އިސްރާއީލާ ދެކޮޅުވާ ގައުމުތައް އިތުރުވަނީ

އިސްރާއީލުން ޣައްޒާއަށް ދެމުންދާ ހަމަލާތައް ވަގުތުން ހުއްޓާލުމަށް ގޮވާލާ އދ ގެ އާންމު މަޖިލީހުގައި އަންގާރަ ދުވަހުގެ ރޭ ނެގި ވޯޓުން ހާމަވި އެއްކަމަކީ މިހަނގުރާމައިގައި އިސްރާއީލާ ދެކޮޅުވާ ގައުމުތައް އިތުރުވަމުން އަންނަކަމެވެ.

193 ގައުމު ހިމެނޭ އދ ގެ އާންމު މަޖިލީހުގައި ނެގި ވޯޓުގައި 153 ގައުމަކުން ވަނީ މިސްރުން ހުށަހެޅި ގަރާރަށް ތާއީދުކޮށްފައެވެ. ގަރާރާ ދެކޮޅަށް 10 ގައުމުން ވޯޓުދިން އިރު ވަކިކޮޅަކަށް ވޯޓު ނުދޭ ތިބީ 23 ގައުމެވެ.

އަރަބި ގައުމުތަކުން ސްޕޮންސަރކޮށްގެން އޮކްޓޯބަރ މަހުގެ 27 ވަނަ ދުވަހުވަނީ އދ ގެ އާންމު މަޖިލީހުގައި ހަމަލާތައް މެދުކަނޑާލާ އިންސާނީ އެހީތެރިކަން ފޯރުކޮށްދިނުމަށް ގޮވާލާ ގަރާރެއް ފާސްކޮށްފައެވެ. އެ ގަރާރު ފާސްވެފައިވަނީ 121 ގައުމުން އާނ ބަސް ބުނެގެންނެވެ. އެފަހަރު ގަރާރާ ދެކޮޅަށް 14 ގައުމަކުން ވޯޓުދިންއިރު ވަކިކޮޅަކަށް ވޯޓު ނުދޭ 44 ގައުމު އެފަހަރު ތިއްބެވެ.

އޮކްޓޯބަރ މަހުގެ 27 ވަނަ ދުވަހު ނެގި ވޯޓަކީ ހަމަލާތައް ދޭންފެށިތާ 20 ދުވަސް ފަހުން ނެގި ވޯޓެކެވެ. ނަމަވެސް ހަމަލާތައް ދޭން ފެށިތާ ދެ މަސް ދުވަސްފަހުން ނެގި ވޯޓާއެކު ހާމަވަމުންދިޔައީ އިސްރާއީލުން ޣައްޒާއަށް މެދުކެނޑިމެއްނެތި ދެމުންދާ ހަމަލާތަކާއި ޣައްޒާގެ ތެރޭގައި އިސްރާއީލުން ހިންގަމުން އަންނަ ލާއިންސާނީ ގަތުލު އާންމުތަކަށް ގައުމުތަކުން ނޫނެކޭ ބުނާ މިންވަރު އިތުރުވެފައިވާކަމެވެ.

ހަމަލާތައް ހުއްޓާލުމަށް މިފަހަރު ތާއީދުކުރި ގައުމުތަކުގެ ތެރޭގައި ކެނެޑާ، ކްރޮއޭޝިޔާ، ކެމްބޯޑިއާ، ޑެންމާކު، އައިސްލޭންޑު، އިންޑިޔާ، ފިލިޕީންސް، ޕޮލެންޑް ފާހަގަކޮށްލެވެއެވެ.

އިސްރާއީލުން ޣައްޒާގައި ހިންގަމުން އަންނަ ގަތުލު އާންމުގައި މިހާތަނަށް ފުރާނަ ގެއްލިގެންދިޔަ މީހުންގެ އަދަދު 18،000ން މައްޗަށް ވަނީ އަރާފައެވެ. އަނެއްކޮޅުން ހަމަލާތައް ދިނުން ހުއްޓާލާ ގައުމުތަކުގައި މުޒާހަރާކުރާ މިންވަރު އަންނަނީ އިތުރުވަމުންނެވެ.