ގިނަ އަދަދެއްގެ މަސްތުވާތަކެއްޗާއެކު ހައްޔަރުކުރި މީހަކު ބަންދުކޮށްފި
ބަންދުގައި ބަހައްޓަން އަމުުރުކޮށްފައިވަނީ ކަސްޓޯޑިއަލް ޖަލެއްގައި
ކްރިމިނަލް ކޯޓަށް ބަންދުގެ މުއްދަތު ޖެހުމަށް މީހަކު ގެންދަނީ
ގިނަ އަދަދެއްގެ މަސްތުވާތަކެއްޗާއެކު ހައްޔަރުކުރި މީހަކު ބަންދުކޮށްފިއެވެ.
މި މައްސަލައިގައި ބަންދުކޮށްފައިވަނީ ހއ. މުރައިދޫ/ރޯޒަރީ، ހަމްދޫން ހަބީބޫ (29އ) އެވެ. ފުލުހުން އެދިގެން ކްރިމިނަލް ކޯޓުން ނެރުނު މި އަމުރުގައި ވަނީ މީނާ 15 ދުވަހަށް ބަންދުކުރުމަށެވެ.
ބަންދުގައި ބަހައްޓަން އަމުުރުކޮށްފައިވަނީ ކަސްޓޯޑިއަލް ޖަލެއްގައެވެ. އޭނާ ބަންދުގައި ބަހައްޓަން އަމުރުކުރި ސަބަބުގައި ބުނެފައިވަނީ އޭނާގެ މައްޗަށް ތުހުމަތުކޮށްފައިވާ ކުށް އޭނާ ކުރިކަމަށް ތުހުމަތުކުރެވޭ މިންވަރުގެ ހެކި ގަރީނާ ހުށަހަޅާފައިވުމާއި، ސީނަށް ދިޔަ ފުލުހުންގެ ބަޔާންވެސް ހުށަހަޅާފައިވެއެވެ. އަދި އޭނާގެ ހަށިގަނޑުންނާއި، އޭނާއާއި ގުޅުން ހުރި ތަންތަން ބަލާފާސްކުރި އިރު، ގިނަ އަދަދެއްގެ މަސްތުވާތަކެތި ފެނިފައިވާ ކަމަށެވެ. މީގެ އިތުރުން މަސްތުވާތަކެތި ބަންދުކުރާ އާލާތްތައް ފެނިފައިވާ ކަމަށް ވެސް ބަންދު އަމުރުގައި ބުނެފައިވެއެވެ.
ބަންދުގައި ބަހައްޓަންޖެހޭ ހާލަތުގެ ގޮތުގައި ބުނެފައިވަނީ، ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 49 ވަނަ މާއްދާއާއި، ޖިނާއީ އިޖުރާއަތުގެ ގާނޫނުގެ 59 ވަނަ މާއްދާއާއި، 60 ވަނަ މާއްދާގެ ދަށުން މުޖްތަމައުގެ ސަލާމަތާއި ރައްކާތެރިކަމަށްޓަކައި ކަމަށް ބުނެފައިވެއެވެ.
މީގެ އިތުރުން ޝަރީއަތްކުރުމާބެހޭ ޖިޏާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ) ގެ 3 ވަނަ ނަންބަރާއި، 4 ވަނަ ނަންބަރުގައި ބަޔާންކުރާ ކަންކަން ފުރިހަމަވާކަމަށް ބެލެވުން ކަމަށް ބަންދުގައި ބަހައްޓަންޖެހޭ ހާލަތް އޮތްކަމަށް ދެކޭ ސަބަބުގެ ގޮތުގައި ވަނީ ބަޔާންކޮށްފައެވެ.
ބަންދު އަޑުއެހުމުގައި އޭނާ ވަނީ މަސްތުވާތަކެތި ފެނުނު އެޕާޓްމަންޓަކީ އޭނާ ކުރިން ދިރިއުޅުނު ނަމަވެސް މިހާރު ދިރިއުޅޭ ތަނެއް ނޫންކަމަށާއި، އެތަނުގެ އެގްރީމަންޓުގެ މުއްދަތުވެސް ހަމަވެފައިވާ ކަމަށެވެ.
15 ދުވަހުގެ ބަންދުގެ މުއްދަތު ކްރިމިނަލް ކޯޓުން ޖަހާފައިވާ އިރު، އޭނާގެ ބަންދުގެ މުއްދަތު ހަމަވާނީ މި މަހުގެ 19 ވަނަ ދުވަހުއެވެ.
