ސަރުކާރަށް ފާޑުކިޔުމުގެ މިނިވަންކަން ތަންމިނަށް އޮންނަންޖެހޭ، އެކަން ބަންދުކުރަން މަސައްކަތް ކުރާނީ ޚުދުމުހްތާރު ސަރުކާރެއް: އެމްޑީޕީ
ޕީޕީއެމްގެކުރީގެ ވެރިކަން ފަދައިން މި ސަރުކާރުން ވެސް ދުލާއި ގަލަމުގެ މިނިވަންކަން ނިގުޅައިގަންނަން މަސައްކަތްކުރަމުންދާތަން ދަނީ ފެންނަމުން ކަމަށް އެމްޑީޕީން ބުނޭ
ފުލުހަކު ނޫސްވެރިޔަކަށް ހުރަސް އަޅަނީ
ސަރުކާރަށް ފާޑުކިޔުމުގެ މިނިވަންކަން ތަންމިނަށް އޮންނަން ޖެހޭ ކަމަށާއި، އެކަން ބަންދުކުރަން މަސައްކަތް ކުރާނީ ޚުދުމުހްތާރު ސިފަތަކެއް ލިބިފައިވާ ސަރުކާރެއް ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބުނެފި އެވެ.
ޚަބަރުފެތުރުމުގައި ހަރަކާތްތެރިވާ ތިން ނޫހެއް ބްލޮކް ކުރުމާ ގުޅިގެން އެކަން ކުށްވެރިކޮށް އެމްޑީޕީން ނެރުނު ބަޔާނެއްގައި ބުނީ، މިނިވަންކަމާއެކު ފިކުރުކުރުމާއި ޚިޔާލު ފާޅުކުރުމަކީ ޤާނޫނު އަސާސީން ކޮންމެ ރައްޔިތަކަށް ކަށަވަރުކޮށްދީފައިވާ އަސާސީ ހައްގެއް ކަމަށާއި، އެކަމަކީ އެ ޕާޓީން އަބަދުމެ ވަކާލާތު ކުރާ ކަމެއް ކަމަށެވެ.
އެގޮތުން އެ ހައްގުތަކަކީ އެ ޕާޓީން ގުރުބާންވެގެން ހޯދި ހައްގުތަކެއް ކަމަށާއި، އެއީ ތިމާގެ ބުއްދިއަށް ފެންނަ ވިސްނުންތައް ބަޔާންކުރުމުގެ ފުރުސަތު ނެތް މުޖްތަމައުއަކީ ދިމިގްރާތީ މުޖްތަމައު އެއް ކަމުގައި އެ ޕާޓީއަށް އެއްބަސްނުވެވޭތީ ކަމަށް ވެސް ބަޔާނުގައި ބުންޏެވެ.
މީގެ އިތުރުން، އެމްޑީޕީގެ ފަރާތުން ކުރި ދެ ވެރިކަމުގައި ވެސް ސަރުކާރާ ދެކޮޅަށް ރޭވިގެން އަދި އިންތިޒާމުވެވިގެން ދޮގު ޙަބަރު ފެތުރެމުން ދިޔައިރު ވެސް، މީޑިޔާތަކަށް ސަރުކާރުން ފިޔަވަޅު އަޅާފައިވާ ނުވާނެ ކަމަށާއި، ރައްޔިތުންގެ އަސާސީ ހައްގުތައް ކަށަވަރުކުރުމާއި، ވަކިން ޚާއްސަކޮށް ޚިޔާލު ފާޅުކުރުމުގެ މިނިވަންކަން ފުރިހަމައަށް އެ ސަރުކާރުތަކުގައި ކަށަވަރުކޮށްދެވުނު ކަމަށް ވެސް އެމްޑީޕީގެ ބަޔާނުގައި ބުނެފައި ވެއެވެ.
ބަޔާނުގައި އިތުރަށްބުނީ ސަރުކާރަށް ފާޑުކިޔުމުގައި މިނިވަންކަން ތަންމިނަށް އޮންނަން ޖެހޭ ކަމަށާއި، އެކަން ބަންދުކުރާނީ ޚުދުމުހްތާރު ސިފަތަކެއް ޖެހިފައިވާ ސަރުކާރުން ކަމަށެވެ. އަދި މިހާރު ވެރިކަމުގައި އޮތް ޕީޕީއެމްގެ ކުރީގެ ވެރިކަމުގެ ފަދައިން މި ސަރުކާރުން ވެސް ދުލާއު ގަލަމުގެ މިނިވަންކަން ނިއުޅައިގަންނަން މަސައްކަތްކުރަމުންދާތަން ދަނީ ފެންނަމުން ކަމަށް އެ ބަޔާނުގައި ބުންޏެވެ.
އެމްޑީޕީން ކަންބޮޑުވެ، ސަރުކާރުގެ ނިންމުންތައް ކުށްވެރިކޮށް ބަޔާނެއް ނެރެފައިވާއިރު، ނިމިދިޔަ އެެމްޑީޕީގެ ސަރުކާރުގައި ރާއްޖޭގެ ނޫސްތަކުން ސަރުކާރާ ދެކޮޅު އަދި ފިތުނަވެރި ޚަބަރުތައް ލިޔުނު ނަމަވެސް، އެ ސަރުކާރަކުން އެފަދަ ނޫސްތަކަށް އަދި ނޫސްވެރިންނަށް ފިޔަވަޅު އަޅާފައެއް ނުވެ އެވެ.
ނޫސްވެރިންގެ މަސައްކަތް ހަނިކުރުމުގެ އެފަދަ މަސައްކަތްތަކެއް ކުރެވި އަދި ފެނުނީ ޕީޕީއެމްގެ ކުރީގެ ސަރުކާރުގައި ރައީސް އަބްދުﷲ ޔާމީންގެ ޒައާމަތުގައި އެވެ. އެގޮތުން "ރާއްޖެ ޓީވީ" ޖޫރިމަނާކޮށް ބައެއް ނޫސްތައް ބަންދުކުރި އިރު، ބައެއް ނޫސްވެރިން ޖަލަށް ލައި ވެސް ހެދި އެވެ. އަދި އެއް ނޫސްވެރިއަކު މިއަދާ ހަމައަށް ވެސް ގެއްލިފައިވާއިރު، އިތުރު ނޫސްވެރިއަކު ވަނީ އަނިޔާވެރި ގޮތަކަށް މަރާލާފަ އެވެ.
