ވީއައިއޭގައި ތޮއްޖެހުން ބޮޑުވާތީ ސަމާލުވުމަށް އިލްތިމާސްކޮށްފި
މިދުވަސްވަރު ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތްކުރޭ
ވެލާނާ އިންޓަނޭޝަނަލް އެއާޕޯޓު
ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި މިދުވަސްވަރު ތޮއްޖެހުން ބޮޑުވާތީ، އެއާޕޯޓަށް ދާ މީހުން އިތުރަށް ސަމާލުވުމަށް އިލްތިމާސްކޮށްފިއެވެ.
އެމްއޭސީއެލުން ބުނީ އަބަދުވެސް ޑިސެންބަރު މަހު އެއާޕޯޓުގައި ބާރު ބޮޑު ކަމަށާއި، އެހެންކަމުން މިކަން ހައްލު ކުރުމަށްޓަކައި މީހުން ފުރުވުމަށް ވީހާވެސް މަދު ބަޔަކު އެއާޕޯޓަށް އައުމަށް އެދޭ ކަމަށެވެ. އެއްވެސް މައްސަލައެއް ނުޖެހި ރަނގަޅު ޚިދުމަތެއް އާއްމު ރައްޔިތުންނަށް ދޭން ބޭނުންވާތީ ހުރިހާ ފަރާތްތަކެއްގެ އެއްބާރުލުން ބޭނުންވާ ކަމަށް އެމްއޭސީއެލުން ބުނެއެވެ.
އެމްއޭސީއެލުން ބުނީ ފަސެންޖަރުންގެ ރައްކާތެރިކަން ކަށަވަރުކުރުމަށް އަބަދުވެސް މުވައްޒަފުން އެއާޕޯޓުގައި ހަރަކާތްތެރިވަމުންދާނެ ކަމަށެވެ. އަދި ފުރުމަށް ދާ ޕަސެންޖަރުން ވަގުތު އޮއްވާ އެއާޕޯޓަށް ދިއުމަށްވެސް ވަނީ އިލްތިމާސްކޮށްފައެވެ.
ކޮންމެ އަހަރެއްގެ ޑިސެންބަރު އަދި ޖެނުއަރީ މަހު ވީއައިއޭ ގައި ބާރުބޮޑުވެއެވެ. އެއީ ޑިސެންބަރު މަހު ސްކޫލުތައް ބަންދުވުމާއި، ރާއްޖޭގެ ޓޫރިޒަމްގެ އެންމެ ޕީކް ދުވަސްވަރަށްވާތީއެވެ. ގިނަ އަދަދެއްގެ ފަތުރުވެރިން ރާއްޖެއަށް އަންނައިރު، އުމްރާއަށް ދިއުމަށް ވެސްގިނަ އަދަދެއްގެ ބަޔަކު މިދުވަސްވަރު ފުރައެވެ.
