ފީފާއިން އެއް ލައްކަ ޑޮލަރު ލިބިއްޖެ, މުސާރަތައް ދޭނަން- އެފްއޭއެމް

ފީފާއިން އެއްލައްކަ ޑޮލަރުގެ ފައިސާގެ އެހީ ލިބިފައިވާކަން އެފްއޭއެމްއިން ކަށަވަރުކޮށްދީފިއެވެ.

އެފްއޭއެމްގެ ވަގުތީ ޖެނެރަލް ސެކެޓްރީ ޖައުޝަން ޝަރީފް ވިދާޅުވީ ފީފާއިން ފައިސާ ދީފައިވަނީ ގައިޑްލައިންތަކަކާ އެކު ކަމަށާއި, އެގައިޑް ލައިންތަކާ އެއްގޮތަށް އެފްއޭއެމްއިން އަމަލުކުރާނެ ކަމަށެވެ.

ޖައުޝަން ވިދާޅުވީ ފީފާއިން ދެއްވި ފުރަތަމަ ޕޭމަންޓް ޚަރަދުކުރުމަށްފަހު, ޚަރަދުކުރި ގޮތުގެ ތަފްޞީލްތައް ފީފާއާ ހިއްސާކުރައްވާނެ ކަމަށެވެ. ތަފްޞީލްތައް ހިއްސާކުރުމުން ފީފާއިން އިތުރު އެހީ ދޭނެއެވެ.

މުވައްޒަފުންނަށް އެތައް މަހެއްގެ މުސާރަ ނުދެވި, އަދި އެތައް ތަނަކަށް އެފްއޭއެމް ވަނީ ދަރާފައެވެ. މުސާރައިގެ އިތުރުން މުވައްޒަފުންގެ ޕެންޝަން ފައިސާވެސް ޕެންޝަން ފަންޑަށް ޖަމާކޮށްފައެއް ނުވެއެވެ. އެފްއޭއެމް އޮތީ މުބާރާތްތަކާއި, ހަރަކާތްތައްވެސް ކުރިއަށް ނުގެންދެވޭ ހާލަތުގައެވެ. ދެވަނަ ޑިވިޝަން ފުޓްބޯޅަ މުބާރާތް ފެށުމަށް އެޅިފައިވާ ހުރަހަކީވެސް މާލީ މައްސަލައާ ގުޅުންހުރި ހުރަސްތަކެވެ.

އެފްއޭއެމްއަށް ބޭރުގެ އިދާރާތަކުން ދޭ ފައިސާގެ އެހީ ބޭނުންކުރުމުގައި އިހުމާލުވެ, އަމިއްލަ އެކައުންޓްތަކަށް އެފައިސާ ވަންނަ ކަމުގެ ތުހުމަތުގައި ފުލުހުން ގެންދަނީ މައްސަލަ ތަހުގީގު ކުރަމުުންނެވެ. މައްސަލައިގައި ހެކި ލިބިފައިވާކަމަށް ޕީޖީން ދާދި ފަހުން ވަނީ ބުނެފައެވެ.