ގާޑިއޯލާ އެޓޭކަށް، ޑިފެންސްގައި ވެންގާ!

ދުނިޔޭގެ ކްލަބް ވޯލްޑްކަޕުގެ ފޯމެޓާމެދު މެންޗެސްޓާ ސިޓީގެ ކޯޗު ޕެޕް ގާޑިއޯލާ ހިތްހަމަނުޖެހުން ފާޅުކުރުމުން، ދުނިޔޭގެ ފުޓްބޯޅަ ޖަމިއްޔާ ފީފާގެ ދިފާއުގައި އާސެނަލްގެ ކުރީގެ ކޯޗު އާސެން ވެންގާ ވާހަކަދައްކައިފިއެވެ.

ދުނިޔޭގެ އެންމެ މޮޅު ކޯޗުކަމަށް ގިނަ ބަޔަކު ދެކޭ ގާޑިއޯލާ ބުނީ، 2025 ވަނަ އަހަރުން ފެށިގެން 32 ޓީމު ވާދަކުރާ ގޮތަށް، އެއް މަސް ދުވަހަށް ދިގުދެމިގެންދާނެހެން ކުލަބު ވޯލްޑްކަޕް ބޭއްވުން ރަނގަޅު ނޫން ކަމަށެވެ. އޭނާ ބުނީ މީގެ ސަބަބުން ކުޅުންތެރިންނަށް އަރާމުކުރަން ވަގުތު މަދުވުމަކީ އެންމެ ކަންބޮޑުވާ ސަބަބު ކަމަށެވެ.

އޭނާ ބުނީ އައު މުބާރާތްތައް ތައާރަފް ކުރުމަކީ ރަނގަޅު ކަމެއް ކަމަށާއި، އެކަމާ ދެކޮޅުހަދާ މީހަކަށް އޭނާ ނުވާނެ ކަމަށެވެ. އެކަމަކު މައްސަލައަކީ ކުޅުންތެރިންނަށް ލިބޭ ރެސްޓުގެ މުއްދަތު ކުރުވުމުން، މޮޅު ކުޅުންތެރިން އަވަސް އަވަހަށް އަނިޔާގެ ސަބަބުން ކުޅުމާ ދުރަށްދާން ޖެހުން ކަމަށެވެ.

މި ވާހަކަތަކަށް ރައްދު ދެމުން ފީފާގެ ޗީފް ގްލޯބަލް ފުޓްބޯޅަ ޑިވޮލޮޕްމަންޓް އާސެން ވެންގާ ބުނީ، ކްލަބް ވޯލްޑްކަޕުގެ އައު ފޯމެޓްގެ ސަބަބުން ޓީމުތަކާއި ކުޅުންތެރިން ކުރިއަރަން ފުރުސަތު ލިބޭނެކަމަށެވެ.

އާސެނަލްގެ އެންމެ ކާމިޔާބު ކޯޗު ބުނީ ބައްރުތަކުގެ ޗެމްޕިއަނުން އެކަނި ހިމަނައިގެން ކުޅޭ ކުރު މުބާރާތެއްހެން ކުލަބު ވޯލްޑް ކަޕް ނިންމާލުމުން، ގިނަ ފަހަރަށް ހަގީގީ ފައިދާ ނުފެންނަ ކަމަށެވެ. އަދި 32 ޓީމު ހިމަނައިގެން މުބާރާތް ދެން ބާއްވާނީ ކޮންމެ ހަތަރު އަހަރަކުން އެއް އަހަރު ކަމަށާއި، ދެ މެޗެއްގެ ދޭތެރޭގައި ޓީމުތަކަށް އަރާމުކުރަން ލިބޭ ވަގުތު މަދުނުވާނެ ކަމަށެވެ. އަދި މުބާރާތަށް ފަހު އައު ސީޒަނާ ދެމެދުވެސް ހަތަރު ހަފުތާ ލިބޭތީ، އެއީ އަރާމުކުރަން އެކަށީގެންވާ ވަގުތެއް ކަމަށެވެ.

ވެންގާ ބުނީ، ކޮވިޑްގެ އާލަމީ ވަބާގެ ސަބަބުން ލީގުތައް މެދުކަނޑާލުމަށްފަހު އަލުން ފަށައި، ނިންމާލީ ކުޑަ ވަގުތުކޮޅެއްގެ ތެރޭގައި ކަމަށާއި، ގިނަ ލުއިތަކަކާއެކު ގާތްގާތުގައި ގިނަ މެޗުތަކެއް ކުޅުމަކީ މައްސަލައެއް ނޫންކަމަށެވެ.