ފުޓްބޯޅައިގެ ހާލަތު ރަނގަޅުކުރަން އެންމެން އެކައްޗެއް ކިޔައި، އެއް މިސްރާބަކަށް ދިޔުން ނޫންގޮތެއް ނެތް: މޯހަން

ފުޓްބޯޅައިގެ ހާލަތު ރަނގަޅުކުރަން އެންމެން އެކައްޗެއް ކިޔައި, އެއް މިސްރާބަކަށް ދިއުން ނޫން ގޮތެއް ނެތްކަމަށް ޕްރޯ ލައިސަންސް ކޯޗު މުޙައްމަދު ޝިޔާޒު (މޯހަން) ބުނެފިއެވެ.

މިސީޒަންގައި އީގަލްސް އަށް އިރުޝާދު ދިން ކޯޗު, ސީޒަންގެ ފަހު މެޗަށްފަހު ބުނީ ފުޓްބޯޅައިގެ ނެގަޓިވް ވާހަކަ ދައްކަން އޭނާ ބޭނުން ނުވާ ކަމަށެވެ. އެކަމަކު އެންމެނަށްވެސް އެނގޭނެހެން ފުޓްބޯޅައިގެ ހާލަތު މި އޮތީ ވަރަށް ގޯސްކޮށް ކަމަށާއި, ރަނގަޅުކުރަންހުރި ބައިވަރު ކަންކަން ހުރިކަންވެސް އެންމެނަށް ވެސް އެނގޭ ކަމަށެވެ.

މޯހަން ބުނީ ފުޓްބޯޅައިގެ ހާލަތު ރަނގަޅު ކުރުމަށް އެންމެ އެކުގައި ވަރަށް ބުރަ މަސައްކަތްތަކެއް ކުރަން ޖެހޭ ކަމަށެވެ. ކުރަން އޮތީ ވަރަށް ޗެލެންޖިންގ މަސައްކަތްތަކެއް ކަމަށް ޤައުމީ ޓީމާއެކު ފުރަތަމަ ސާފް ޗެމްޕިއަން ހޯދި ޓީމްގެ އެސިސްޓެންޓް ކޯޗު މޯހަން ބުންޏެވެ.

ފުޓްބޯޅަ އެސޯސިއޭޝަން ދަރަނިވެރިވެ, މުވައްޒަފުންނަށް ވެސް މުސާރަ ނުދެވޭ ހާލަތަށް ގޮސްފައި ވަނިކޮށް, އައު އިންތިޚާބަކަށް ވަނީ ގޮވާލާފައެވެ. އައި ކުރިއަށް އޮތް އިންތިޚާބުގައި ވާދަނުކުރައްވާނެކަން މިހާރުގެ ރައީސް ބައްސާމް އަދީލް ޖަލީލް ވަނީ އިއުލާނުކުރައްވާފައެވެ. ފުޓްބޯޅަ އެސޯސިއޭޝަނުން މިއަހަރުގެ ސީޒަންވެސް ނިންމާލީ އެފްއޭކަޕް ނުކުޅެއެވެ. ދެވަނަ ޑިވިޝަން އަދިވެސް ނުފެށެއެވެ. ދިވެހި ލީގުވެސް ތިން ބުރު ކުޅޭ ގޮތަށް އޮތަސް, ލީގު މެދުން އެނިންމުން ބަދަލުކުރީ ދެބުރު ކުޅޭ ގޮތަށެވެ.