ސާޖިދާ އެ ވަޑައިގަންނަވަނީ ހެލްތު މިނިސްޓަރަށް ނުފޫޒު ފޯރުވަން - މެންބަރު ޔައުގޫބް
މިހާރުގެ ހެލްތު މިނިސްޓަރު ޑރ. އަބްދުﷲ ޚަލީލް ވެސް ގުޅުއްވާ ކަންބޮޑުވުން ފާޅުކުރައްވާފައިވޭ
ދާންދޫ ދާއިރާގެ މެންބަރު ޔައުގޫބް އަބްދުﷲ
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ހެލްތު މިނިސްޓްރީއަށް ވަޒީފައަށް އެ ވަޑައިގަންނަވަނީ ހެލްތު މިނިސްޓަރަށް ނުފޫޒު ފޯރުވަން ކަމަށާއި، އެ ކަމަކީ މިނިސްޓަރުގެ މައްޗަށް ސުޕަރ މިނިސްޓަރެއް އައުން ކަމަށް ދާންދޫ ދާއިރާގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.
ސާޖިދާއަށް ވޭޖް އުސޫލުން ހެލްތު މިނިސްޓްރީގައި ހުންނެވި މަގާމު ދިން މައްސަލައިގައި ހުށަހެޅި ކުއްލި މައްސަލައަށް ބަހުސް ކުރައްވަމުން މެންބަރު ޔައުގޫބް ވިދާޅުވީ މިއީ އާދައިގެ މައްސަލައެއް ނޫން ކަމަށާއި މިއުޅެނީ ރައީސުލްޖުމްހުރިއްޔާގެ އަނބިކަނބަލުން ވަޒީފާއަކަށް ނަގައިގެން ކަމަށެވެ. މި މައްސަލަ ފެށުނު ހިސާބުން ވެސް މެންބަރުންނަށް ގުޅުއްވި ބޭފުޅުންގެ ތެރޭގައި މިހާރުގެ ހެލްތު މިނިސްޓަރު ޑރ. އަބްދުﷲ ޚަލީލް ވެސް ގުޅުއްވާ ހެލްތު މިނިސްޓަރުގެ މައްޗަށް އިތުރު ސުޕަރ މިނިސްޓަރެއް ލާތީ ކަންބޮޑުވުން ފާޅުކުރައްވާފައިވާ ކަމަށް މެންބަރު ޔައުގޫބު ވިދާޅުވިއެވެ.
މެންބަރު ޔައުގޫބު ވިދާޅުވީ އެތަނުގެ އެންމެ އާދައިގެ ވަޒީފާގައި ރައީސުލްޖުމްހޫރިއްޔާގެ އަނބިކަނބަލުން ވަޑައިގަތަސް، އެންމެންނަށް ސާފުކޮށް އެނގޭ ކަމަަކީ އެ ވަޑައިގަންނަވަނީ އެތަނުގައި ހުރި އެންމެ އިސްވެރިއަކަށް ނުފޫޒުފޯރުވަން ކަމަށެވެ. އޭގެ އަލިގަދަ ދަލީލަކީ ހެލްތު މިނިސްޓްރީގެ ޕާމަނަންޓް ސެކްރެޓަރީ ވެސް ސިވިލް ސަރވިސް ކޮމިޝަންގެ މެންބަރުން ވެސް އަދި ހެލްތު މިނިސްޓަރު ވެސް މިކަމާއި ރުހިވަޑައިނުގެންނެވުން ކަމުގައި އޭނާ ވިދާޅުވިއެވެ.
ސިވިލް ސަރވިސް ކޮމިޝަނުން ސާޖިދާއަށް ވަޒީފާ ހަވާލުކުރި އިރު، ސިވިލް ސަރވިސް ގަވާއިދުގެ 197 ވަނަ މާއްދާގެ (ހ) ގެ 2 ނަންބަރުގެ ދަށުން މި މަގާމު ހަމަޖައްސާފައިވާ ކަމަށް މެންބަރު ޔައުގޫބް ވިދާޅުވިއެވެ. މެންބަރު ވިދާޅުވީ ކޮމިޓީއަށް ގަބޫލުކުރެއްވޭ ގޮތުގައި އެއީ ވަޒީފާ ހަމަޖެއްސޭނެ މާއްދާއެއް ނޫން ކަމަށެވެ.
މެންބަރު ވިދާޅުވީ ކޮމިޝަންގެ ބައްދަލުވުމުގައި ސިވިލް ސަރވިސް ކޮމިޝަންގެ ރައީސް ވިދާޅުވީ އެ މަގާމުގައި މިއަދާ ހަމައަށް ހުންނެވިއިރު، ލިބުނު ތަމްރީނާއި އަދި އެނގިފައި ހުރި އެއްޗެއް އެނގިފައިހުރީ ހަމައެކަނި އެ ކަމަނާއަށް ކަމަށެވެ. އެ ސެކްޝަންގެ އިސްވެރިއަކަށް ހުންނަވާ އެ ހުރިހާ ދުވަހު އެތަނަށް އައި ލިބުނު ހުރިހާ ތަމްރީނުތަކަށް ރާއްޖެއިން ބޭރަށް ވަޑައިގެން އެކަންކަމުގެ އިތުރު ފުރުސަތާއި ތަމްރީނު ހޯއްދަވާފައިވަނީ ވެސް އެކަމަނާ ކަމަށް ސިވިލް ސަރވިސްގެ ރައީސް ވިދާޅުވިކަމަށް މެންބަރު ޔައުގޫބް ވިދާޅުވިއެވެ.
ޔައުގޫބް ވިދާޅުވީ އެކަމުން ހާމަކޮށްދެނީ ނުފޫޒު ބޭނުންކޮށްފައި އޮތް ކަންކަމަށާއި، މިއަދު ދެން އުފެދޭ ސުވާލަކީ ރައީސްގެ އަނބިކަނބަލުން ހެލްތު މިނިސްޓްރީއަށް ދެން ވަޑައިގެންފިނަމަ، ހެލްތު މިނިސްޓްރީގެ ވެރިއަކީ ހެލްތު މިނިސްޓަރުތޯ ނުވަތަ ސިވިލް ސަރވިސްގެ މުވައްޒަފުންގެ ތެެރެއިން އެންމެ އިސްވެރިއަކީ ޕަރަމަނަންޓް ސެކްރެޓަރީތޯ ނުވަތަ ރައީސްގެ އަނބިކަނބަލުންތޯ، މި ސުވާލު އުފެދޭ ކަމަށެވެ. އަދި އެތަނުގެ މާހައުލު ބިރުވެރި މާހައުލަކަށް ބަދަލުވެގެންދާނެ ކަމަށާއި، މިއީ ސިވިލް ސަރވިސްގައި މަސައްކަތް ކުރަމުންދާ މުވައްޒަފުންގެ ހައްގުގައި ތެދުވެ، އިސްލާހުކޮށް ހުއްޓުވަން ޖެހޭ ކަމެއް ކަމަށް މެންބަރު ޔައުގޫބް ވިދާޅުވިއެވެ.
