ބްލޮކް ކުރަނީ ސަރުކާރުން ދީފައިވާ ލިސްޓެއްގައި ހިމެނޭ ސައިޓުތައް
ބަރަހަނާ މަންޒަރުތައް ފެންނަ ވެބްސައިޓުތައް ބްލޮކް ކުރަމުންދަނީ ސަރުކާރުގެ އެންގުމަށް ކޮމިއުނިކޭޝަންސް އޮތޯރިޓީ (ކޭމް) އިން
ބަރަހަނާ ވެބްސައިޓުތައް ބްލޮކް ކުރުން
ރާއްޖޭގައި ބަރަހަނާ ވެބްސައިޓުތައް ބްލޮކް ކުރަމުންދަނީ ސަރުކާރުން ދީފައިވާ ލިސްޓަކަށް ބަލައިގެންކަން "ރާއްޖެ އެމްވީ" އަށް ކަށަވަރުވެއްޖެއެވެ.
އިތުބާރު ހުރި މަސްދަރަކުން "ރާއްޖެ އެމްވީ" އަށް މައުލޫމާތު ދީފައިވާގޮތުގައި ބަރަހަނާ މަންޒަރުތައް ފެންނަ ވެބްސައިޓުތައް ބްލޮކް ކުރަމުންދަނީ ސަރުކާރުގެ އެންގުމަށް ކޮމިއުނިކޭޝަންސް އޮތޯރިޓީ (ކޭމް) އިންނެވެ. ނަމަވެސް ސަރުކާރުން ވެސް އަދި ކޭމް އިންވެސް ރަސްމީކޮށް މިކަމާ ގުޅިގެން އެއްޗެއް ބުނެފައެއް ނުވެއެވެ.
މައުލޫމާތު ލިބިފައިވާ ގޮތުގައި ސަރުކާރުން ވަނީ ބަރަހަނާ ވެބްސައިޓުތަކުގެ ލިސްޓެއް ކޭމްއަށް ދީފައެވެ. އެ ލިސްޓުގައި ހިމެނޭ ސައިޓުތައް ބްލޮކް ކުރަމުން ދާއިރު ބައެއް ސައިޓުތަކަށް އަދިވެސް ވަދެވޭކަމުގެ ކަންބޮޑުވުން ބައެއް ފަރާތްތަކުން ވަނީ ސޯޝަލް މީޑިއާގައި ފާޅުކޮށްފައެވެ.
މިއީ ރާއްޖޭގައި ބަރަހަނާ ވެބްސައިޓުތައް ބްލޮކް ކުރި ފުރަތަމަ ފަހަރެވެ. ސަރުކާރުގެ މި ނިންމުމާއެކު ރާއްޖޭގެ އެއްވެސް ނެޓްވޯކެއް މެދުވެރިކޮށް އެފަދަ ވެބްސައިޓުތަކަށް ދެން ނުވަދެވޭނެއެވެ.
ރާއްޖޭގައި ފަސޭހަ ކަމާއެކު ބަރަހަނާ ވެބްސައިޓުތަކަށް ވަދެވޭތީ ދީނީ އިލްމުވެރިންނާއި ތަފާތު އެކި ޖަމިއްޔާތަކުން ވެސް މީގެ ކުރިން ވަނީ ކަންބޮޑުވުން ފާޅުކޮށްފައެވެ.
