ރިޕޯޓުގައި ހިމެނެންޖެހޭ ކަންކަން ކޮމިޓީގެ ނިންމުމުގައި ސާފުކޮށް ނިންމާފައިނުވާކަން ފާހަގަކޮށްލެވެއެވެ. ކޮމިޓީއަށް ރިޕޯޓް ފޮނުއްވާލެއްވީ އެކަންކަން އިސްލާހުކުރެއްވުމުގެ ގޮތުންނެވެ.
ސަރުކާރުގެ މަސްއޫލިއްޔަތު އަދާކުރާ މިންވަރުބަލާ ކޮމިޓީގައި ސަރުކާރަށް ނިސްބަތްވާ މެމްބަރުންވެސް ތިއްބަވައެވެ. ވަޒީރުންނަށް ރުހުންދިނުމުގެ މައްސަލައާމެދު ރައްޔިތުންގެ މަޖިލީހުގެ ސަރުކާރުގެ މަސްޢޫލިއްުޔަތު އަދާކުރާ މިންވަރުބަލާ ކޮމިޓީން ގޮތެއް ނިންމާފައިވަނީ 10 ޑިސެމްބަރު 2023ގައި އޮތް އެ ކޮމިޓީގެ 09 ވަނަ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
