އިޓަލީ ޤައުމީ ފުޓުބޯޅަ ޓީމުގެ ތަޖުރިބާކާރު ޑިފެންޑަރު ޖިއޯޖިއޯ ކިއެލީނީ ފުޓުބޯޅަ ކުޅުން ހުއްޓާލަން ނިންމައިފިއެވެ.

ފުޓުބޯޅަ ކުޅުން ހުއްޓާލަން ނިންމިއިރު، ކިއެލީނީގެ އުމުރަކީ 39 އަހަރެވެ. ފުޓުބޯޅަ ކުޅުން ހުއްޓާލަން ނިންމައި، ކިއެލީނީ ވަނީ އެކްސް މެދުވެރިކޮށް އެކަން އިއުލާންކޮށްފައެވެ. އޭނާ އެންމެ ފަހުން ކުޅުނީ މޭޖާ ލީގު ސޮކާ (އެމެރިކާ ލީގު)ގެ ލޮސް އެންޖަލަސް އަށެވެ. އެ ކުލަބާ އޭނާ ގުޅުނީ މިދިޔަ އަހަރުއެވެ. އޭގެ ކުރިން ކިއެލީނީ ވަނީ އިޓާލިއަން ލީގުގެ ޔުވެންޓަސް އަދި ރޯމާ އަށް ކުޅެފައެވެ. ލިވޯނޯ އިން 2000 ވަނަ އަހަރު ސީނިއާ ކެރިއަރު ފެށި ކިއެލީނީ ވަނީ އޭނާގެ ކުލަބު ކެރިއަރުގައި 716 މެޗު ކުޅެދީ 44 ލަނޑު ޖަހައިފައެވެ. އޭނާ ވަނީ ކުލަބު ކެރިއަރުގައި 23 ތައްޓެއް ކާމިޔާބުކޮށްފައެވެ.

ކިއެލީނީ އަށް އެންމެ ފުރަތަމަ އިޓަލީ ޤައުމީ ޓީމުން ޖާގަ ލިބުނީ 2004 ވަނަ އަހަރުއެވެ. އޭގެ ފަހުން އޭނާ ވަނީ 2022 ވަނަ އަހަރާ ހަމައަށް ޤައުމީ ޓީމަށް 117 މެޗު ކުޅެދީ އަށް ލަނޑު ޖަހައިފައެވެ. އިޓަލީ ޤައުމީ ޓީމާއެކު އޭނާ ވަނީ 2020 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބުކޮށްފައެވެ. އިޓަލީން އެ އަހަރުގެ ޔޫރޯ ފުޓުބޯޅަ މުބާރާތް ކާމިޔާބު ކުރުމުގައި ކިއެލީނީ ވަނީ އިސް ދައުރެއް ވެސް އަދާކޮށްފައެވެ.

ކިއެލީނީ އަކީ ފުޓުބޯޅައިގައި އުފެދުނު އެންމެ މޮޅު ޑިފެންޑަރުންގެ ތެރޭގައި ގުނާލެވޭނެ ކުޅުންތެރިޔެކެވެ.