އެއްވެސް މައުލޫމާތެއް ހާމަނުކޮށް މިއަދު ފުށިދިއްގަރުފަޅު ހިއްކަން ފަށަނީ
ހޯމަ ދުވަހު ހަވީރު އޮންނަ ރަސްމިއްޔާތުގައި މިމަޝްރޫއު ފައްޓަވައިދެއްވަނީ ރައީސް މުއިއްޒު
މިމަޝްރޫއު ވަނީ ބަޖެޓުން އުނިކޮށްފައި
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ބޯހިޔާވަހިކަމުގެ ސިޔާސަތުގެ ދަށުން ހިންގާ އެންމެ ބޮޑު މަޝްރޫއު ކަމަށްވާ ފުށިދިއްގަރުފަޅު ހިއްކުމުގެ އަމަލީ މަސައްކަތް ފަށަން ތައްޔާރުވެއްޖެއެވެ.
އިތުބާރުހުރި ފަރާތަކުން ރާއްޖެއެމްވީއަށް ވިދާޅުވީ ހޯމަ ދުވަހުގެ ހަވީރު ފުށިދިއްގަރުފަޅު ހިއްކުމުގެ އަމަލީ މަސައްކަތް ފަށާނެ ކަމަށެވެ. އަދި ވިދާޅުވީ މިމަޝްރޫއުގެ މަސައްކަތް ކުރުމަށް ބަޖެޓުން އުނިކޮށްފައިވާތީ މިމަޝްރޫއު ކުރިއަށް ގެންދަނީ ބޭރުގެ ގައުމެއްގެ އެހީގެ ދަށުން ކަމަށެވެ.
މައުލޫމާތު ލިބިފައިވާ ގޮތުގައި ހޯމަ ދުވަހު ހަވީރު އޮންނަ ރަސްމިއްޔާތުގައި މިމަޝްރޫއު ފައްޓަވައިދެއްވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. ނަމަވެސް މިމަޝްރޫއާ ގުޅޭގޮތުން ސަރުކާރުގެ އެއްވެސް ބަހެއް ވަނީ ލިބޭ ގޮތް ނުވެފައެވެ.
ފުށިދިއްގަރުފަޅު ހިއްކުމުގެ މަޝްރޫއު ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާ ވަނީ ހަވާލުކޮށްފައެވެ. ސީއެމްސީ ކުންފުންޏަކީ ކުރީގެ ސަރުކާރުން ފެށި ހުޅުމާލޭ-3 ދިޔަނެރުފަޅު އަދި ތިލަފުށިން އިތުރު ބައެއް ހިއްކުން ހިމެނޭ މަޝްރޫއުގެ މަސައްކަތް ވެސް ކުރަމުންދާ ކުންފުންޏެވެ.
ފުށިދިއްގަރުފަޅު ހިއްކަން އާބަންކޯއާ ސީއެމްސީއާ ދެމެދު އެއްބަސްވުމެއްގައި ސޮއިކުރިއިރު، ކ. ގުޅީގެ އިހްތިސޯސުގެ ތެރޭގައި މިހާތަނަށް އޮތް ފުށިދިއްގަރުފަޅު އެ ރަށުގެ އިހްތިސޯސުން ވަނީ ވަކިކޮށްފައެވެ. އަދި ފުށިދިއްގަރުފަޅުން ފުރަތަމަ ހިއްކުމަށް ހަމަޖެހިފައިވަނީ 20 ހެކްޓަރުގެ ބިން ކަމަށް މައުލޫމާތު ލިބެއެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމަށް ހައްލު ގެނައުމުގެ ގޮތުން ހުޅުމާލެ ފޭސް-3 އަކުން 63 ހެކްޓަރުގެ ބިން ހިއްކުމަށް ވަނީ ނިންމާފައެވެ. އަދި ބިން ދޫކޮށްފައިވެއެވެ. ފޭސްތަކަކަށް ބަހާލައިގެން މިމަޝްރޫއު ކުރިއަށް ގެންދާއިރު، މިހާތަނަށް ވަނީ ސައިޓް- އޭގެ ބިން އެއްކޮށް ހިއްކާފައެވެ. އަދި ބީ ހިއްކުމުގެ މަސައްކަތް ފަށައި، މިހާރު ވަނީ ވަގުތީ ގޮތުން މަސައްކަތް ހުއްޓާލާފައެވެ. ހުޅުމާލެ ފޭސް 3 ހިއްކަން ފަށާފައިވަނީ 23 ސެޕްޓެމްބަރު 2023 ގައެވެ. އަލުން މިމަޝްރޫއު ފަށާނެ ވަކި ތާރީޚެއް ވެސް އާބަންކޯއިން ހާމަކޮށްފައިނުވެއެވެ.
ފުށިދިއްގަރުފަޅުގެ މަޝްރޫއާ ގުޅޭގޮތުން އާބަންކޯގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާގޮތް ނުވެފައެވެ.
