އިސްރާއީލުގެ ވައިގެ ހަމަލާތަކެއްގައި ޣައްޒާއިން 30 އަށް ވުރެ ގިނަ މީހުން މަރުވެ، އެތައް ބަޔަކު ޒަޚަމްވެއްޖެ

ރެއާއި މިއަދު ހެނދުނު ޣައްޒާއަށް ދިން އިސްރާއީލުގެ ވައިގެ ހަމަލާތަކުގައި މީހުން ދިރިއުޅޭ ބްލޮކަކަށް ހަމަލާދީ، އާންމުންގެ 30 ށް ވުރެ ގިނަ މީހުން މަރުވެ، އެތައް ބަޔަކު ޒަޚަމްވެއްޖެ ކަމަށް ރިޕޯޓްތައް ބުނެފިއެވެ.

ފަލަސްތީނުގެ ނިއުސް އެޖެންސީ ވަފާއަށް މައުލޫމާތު ދިން މަސްދަރު ތަކުން ބުނި ގޮތުގައި މި ވައިގެ ހަމަލާތައް އަމާޒުކޮށްފައި ވަނީ ޖަބަލިއާ ޓައުންގެ މީހުން ދިރިއުޅޭ ބްލޮކަކަށް ކަމަށްވާއިރު، އެ ހަމަލާގެ ސަބަބުން 30 މީހުން މަރުވެ އެތައް ބަޔަކު ވަނީ ޒަހަމްވެފައެވެ. މީގެ އިތުރުން ވެސް އެތައް ބަޔަކު ގެއްލުނު ކަމުގެ ރިޕޯޓްތައް ލިބެމުންދާއިރު، އެކަމުގެ ސަބަބުން ހާލަތުވަނީ ވަރަށް ގޯސްވެފައެވެ.

30 މީހުން މަރުވި އެ ހަމަލާ އަށްފަހުވެސް ޣައްޒާއަށް ދިން އިތުރު ހަމަލާއެއްގައި އިތުރު އަށް މީހުން މަރުވެފައި ވާކަމަށް ވަފާއިން ރިޕޯޓްކުރެއެވެ. އޭގެ ތެރޭގައި ދެ ކުޑަކުދިންނާއި އަންހެނަކު ހިމެނޭ އިރު، އިސްރާއީލުގެ ވައިގެ ހަމަލާތަކުގައި އެތައް ބަޔަކު ވަނީ ޒަހަމްވެފައެވެ.

މި ވައިގެ ހަމަލާތައް އަމާޒުކޮށްފައިވަނީ ޣައްޒާގެ މެދުތެރޭގައި އޮންނަ ނުސީރަތު ރެފިއުޖީ ކޭމްޕްގައި ދިރިއުޅޭ އާއިލާއެއްގެ ގެއަށެވެ.

މީގެ އިތުރުން ނުސީރަތު ކޭމްޕްގައި ހުންނަ އެހެން އާއިލާއެއްގެ ގެއަކަށްވެސް އަމާޒުކޮށް އިސްރާއީލުން ދިން ބޮމުގެ ހަމަލާއެއްގައި އެތައް ބަޔަކު މަރުވެ އެތައް ބަޔަކު ވަނީ ޒަހަމްވެފައެވެ.

އިސްރާއީލުގެ ހަނގުރާމަމަތީ މަތިންދާބޯޓުތަކުން ވަނީ އަލްމަގްޒާޒީ ރެފިއުޖީ ކޭމްޕްގެ ބައެއް ތަންތަނާއި ޣައްޒާގެ އުތުރުގައި އޮންނަ އަލް ތުއްފާ އަވަށުގެ ސަރަހައްދުތަކަށްވެސް ހަމަލާތައް ދީފައެވެ.

މީގެ އިތުރުން އިސްރާއީލުގެ އަސްކަރިއްޔާއިން ވަނީ ދެކުނުގެ ޚާން ޔުނިސް ސިޓީގެ މެދުތެރެއާއި އިރުމަތީ ސަރަޙައްދުތަކަށް އަމާޒުކޮށް ވަރުގަދަ އިތުރު ހަމަލާތައް ދޭން ފަށާފައެވެ. މި ހަމަލާތައް އަމާޒުކޮށްފައިވަނީ މެދުތެރޭގެ ސްޓްރިޕްގެ ދީރް އަލް-ބާލާހުގައި ހުންނަ ގެއަކަށެވެ.

އޮކްޓޯބަރު މަހުގެ 7 ވަނަދުވަހު އިސްރާއިލަށް އަމާޒުކޮށް ދިން ޙަމާސްގެ އަސްކަރީ ޙަމަލާގެ ބަދަލު ހިފުމުގެ ގޮތުން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ފަށާފައިވާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 18,700 އުފުލިފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 50,000 އަށް އަރައެވެ.

ޒަޚަމްވި މީހުންނާއި، މަރުވި މީހުންގެ ތެރޭގައި ގިނައީ އަންހެނުންނާއި، ކުޑަކުދިންނެވެ.