ލުކާކޫގެ ލަނޑުން ޗެލްސީ ކްލަބް ވޯލްޑް ކަޕް ފައިނަލަށް

ކްލަބް ވޯލްޑް ކަޕުގައި އޭޝިއާގެ ޗެމްޕިއަން އަލް ހިލާލް ބަލިކޮށް ޔޫރަޕްގެ ޗެމްޕިއަން ޗެލްސީން ފައިނަލުން ފުރުސަތު ހޯދައިފިއެވެ.

ޔޫއޭއީގެ އަބޫދާބީގައި ކުޅުނު މި މެޗު ޗެލްސީން ކާމިޔާބުކުރީ 1-0 ގެ ނަތީޖާއަކުންނެވެ.

މި މެޗު ފަށައިގެން ޗެލްސީން ހިލާލްގެ ހާފަށް ބާރުބޮޑުކުރިއިރު، މެޗުގެ ވަރަށް ކުރީކޮޅު ޗެލްސީގެ ހަކީމް ޒިޔެޗް އޭރިއާ ބޭރުން ފޮނުވާލި ބާރު ހަމަލާ ގޯލާ އަމާޒުނުވެ ދިޔައީ ބޭރަށެވެ. އޭގެ ފަހުން މެޗުގެ 18 ވަނަ މިނެޓުގައި ރޮމެލޫ ލުކާކޫއަށް ވަނީ ލަނޑު ޖަހަން ހުސްފުރުސަތެއް ލިބި ބޭކާރުވެފައެވެ.

އެކަމަކު މެޗުގެ 32 ވަނަ މިނެޓުގައި ލުކާކޫ ވަނީ ހިލާލްގެ ޑިފެންޑަރުންނަށް ހެދުނު ގޯހެއްގެ ފައިދާ ނަގާ ލަނޑު ޖަހާ ޗެލްސީއަށް ލީޑު ނަގައިދީފައެވެ.

މެޗުގެ ދެވަނަ ހާފުގައިވެސް ޗެލްސީން ހިލާލްގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލިއިރު، ދެވަނަ ހާފު ފަށައިގެން ތިންވަނަ މިނެޓުގައި ހަވާޓްްޒް ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ. އޭގެ ފަހުން ޒިޔެޗް ފޮނުވާލި ހަމަލާ ހިލާލްގެ ކީޕަރު އަލް މަޔޫފް ވަނީ މަތަކޮށްފައެވެ.

މިދިޔަ އަހަރުގެ ޖެނުއަރީ މަހު ޗެލްސީގެ ކޯޗުކަމާ ހަވާލުވި ޖަރުމަނުގެ ކޯޗު ތޯމަސް ޓުޗެލް ހަވާލުވިތާ މިވީ 379 ދުވަސް ތެރޭ އޭނާ ޗެލްސީ ގޮވައިގެން ނުކުތް ހުރިހާ މުބާރާތެއްގެ ފައިނަލުގައި ވަނީ ކުޅެފައެވެ

ޗެލްސީ އަށް ބައިނަލްއަގުވާމީ ބޮޑު މުބާރާތެއްގެ ތެރެއިން ތަށި ނުހޯދި އޮތީ ކްލަބް ވޯލްޑް ކަޕްގެ އެވެ. ޗެލްސީން 2012 ވަަނަ އަހަރުގެ ކްލަބް ވޯލްޑް ކަޕްގެ ފައިނަލުގައި ކުޅުނު ނަމަވެސް ވަނީ ބްރެޒިލްގެ ކޮރިންތިއަންސް އަތުން 1-0 އިން ބަލިވެފަ އެވެ. މި ފަހަރުގެ ފައިނަލުގައި ވެސް ޗެލްސީ ކުޅެން ޖެހިފައި އޮތީ ބްރެޒިލްގެ ކްލަބަކާއެވެ.

ކްލަބް ވޯލްޑް ކަޕްގެ ފައިނަލުގައި ހޮނިހިރު ދުވަހުގެރޭ ޗެލްސީން ނުކުންނަން ޖެހޭނީ ބްރެޒިލްގެ ޕަލްމެއިރާސްއާ ދެކޮޅަށެވެ. ޕަލްމެއިރާސް އިން ފައިނަލުގެ ޖާގަ ހޯދީ އެފްރިކާގެ ޗެމްޕިއަން އަލް އަހްލީ އަތުން ސެމީ ފައިނަލުގައި 2-0 އިން މޮޅުވެގެންނެވެ.