ސިވިލް ސަރވިސް މުވައްޒަފެއްގެ މެސެޖް: "މެޑަމްކަން ލިބުމަކީ ގަވާއިދުން ހާއްސަ ޝަރުތެއް ކަނޑައަޅަންޖެހޭ ކަމެއް ނޫން"

"މެޑަމްކަން ލިބުމަކީ ގަވާއިދުން ހާއްސަ ޝަރުތެއް ކަނޑައަޅަންޖެހޭ ކަމެއް ނޫން" ކަމަށް ބުނެ ކަންބޮޑުވުންތައް ފާޅުކޮށް، ސިވިލް ސަރވިސްގެ މުވައްޒަފުން މަޖިލީހުގެ މެންބަރުންނަށް މެސެޖްކުރަމުންދާ ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

ސާޖިދާއަށް ވޭޖް އުސޫލުން ހެލްތު މިނިސްޓްރީގައި ހުންނެވި މަގާމު ދިން މައްސަލައިގައި ހުށަހެޅި ކުއްލި މައްސަލައަށް ބަހުސް ކުރައްވަމުން މެންބަރު ރޮޒައިނާ ވިދާޅުވީ މެންބަރުންގެ ޒިންމާ މެންބަރުން ނުއުފުލާކަމުގައިވާނަމަ، ރައްޔިތުން ދެކޭ ހިސާބަށް މި މައްސަލަ މިހާރު ގޮސްފައިވާ ކަމަށެވެ. އަދި މި މައްސަލަ ފުރަތަމަ އައި ހިސާބުން ސިވިލް ސަރވިސް ކޮމިޝަންގެ ރައީސާއި ނައިބްރައީސް އަށް، ރައްޔިތުންގެ ކަންބޮޑުވުން އޮތްކަމަށް ވިދާޅުވެ މެސެޖްކުރެއްވި ކަމަށެވެ. އަދި މެންބަރުން މިކަމުގައި ގަވާއިދާ އެއްގޮތަށް މަސައްކަތް ކުރެއްވުމަށް ދެންނެވި ކަމަށް ވެސް ރޮޒައިނާ ވިދާޅުވިއެވެ.

ރޮޒައިނާ ވިދާޅުވީ ކޮމިޓީގައި ވެސް މި މައްސަލަ ބަލަމުން އަންނަ ކަމަށާއި ސިވިލް ސަރވިސް ގަވާއިދުގެ 197 ވަނަ މާއްދާގެ (ހ) ގެ 2 ގައި އޮތް މަފްހޫމަކީ ވަރަށް ސާފު މަފްހޫމެއް ކަމަށެވެ. އެއީ ދައުލަތުގެ މުވައްޒަފެއް ނުވަތަ ސިވިލް ސަރވިސްގެ މުވައްޒަފެއް ރާއްޖެއިން ބޭރުގައި މަސައްކަތް ކުރަން ދާންޖެހުމުން ދޭ ނޯޕޭލީވްގެ ވާހަކަ ކަމަށެވެ.

ރޮޒައިނާ ވިދާޅުވީ ދައުލަތުގެ ވެރިޔާގެ ރާއްޖޭގައި މަސައްކަތްކުރާ އިރު ނޯޕޭލީވް ހަމަޖެއްސޭނެކަމަށް ދެކެވަޑައިނުގަންނަވާ ކަމަށެވެ. ރައީސް އަދި ނައިބްރައީސްގެ މުސާރައާއި އެހެނިހެން އިނާޔަތްތައް ކަނޑައަޅާ ގާނޫނުގެ 7 ވަނަ މާއްދާގައި، ރައީސްގެ އަނބިކަނބަލުންނަކީ ރައީސްގެ މުސާރައިގެ ތިންބައިކުޅަ އެއްބައި ލިބިވަޑައިގަންނަވާ، ދައުލަތުން މުސާރަދޭ ފަރާތެއް ކަމަށެވެ.

އަދި ސިވިލް ސަރވިސްގައި ނުހިމެނޭ ފަރާތްތައް ގާނޫނުގައި ކަނޑައަޅާފައި އޮންނަ އިރުގައި، އޭގައި ރައީސް އައްޔަންކޮށް ވަކިކުރާ ފަރާތްތައް ޖަހާފައިވާ ކަމަށެވެ. ނަމަވެސް އޭގައި ރައީސްއާއި ނައިބްރައީސްގެ އަނިބަކަނބަލުން ލިޔެފައި ނޯންނަ ކަމަށެވެ. އަދި ރައީސުލްޖުމްހޫރިއްޔާ އަދި ރައީސުލްޖުމްހުރިއްޔާގެ އަނބިކަނބަލުން ސިވިލް ސަރވިސްގައި މަސައްކަތް ކޮށްފާނެ ކަމީ އަންދާޒާކުރެވިފައިވާ ކަމެއް ނޫން ކަމަށެވެ. މިއީ ގާނޫނު ހަދާއިރު އަންދާޒާ ކުރާ ކަންކަން ނޫން ކަމަށާއި އެފަދަ ހާލަތެއް ކުރިން މެދުވެރިވެފައި ނުވާ ކަމަށް މެންބަރު ރޮޒައިނާ ވިދާޅުވިއެވެ.

އެހެންކަމުން ކޮމިޓީން ގާނޫނަށް ބަދަލު ގެނެސް ރައީސް އަދި ނައިބްރައީސްގެ އަނބި/ފިރިކަލުންނަކީ ސިވިލްސަރވިސްގައި ހިމެނޭނެ ފަރާތެއް ނޫންކަމަށް ހިމަނަން ނިންމަވާފައިވާ ކަމަށް މެންބަރު ރޮޒައިނާ ވިދާޅުވިއެވެ.