މިދިޔަ އަހަރުގެ އޯގަސްޓު މަހުގެ ހަވަނަ ދުވަހު މާލޭގެ އެޕާޓްމެންޓެއް ތެރޭގައި އަނިޔާވެރިގޮތަކަށް މަރާލާފައި އޮއްވައި ފެނުނު ޝިއާއު މުހައްމަދު ސައީދުގެ މަރުގެ ތުހުމަތުކުރެވޭ އަލީ ޝާހިލްގެ ގައިގައި، ދައުވާއަށް ޖަވާބުދާރީ ނުވެވޭފަދަ ނުކުޅެދުންތެރިކަމެއް ނެތްކަމަށް ކްރިމިނަލް ކޯޓުން ބުނެފިއެވެ.
ބުރާސްފަތި ދުވަހުގެ އަޑުއެހުން ކުރިއަށް ގެންގޮސްފައިވަނީ ސިއްރުކޮށްގެންނެވެ. މިއަޑުއެހުމުގައި ވެސް ޝާހިލް ވާހަކަދައްކާފައެއް ނުވެއެވެ.
ކްރިމިނަލް ކޯޓުން ބުނީ ޝާހިލްގެ ކިބައިގައި ދައުވާއަށް ޖަވާބުދާރީ ނުވެވޭފަދަ ނުކުޅެދުންތެރިކަމެއް ހުރިކަމަށް ނުބެލެވޭ ކަމަށެވެ. ހެކި ރައްކާތެރިކުރުމުގެ އަމުރު ނެރިފައިވާއިރު، އަމުރުގެ ދަށުން ކޯޓުގައި އެކަނި ބެލޭގޮތަށް ކަނޑައެޅޭ ލިޔުންތައް ބަލަން ޝާހިލަށް އެ ފުރުސަތު އޮތްކަން އަންގާފައިވާ ކަމަށެވެ.
ދެން އޮންނާނީ ޝާހިލް ލިޔުންތައް ދިރާސާކޮށްފައި ދައުވާއަށް ޖަވާބު ދާރީވުމެވެ.
މީގެ އިތުރުން އެޓަރނީ ޖެނަރަލްގެ އޮފީހުން، ދިފާއީ ވަކީލުން ހަމަޖެއްސުމަށް ވެސް އެއްބާރުލުން ނުދޭތީ، ވަކީލަކު ހަމަޖައްސައި ނުދިނުމަށް ވަނީ ނިންމާފައެވެ.
ހ. ޝީރީންވިލާގޭގެ ނުވަވަނަ ބުރީގެ އެޕާޓްމަންޓެއްގައި އަނިޔާވެރި ގޮތަކަށް މަރާލާފައި އޮއްވައި ޝިއާއު ފެނުނުއިރު، ހަމަ އެރޭ ކުށުގެ ވެށިން ހައްޔަރުކުރީ ޝާހިލެވެ. އޭނާގެ މައްޗަށް ފަސް ދައުވާއެއް އުފުލާފައިވެއެވެ.
އެއީ، ގަސްތުގައި މީހަކު މެރުމުގެ ކުށުގެ ދައުވާއާއި އޮރިޔާން ކާޑު ގެންގުޅުމާއި އަދި ކެނެބިސް ބޭނުންކުރުމުގެ ކުށުގެ ދައުވާއެވެ. އާއިލާއަށް އިހުތިރާމްކުރުމަށް ކަމަށް ބުނެ، ބާކީ ދެ ދައުވާގެ ތަފްސީލެއް ޕީޖީ އޮފީހުން ހާމައެއް ނުކުރެއެވެ.
ޝިއާއުގެ މައްސަލައަކީ ގިނަ ދުވަސްތަކެއް ވެފައިވާ މައްސަލައެކެވެ. އެ މައްސަލަ، ދައުވާކުރުމަށް ފޮނުވަންވެސް ގިނަ ދުވަސްތަކެއް ނެގިއެވެ. ފުލުހުން އޭރު ބުނީ އެ މައްސަލައިގެ ތަހުގީގު ލަސްވީ ޝިއާއު މަރާލި "މޯޓިވް" ނުހޯދިގެން ކަމަށެވެ. ޝިއާއުގެ ހަށިގަނޑުގެ ޕޯސްޓްމޯޓަމް ރިޕޯޓާ ހަވާލާދީ ފުލުހުން މީގެ ކުރިން ބުނެފައިވަނީ، އޭނާ މަރުވެފައިވަނީ ހަށިގަނޑަށް ގަސްތުގައި ދީފައި ހުރި އަނިޔާތަކެއްގެ ސަބަބުން ކަމަށެވެ. އަދި މަރުވި ފަހުންވެސް ހަށިގަނޑަށް ވަރަށް ގިނަ އަނިޔާތަކެއް ދީފައިވާ ކަމަށް ވެސް ފުލުހުން އޭރު ވަނީ ބުނެފައެވެ.
ޝިއާއުގެ މަރަކީ ފަހުގެ ތާރީޚެއްގައި ރާއްޖޭގައި ހިނގި އެންމެ އަނިޔާވެރި މަރެވެ. އޭނާ މަރާލާފައި އޮއްވައި ފެނުނުއިރު އޮތީ ބޮލާއި އަތާއި ފައިވެސް ބުރިކޮށްލާފައެވެ.
