މިދިޔަ މަހު ޑެންގީހުން، އަރިދަފުސް ރޯގާ، އިންފްލުއެންޒާ އަދި ބޭރަށް ހިންގުން ޖެހިގެން ރިޕޯޓުކުރި އަދަދު ދަށަށް
15 ޑިސެމްބަރު 2023 | ހުކުރު 14:07ޑެންގީހުން ޖެހިގެން ނޮވެންބަރު މަހު 210 ކޭސް ރިޕޯޓު ކޮށްފައިވޭ
ނަރުހެއް މީހަކަށް ފަރުވާ ދެނީ
މިދިޔަ މަހު ޑެންގީހުން، އަރިދަފުސް ރޯގާ، އިންފްލުއެންޒާ އަދި ބޭރަށް ހިންގުން ޖެހިގެން ރިޕޯޓުކޮށްފައިވާ އަދަދު ދަށް ވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ބުނީ މިއަހަރުގެ އޮކްޓޫބަރު މަހާ އަޅާބަލާއިރު ނޮވެންބަރު މަހު ޑެންގީހުން ޖެހިގެން ރިޕޯރޓް ކުރެވުނު އަދަދު ދަށަށް ގޮސްފައިވާ ކަމަށެވެ. މިއަހަރުގެ އޮކްޓޫބަރު މަހު 306 ކޭސް، ނޮވެންބަރު މަހު 210 ކޭސް ރިޕޯޓު ކޮށްފައިވާ ކަމަށް އެޗްޕީއޭއިން ބުނެއެވެ.
އަރިދަފުސް ރޯގާއާ ގުޅޭގޮތުން އެޗްޕީއޭއިން ބުނީ އޮކްޓޫބަރު 2023 ގައި 35154 ކޭސް، ނޮވެންބަރު މަހު 30410 ކޭސް ރިޕޯޓުކޮށްފައިވާ ކަމަށެވެ.
އެޗްޕީއޭއިން ބުނީ މިއަހަރުގެ އޮކްޓޫބަރު މަހާ އަޅާބަލާއިރު ނޮވެންބަރު މަހު އިންފްލުއެންޒާގެ އަލާމާތްތައް ހުރެގެން ޓެސްޓް ކުރެވުނު އަދަދު ވެސް ދަށަށް ގޮސްފައިވާ ކަމަށެވެ. މިއަހަރު މިހާތަނަށް ޓެސްޓް ކުރެވުނު 2145 ސާމްޕަލްގެ ތެރެއިން 389 ސާމްޕަލްވަނީ ޕޮޒިޓިވް ވެފައިވާ ކަމަށް އެޗްޕީއޭއިން ބުނެއެވެ.
މީގެ އިތުރުން އެޗްޕީއޭއިން ބުނީ މިއަހަރުގެ އޮކްޓޫބަރު މަހާ އަޅާބަލާއިރު ނޮވެންބަރު މަހު ބޭރަށް ހިންގުން ޖެހިގެން ރިޕޯޓް ކުރެވުނު އަދަދު ދަށަށް ގޮސްފައިވާ ކަމަށެވެ. އޮކްޓޫބަރު 2023 ގައި 9743 ކޭސް، ނޮވެންބަރު މަހު 5063 ކޭސް ރިޕޯޓުކޮށްފައިވާ ކަމަށް އެޗްޕީއޭއިން ބުނެއެވެ.
އެޗްޕީއޭއިން ބުނީ ބަލި ފެތުރޭ މިންވަރު ދަށްވި ނަމަވެސް ޑެންގީހުން ފަދަ މަދިރީގެ ޒަރީއާއިން ފެތުރޭ ބަލިތައް މަދުކުރުމަށާއި ބަލިތަކުން ރައްކާތެރިވުމަށް ސަމާލުކަން ދިނުމަކީ މުހިއްމު ކަމެއް ކަމަށެވެ. އަދި އަރިދަފުސްރޯގާ، ބޭރަށް ހިންގުން ފަދަ ބަލިތަކުން ރައްކާތެރިވުމުގެ ފިޔަވަޅު އެޅުމަށް އެޗްޕީއޭއިން ވަނީ އިލްތިމާސްކޮށްފައެވެ.
