ގިނަ ދުވަސްތަކަކަށްފަހު ފައިސަލް އެމްޑީޕީ ޕޯޑިއަމުން ވިދާޅުވީ ރަނގަޅު އެއްޗެއް ލިބެން އޮއްވާ ގޯސް އެއްޗަކާ ދިމާއަށް ނުދިޔުމަށް
ރަނގަޅު މީހުންނާއި ނުރަނގަޅު މީހުން ވެސް އެނގޭ
ހޯމަ ދުވަހުގެ ރޭ ބޭއްވި ބޮނޑިބަތް އިވެންޓުގައި ފައިސަލް ވާހަކަފުޅު ދައްކަވަނީ
ރަނގަޅު އެއްޗެއް ލިބެން އޮއްވާ ގޯސް އެއްޗަކާ ދިމާއަށް އެއްވެސް މީހަކު ނުދިޔުމަށް ކުރީގެ ނައިބުރައީސް ފައިސަލް ނަސީމް ވިދާޅުވެއްޖެއެވެ.
އެމްޑީޕީގެ ފަރާތުން މާލެ ސިޓީގެ މޭޔަރު ކަމަށް ވާދަ ކުރައްވާ އާދަމް އާޒިމް އާއިއެކު ހުޅުމާލެ ރުއްގަނޑު 1 ސަރައްހައްދުގައި ބޭއްވި ބޮނޑިބަތް އިވެންޓުގައި ވާހަކަފުޅު ދައްކަވަމުން ފައިސަލް ވިދާޅުވީ މި މަގާމަށް ކުރިމަތިލައްވާ ރަނގަޅު މީހުންނާއި ނުރަނގަޅު މީހުން ވެސް އެނގޭ ކަމަށެވެ. ކުރީގެ ރައީސް މުހައްމަދު ސާލިހުގެ ސަރުކާރަކީ ތާރީޚުގައި އެންމެ ގިނަ މަޝްރޫއުތައް ކުރިއަށް ގެންދިޔަ ސަރުކާރެއް ކަމަށާއި އެ މަޝްރޫއުތަކުގެ މާލިމީއެއްގެ ގޮތުގައި ހުންނެވީ އާޒިމް ކަމަށް ވެސް ވިދާޅުވިއެވެ.
ރައްޔިތުންނަށް ޒިންމާ އަދާކުރުމުގެ ރަނގަޅު ގޮތަކީ ކޮބައިތޯ އާޒިމް އަބަދުވެސް ބައްލަވާ ކަމަށާއި އާޒިމް އަކީ އަބަދުވެސް މީހުން ގޮވައިގެން އުޅޭ ރަނގަޅު މީހެއް ކަމަށް ފައިސަލް ވިދާޅުވިއެވެ.
ރައްޔިތުންނާއެކު މީހާ ހުރުމަކީ ވަރަށް މުހިންމު ކަމެއް ކަމަށާއި ވަޒީފާ ދޭ މީހާ ބުނާހާ ހުރިހާ ކަމެއް އެއީ ކުރަންޖެހޭ ކަމެއް ނޫން ކަމަށް ވެސް ފައިސަލް ވިދާޅުވިއެވެ.
ފައިސަލް ވިދާޅުވީ މިވަގުތު މާލޭގެ މަގުތައް ސާފުކުރުމާއި އެކްސިޑެންޓްތައް މަދުކުރުމަށާއި ޕާކިންގ މައްސަލަ ހައްލު ކުރުމަށް މަސައްކަތް ކުރުމަކީ ވަރަށް މުހިންމު ކަމެއް ކަމަށެވެ.
އާޒިމް އަކީ ކޮންމެ ކަހަލަ ބަޔަކާއެކު ވެސް ގުޅިގެން މަސައްކަތް ކުރެއްވޭނެ ބޭފުޅެއްކަން ފާހަގަކުރައްވާ ފައިސަލް ވަނީ ހުރިހާ ރައްޔިތުން އެއްބާރުލުން ދީ އާޒިމަށް ވޯޓް ދެއްވުމަށް އެދިވަޑައިގެންފައެވެ.
