ޑެނީ އަލްވޭސްގެ ޝަރީއަތްތައް ފެބްރުވަރީ މަހު ފަށަނީ

ބާސެލޯނާ އާއި ބްރެޒިލްގެ ކުރީގެ ޑިފެންޑަރު ޑެނީ އަލްވޭސްގެ މައްޗަށް ޖިންސީ ގޯނާ ކުރި ކަމުގެ ތުހުމަތުގައި ސްޕެއިންގައި ކުރިއަށް ގެންދާ ޝަރީއަތް ފެބްރުއަރީ މަހު ފަށަން ތައްޔާރުވެއްޖެ އެވެ.

ކެޓަލޯނިއާގެ އެންމެ މަތީ ކޯޓުން ބުދަ ދުވަހު ބުނީ، އަލްވޭސްގެ މައްސަލައިގެ ޝަރީއަތްތައް އަންނަ ފެބްރުވަރީ މަހުގެ ފަސް ވަނަ ދުވަހުން، ހަތް ވަނަ ދުވަހަށް ތާވަލުކޮށްފައިވާ ކަމަށެވެ. އަލްވޭސްގެ މައްޗަށް ދައުވާ ކޮށްފައި ވަނީ، މިދިޔަ އަހަރުގެ ޑިސެމްބަރު މަހު ބާސެލޯނާގެ ނައިޓު ކުލަބެއްގައި އަންހެނަކަށް ޖިންސީ ގޯނާ ކުރި ކަމުގެ ތުހުމަތުގަ އެވެ. އެ މައްސަލައާ ގުޅިގެން، މިއަހަރުގެ ޖަނަވަރީ މަހުގެ 20 ވަނަ ދުވަހު އަލްވޭސް ހައްޔަރުކޮށްފައިވާއިރު، މިހާރު އޭނާ ހުންނަނީ ޖަލެއްގައި ބަންދުކޮށްފަ އެވެ. އެއީ މައްސަލައިގެ ޝަރީއަތް ނިމެންދެން އޭނާ ބަންދުކޮށްފައި ބެހެއްޓުމަށް ކޯޓުން އަމުރުކޮށްފައިވާތީ އެވެ.

އުމުރުން 40 އަހަތުގެ އަލްވޭސްގެ މައްޗަށް އުފުލާފައިވާ ދައުތާތައް ސާބިތުވެއްޖެ ނަމަ، ހަތަރު އަހަރާއި 15 އަހަރާ ދެމެދުގެ ޖަލު ޙުކުމެއް އޭނާ އަށް އަންނާނެ އެވެ. އަލްވޭސް ވަނީ އޭނާއާ ދެކޮޅަށް ކުރާ ތުހަމަތުތަކަށް ފުރަތަމަ ދުވަހުން ފެށިގެން އިންކާރުކޮށްފަ އެވެ. އެގޮތުން އަލްވޭސް ބުނެފައި ވަނީ، އޭނާ އާއި ދައުވާ ކުރާ އަންހެން މީހާއާ ދެމެދު ހިނގައިދިޔަ ކަމެއް ހިނގީ ދެ މީހުންގެ ވެސް ރުހުމުގައި ކަމަށެވެ. އަދި އޭނާ އަށް ޖިންސީ ގޯނާ ކުރުމުގެ ނިޔަތުގައި އެއްވެސް ކަމެއް ކޮށްފައި ނުވާނެ ކަމަށް ވެސް އަލްވޭސް ބުނެފައިވެ އެވެ.

މި މައްސަލައިގައި އަންހެން މީހާގެ ވަކީލެއްގެ ގޮތުގައި މަސައްކަތް ކުރަމުން އަންނަ ސްޕެއިންގެ ޕްރޮސެކިއުޓަރުން ކޯޓުގައި އެދިފައި ވަނީ އަލްވޭސްގެ މައްޗަށް ނުވަ އަހަރުގެ ޖަލު ޙުކުމެއް އިއްވައި ދިނުމަށެވެ. އަދި އަނިޔާ ލިބުނު ކަމަށް ބުނާ އަންހެން މީހާ އަށް ބަދަލުގެ ގޮތުގައި 150،000 ޔޫރޯ ނުވަތަ 164،430 ޑޮލަރު ހޯދައިދިނުމަށް ވެސް ވަނީ އެދިފަ އެވެ.

އަލްވޭސް އަކީ ބްރެޒިލްގެ ޤައުމީ ޓީމާއި، ސްޕެއިންގެ ބާސެލޯނާގެ އިތުރުން ސެވިއްޔާ، ޔުވެންޓަސް އަދި ޕެރިސް ސެއިންޓް ޖާމަން (ޕީއެސްޖީ) ފަދަ ކުލަބުތަކާއެކު ކެރިއަރުގައި 43 ތަށި ހޯދާފައިވާ ކުޅުންތެރިޔެކެވެ. އޭނާ އަކީ ފުޓުބޯޅައިގެ ތާރީޚުގައި ވެސް އުފެދުނު އެންމެ ކާމިޔާބު އެއް ކުޅުންތެރިޔާ އެވެ.