ޕްރެޝަރު ބޮޑުވުމުން 24 ގަޑިއިރަށްފަހު ސަރުކާރުން ފުރަތަމަ ވެބްސައިޓް އަންބްލޮކް ކޮށްފި
ނޫސްވެރިކަމަކީ ހަމައެކަނި ސަރުކާރަށް ސަނާކިޔުން ކަމަށް ދެކުމަކީ ކުށްހީއެއް
ފުރަތަމަ. ކޮމް
ބައެއް ވެބްސައިޓުތައް ބްލޮކް ކުރުމާއި ގުޅިގެން ސަރުކާރަށް ގިނަ ބައެއްގެ ފާޑުކިޔުން އަމާޒުވެފައިވާ ދަނޑިވަޅެއްގައި ސަރުކާރުން ބްލޮކް ކުރި ފުރަތަމަ ވެބްސައިޓް އަންބްލޮކް ކޮށްފިއެވެ.
ސަރުކާރު ޖަވާބުދާރީކުރުވުމަށް ސަރުކާރުގެ ވާހަކަތައް ގެނެސްދޭ "ފުރަތަމަ.ކޮމް" އަކީ ހޯމް މިނިސްޓްރީގައި ރަޖިސްޓްރީކޮށްގެން ހިންގާ ނޫހެކެވެ. އެ ނޫހުގެ މަސްއޫލުވެރިޔާ އަޙްމަދު އާތިފް، މާވިނަ ހދ.ކުޅުދުފުށި އަކީ ކުރީގެ ސަރުކާރުގެ ޓޫރިޒަމް މިނިސްޓްރީގެ ޑެޕިއުޓީ މިނިސްޓަރުކަމުގެ މަގާމުގައި ހުންނެވި ބޭފުޅެކެވެ.
އަދި އެ ނޫހުގެ އެޑިޓަރުކަމުގައި ހުރި އަޙްމަދު އާޒިފް، ކެތި، ގއ. ގެމަނަފުށި އަކީ ރާއްޖޭގައި ހިންގާ "ސަން އޮންލައިން"ގެ މެނޭޖިން އެޑިޓަރުގެ މަގާމުގައި ވެސް ހުންނެވި ބޭފުޅެކެވެ.
ރާއްޖޭގައި ޚަބަރު ފެތުރުމުގައި ހަރަކާތްތެރިވާ "ކުރުސީ.ކޮމް" އަދި "ދިޔަވަރު.ކޮމް" ބްލޮކް ކުރުމާ ގުޅިގެން އާންމުންނާ ކުރީގެ ސަރުކާރުތަކުގެ މަތީ ފަނޑީގައި ތިއްބެވި ބޭފުޅުންގެ ފާޑު ކިޔުން ސަރުކާރަށް އަމާޒުވެފައިވާ ދަނޑިވަޅެއްގައިއެވެ. އެގޮތުން އެކަން ހިނގުމާއެކު އެކަން ދިފާއުކުރައްވައި ރައީސް އޮފީހުގެ ތަރުޖަމާނު މުޙައްމަދު ޝަހީބު ކުރެއްވި ޓްވީޓެއްގައި ވިދާޅުވީ ރާއްޖޭގައި ރަޖިސްޓްރީކޮށްގެން ހިންގާ އެއްވެސް ނޫހެއް ސަރުކާރުން ބްލޮކް ނުކުރާނެ ކަމަށާއި، ޚިޔާލު ފާޅުކުރުމުގެ މިނިވަންކަން އެންމެ ފުޅާކޮށް އޮތުމުގެ ފުރުސަތު މި ސަރުކާރުން ދޭނެ ކަމަށެވެ. އެހެން ނަމަވެސް ފުރަތަމަ.ކޮމް އަކީ 25 ނޮވެމްބަރު 2019 އިން ފެށިގެން ރާއްޖޭގައި ރަޖިސްޓްރީކޮށްގެން ހިންގަމުންއަންނަ ނޫހެކެވެ.
ފުރަތަމަ ވެބްސައިޓުން ވަނީ ސަރުކާރުން ހިންގި މި އަމަލު ހަރުކަށި އިބާރާތުން ކުށްވެރިކޮށްފައެވެ. އަދި ނޫސްވެރިކަމަކީ ހަމައެކަނި ސަރުކާރަށް ސަނާކިޔުން ކަމަށް ދެކުމަކީ ކުށްހީއެއް ކަމަށް ވަނީ ބުނެފައެވެ.
