އިސްރާއީލުން ފްރާންސްގެ ޑިޕްލޮމެޓަކު މަރާލުމުން، ހަމަލާތައް މެދުކަނޑާލުމަށް ގޮވާލުމަށް ފްރާންސްގެ ދާޚިލީ ވަޒީރު އިސްރާއީލަށް!

ނިރުބަވެރި އިސްރާއީލޭ ކިޔުނު ދައުލަތުން ފަލަސްތީނުގެ ޣައްޒާއަށް ދެމުންދާ ޙަމަލާތަކުގެ ތެރޭގައި ފްރާންސްގެ ޑިޕްލޮމެޓިކް ސްޓާފެއް މަރުވުމާއި ގުޅިގެން، ހަނގުރާމަ މެދުކަނޑާލުމަށް ގޮވާލުމަށް އެގައުމުގެ ދާޚިލީ ވަޒީރު ކެތަރިން ކޮލޮންނާ އިސްރާއީލަށް ވަޑައިގަންނަވައިފިއެވެ.

އިސްރާއީލުން ފްރާންސްގެ ޑިޕްލޮމެޓަކު މަރާލާފައިވަނީ ޣައްޒާގެ ދެކުނުގައި ހުންނަ ޢާންމުން ދިރިއުޅޭ ގެއަކަށް ދިން ވަރުގަދަ ޙަމަލާތަކެއްގައެވެ.

އެއާއެކު ހޮނިހިރު ދުވަހު ފްރާންސްގެ ސަރުކާރުން އެކަން ކުށްވެރިކޮށްފައިވާއިރު، އެގައުމުގެ ބޮޑު ވަޒީރު އިސްރާއީލަށް ވަޑައިގެންނެވީ "ދެމިގެންދާގޮތަށް އަދި ވަގުތުން" ޙަމަލާތައް ހުއްޓާލުމަށް ގޮވާލެއްވުމަށް ކަމަށް ބޭރުގެ ނޫސްތަކުން ރިޕޯޓުކޮށްފައިވެއެވެ.

އަދި ހަމަލާތައް މެދުކަނޑާލުމާއިއެކު ދެ ފަރާތުން ހައްޔަރުކޮށްފައިވާ ހުރިހާ އަސީރުން މިނިވަންކޮށް، ޣައްޒާއަށް ފެނާއި ކާބޯތަކެތީގެ އިތުރުން އިންސާނީ އެހީ ވެއްދުމަށް ވެސް ފުރުސަތު ދެވެން ޖެހޭނެ ކަމަށް ފްރާންސުގެ ސަރުކާރުން ވަނީ ޑިމާންޑްކޮށްފައެވެ.

ކެތަރިންގެ މި ދަތުރުފުޅުގައި އިސްރާއީލުގެ ޚާރިޖީ ވަޒީރު އެލީ ކޯހެންއާ ތެލްއަވީވްގައި ބައްދަލުކުރެއްވުމަށް ހަމަޖެހިފައިވާއިރު، އިސްރާއީލުން ހިފާފައިވާ ހުޅަނގު އައްސޭރީގައި ފަލަސްޠީނުގެ ޚާރިޖީ ވަޒީރު ރިޔާދު އަލް މާލިކީއާ ބައްދަލުކުރެއްވުމަށް ވަނީ ހަމަޖެހިފައެވެ.

އިސްރާއީލުން ޣައްޒާގައި ހިންގަމުންދާ ނަސްލު ނައްތާލުމުގެ ގަތުލްއާންމުގައި މިހާތަނަށް 18,000 އަށް ވުރެ ގިނަ މީހުން މަރުވެފައިވާއިރު، އޭގެ ތެރެއިން ގިނައީ ކުޑަކުދިންނާ އަންހެނުންނެވެ. މީގެ އިތުރަށް ވެސް، އިތުރު އެތައް ހާސް މީހުން ވެއްޓިފައިވާ ގެތަކުގެ ދަށުގައި މަރުވެފައި ނުވަތަ ތާށިވެފައި ތިބޭނެ ކަމަށް ޣައްޒާގެ ހެލްތް މިނިސްޓްރީން ބުނެއެވެ.