އިސްރާއީލާ އެކު ފަލަސްތީނުން މައްސާލާގައި ނެގޯޝިއޭޓް ކުރުމަކީ "މައާފު ނުކުރެވޭނެ ގޯހެއް" ކަމަށް އިރާނުގެ ރޫހީ ލީޑަރު އާޔަތުﷲ އަލީ ހާމަނާއީ ބުދަ ދުވަހު ވިދާޅުވެއްޖެއެވެ.
އިރާނުގެ ރޫހީ ލީޑަރު އާޔަތުﷲ އަލީ ހާމަނާއީގެ ރަސްމީ ވެބްސައިޓްގައި ބުދަ ދުވަހު އާންމު ކުރި ބަޔާނެއްގައި އެމަނިކުފާނު ވިދާޅުވީ "ދޮގުހަދާ، މަކަރު ހަދާ އިސްރާއީލާ އެކު ނެގޯޝިއޭޝަނަކަށް ދިއުން ނުވަތަ އެފަދަ އެއްވެސް ކަމަކަށް މަގުފަހިވާނެ ކަމެއް ކުރުމަކީ މައާފު ނުކުރެވޭނެ ގޯހެއް" ކަމަށާއި އަދި ފަލަސްތީނު ރައްޔިތުންނަށް ލިބެން އޮތް ނަސްރު ނުވަތަ ކާމިޔާބީ ފަހަތަށް ދާނެ ކަމެއް ކަމަށެެވެ.
ވަކި މުސްލިމު ގައުމެއްގެ ނަން ބަޔާންނުކޮށް ހާމަނާއީގެ ބަޔާނުގައި އިތުރަށް އެމަނިކުފާނު ވިދާޅުވީ ފަލަސްތީނު ރައްޔިތުން އިސްރާއީލުގެ އަނިޔާވެރިކަމާ ދެކޮޅަށް "ދެކޮޅުހެދުމުގެ ގޮތުން ހިންގާ ހަރަކާތްތަކަށް" އެހީވުމަކީ ހުރިހާ މުސްލިމުންގެ ޒިންމާއެއް ކަމަށާއި އަދި ފަލަސްތީނުގެ ހަމާސް ޖަމާއަތަށް އިރާނުން ތާއިދު ކުރުން މަތީ ދެމިތިބޭނެ ކަމަށެވެ.
ހާމަނާއީ ފަލަސްތީނުގެ ރައްޔިތުންނަށް އޮތް ތާއިދު ހާމަކުރެއްވި އިރު ދާދިފަހުން ސައުދީގެ ވަލީއަހުދު އަދި ސައުދީ ރަސްގެފާނުގެ ދަރިކަލުން އަދި ތަޚުތައް އަރާވަޑައިގަންނަވަން ތައްޔާރަށް ހުންނެވި މުހައްމަދު ބިން ސަލްމާން ވިދާޅުވެފައި ވަނީ އިސްރާއީލުގެ ރައްޔިތުންނަށް ސުލްހަވެރިކަމާ އެކު އެބައިމީހުންގެ ބިމުގައި ދިރިއުޅުމުގެ ހައްގު އޮންނާނެ ކަަމަށެވެ. އެމެރިކާގެ މަޖައްލާއެއް ކަމަށްވާ "ދި އެޓްލާންޓިކް މެގަޒިން" އަށް އުމުރުން 32 އަހަރުގެ މުހައްމަދު ވިދާޅުވީ "ކޮންމެ ބަޔަކަށް ވެސް އެ ބަޔަކަށް ލިބިފައިވާ ގައުމެއްގައި ހަމަޖެހިގެން އުޅުމުގެ ހައްގު އޮންނަންވާނެ" ކަމަށެވެ. މީގެ އިތުރުން މުހައްމަދު ބިން ސަލްމާން ވިދާޅުވެފައި ވަނީ "ގުދުސްގައި ހުރި މުސްލިމުންގެ މުގައްދަސް މިސްކިތާއި އަދި ފަލަސްތީނުގެ ރައްޔިތުންގެ ހައްގުތަކާ މެދު ކަންބޮޑުވުން އެބަ އޮތް ކަމަށާއި އެކަމާ މެދު ދެބަސްވުމެއް ނެތް،" ކަމަށެވެ.
ސައުދީ ވަލީއަހުދުގެ ވާހަކަފުޅާ ގުޅިގެން ސައުދީ އަރަބިއްޔާގެ ރަސްގެފާނު ސަލްމާން އަބްދުލް އަޒީޒް ވިދާޅުވެފައި ވަނީ ފަލަސްތީނުގެ އަމިއްލަ ދައުލަތަކަށް ތާއީދު ކުރައްވާ ކަމަށާއި އަދި ފަލަސްތީނުގެ ރައްޔިތުންނަށް ލިބެން ޖެހޭ ހައްގުތައް ލިބިދޭން ޖެހޭ ކަމަށެވެ. ފަލަސްތީނުގެ ރައްޔިތުންނަށް ސައުދީ ރަސްގެފާނު ކުރައްވާ ތާއިދު ހާމަކުރައްވަމުން، ސައުދީ ދައުލަތުގެ ރަސްމީ ނޫސް އެޖެންސީ އެސްޕީއޭ އިން އާންމުކުރި ސައުދީ ރަސްގެފާނުގެ ބަޔާނެއްގައި ވަނީ "ސައުދީ ރަސްގެފާނު ހުންނެވީ ދެގޮތެއް ނުވެ ފަލަސްތީނުގެ ރައްޔިތުންނާ އެކީގައި" ކަމަށެވެ. އަދި "ފަލަސްތީނުގެ ރައްޔިތުންނަށް މިނިވަން ދައުލަތެއް ލިބެން ޖެހޭނެ" ކަމަށާއި އަދި "ފަލަސްތީނުގެ ވެރިރަށަކީ ޖެރޫސަލަމް އަށް ވާން ޖެހޭ" ކަމަށެވެ.
ސައުދީ އަރަބިއްޔާއަކީ ރަސްމީ ގޮތުން، އިސްރާއީލަކީ ދައުލަތެއްގެ ގޮތުގައި ބަލައިގަންނަ ގައުމެއް ނޫނެވެ. އެހެންނަމަވެސް ސައުދީގެ ވަލީއަހުދު މުހައްމަދު ބިން ސަލްމާން އިސްރާއީލާ ބެހޭ ގޮތުން ވިދާޅުވެފައިވާ ބަސްފުޅުން ދެގައުމުގެ ގުޅުން ރަނގަޅުވަމުން އަންނަ ކަމަށް ބައެއް ފަރާތްތަކުން ދެކެއެވެ.
