ރާއްޖޭގެ ނެޓްބޯލް ދެ އަމްޕަޔަރަކަށް ބީ ބެޖް ސެޓްފިކެޓް ލިބިއްޖެ

ރާއްޖޭގެ ނެޓްބޯލް ދެ އަމްޕަޔަރުން ކަމަށްވާ ރިލްވާން އާދަމާއި ނަބީލް އިބްރާހިމަށް ބީ ބެޖް އަމްޔަރިންގް ސެޓްފިކެޓް ލިބިއްޖެއެވެ.

މިއާއެކު މި ދެ އަމްޕަޔަރުން ވެގެން ގޮސްފައި ވަނީ ރާއްޖޭގައި މިވަގުތު ތިބި ނެޓްބޯލް އެންމެ ސީނިއާ ދެ އަމްޕަޔަރުންނަށެވެ.

ކުރިން ސީ ބެޖް އަމްޕަޔަރުން ގޮތުގައި މަސައްކަތް ކުރި މި ދެ އަމްޕަޔަރުންނަށް ބީ ބެޖް އަމްޕަޔަރު ކަމުގެ ސެޓްފިކެޓް ލިބުނީ މިމަހުގެ ކުރީކޮޅު ދެކުނު ކޮރެޔާގެ ޖިއޮންޖޫގައި ކުރިއަށްދިޔަ އޭޝިއަން ޔޫތް ނެޓްބޯޅަ ޗެމްޕިއަންޝިޕްގައި ތަމްސީލްކޮށް އެ މުބާރާތުގައި ދެއްކި ޕާފޯމެންސަށް ބެލުމަށްފަހު އޭޝިއަން ނެޓްބޯލް ފެޑެރޭޝަނުންނެވެ.

ރިލްވާން އާދަމާއި ނަބީލް އިބްރާހިމަށް ލިބުނު މިކާމިޔާބީއާ ބެހޭ ގޮތުން ރާއްޖެއެމްވީ އަށް މައުލޫމާތު ދެމުން ނެޓްބޯލް އެސޯސިއޭޝަންގެ ރައީސާ އައިމިނަތު ޝާޒްލީން (ޝާޒް) ވިދާޅުވީ ރާއްޖޭގައި މި ކުރިއެރުމާއިއެކު ރާއްޖޭގެ އެހެން އަމްޕަޔަރުންނަށް ހިތްވަރަކާއި އުއްމީދެއް ލިބިއްޖެ ކަމަށާއި އަދި ނެޓްބޯޅަ އަމްޕަޔަރިންގައި ކުރިއަށްދާން އަލި މަގެއް ފެނިއްޖެ ކަމަށެވެ.

ޝާޒް ވިދާޅުވީ ފިރިހެން އަމްޕަޔަރުންގެ އިތުރުން އަންހެން އަމްޕަޔަރުން ވެސް މިފަދަ މުބާރާތްތަކުގައި ތަމްސީލުކުރާތަން ފެންނަން ބޭނުންވާ ކަމަށާއި އެހެން ނަމަވެސް އެފަރާތްތަކުން މިހާރަށްވުރެ ބުރަކޮށް މަސައްކަތް ކުރަންޖެހޭ ކަމަށެވެ. އަދި މިހާރަށްވުރެން ބޮޑަށް އަންހެން އަމްޕަޔަރުންގެ ފިޒިކަލް ފިޓްނަސް ރަނގަޅުކުރަންޖެހޭ ކަމަށް ވެސް ޝާޒް ވިދާޅުވިއެވެ.

ރިލްވާން އާދަމަކީ މި އަހަރުގެ މުބާރާތުގެ އިތުރުން މިދިޔަ އަހަރުވެސް މި މުބާރާތުގައި ތަމްސީލްކޮށްފައިވާ ފަރާތެކެވެ. އޭނާ ވަނީ މިދިޔަ އަހަރު ތައިލެންޑުގައި އޮތް މުބާރާތުގެ ސެމީ ފައިނަލްގައި އަދި މިއަހަރުގެ މުބާރާތުގެ ފައިނަލް މެޗުގައި އަމްޕަޔަރުކަން ކޮށްފައެވެ.

އޭޝިޔާގެ 8 ޤައުމުން 40 އަމްޕަޔަރުން ފުރިހަމަކުރި ތަމްރީންތަކުގައި ރާއްޖޭގެ ހަތަރު އަމްޕަޔަރުން ބައިވެރިވި އިރު، އޭޝިއަން ޔޫތް ނެޓްބޯޅަ ޗެމްޕިއަންޝިޕުން ފުރުސަތު ލިބުނު ރިލްވާން އާދަމާއި ނަބީލް އިބްރާހީމަކީ މި ބައިވެރިންގެ އެންމެ ރަނގަޅު ޕާފޯމެންސެއް ދެއްކި 11 އަމްޕަޔަރުންގެ ތެރޭގައި ހިމެނޭ ދެ މީހުންނެވެ.