މާލެ ސިޓީ ކައުންސިލަށް އެމްޑީޕީން ކުރިމަތިލާ ކެންޑިޑޭޓުން ފޯމު ހުށަހަޅައިފި، ދެނީ އިންތިޚާބު ކާމިޔާބު ކުރެވޭނެ ކަމުގެ ޔަގީންކަން
މާލެ ސިޓީ ފެހި ކުރުމާއި ޓްރެފިކް މައްސަލައަކީ ވަރަށް ބޮޑު ދެ މައްސަލަ، ހައްލު ކުރަން ޕްލޭން ވަނީ ހެދިފައި
މާލެ ސިޓީގެ މޭޔަރުކަމަށް ކުރިމަތިލައްވާ އެމްޑީޕީގެ ކެންޑިޑޭޓް އާދަމް އާޒިމް ފޯމު ހުށަހަޅުއްވަނީ
މާލެ ސިޓީ ކައުންސިލުގެ ހުސްވެފައިވާ ދާއިރާތަކުގެ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ފަރާތުން ވާދަކުރައްވާ ކެންޑިޑޭޓުން އެ ބޭފުޅުންގެ ފޯމު އިލެކްޝަންސް ކޮމިޝަން (އީސީ) އަށް ހުށަހަޅައިފިއެވެ.
އެމްޑީޕީގެ ހަތަރު ކެންޑިޑޭޓުން މި ފޯމުތައް އީސީއާ ހަވާލުކުރެއްވީ އަންގާރަ ދުވަހު އެކަމަށް ހާއްސަކޮށްގެން ބޭއްވި ރަސްމިއްޔާތެއްގައެވެ. މި ފޯމުތަކާ އީސީގެ ފަރާތުން ހަވާލުވެވަޑައިގެންނެވީ އެ ކޮމިޝަނުގެ ނާއިބު ރައީސް އިސްމާއީލް ހަބީބުއެވެ.
މާލެ ސިޓީ ކައުންސިލުގެ ހުސްވެފައިވާ މަގާމުތަކުގެ ތެރެއިން މޭޔަރު ކަމަށް ވާދަކުރައްވަނީ އެމްޓީސީސީގެ ކުރީގެ ސީއީއޯ އާދަމް އާޒިމެވެ. އަދި މެދު ހެންވޭރު ދާއިރާއަށް އަހުމަދު ރިޝްވާން ވާދަކުރައްވާއިރު ހެންވޭރު ދެކުނު ދާއިރާއަށް ހައްވާ ނިހުލާ އަދި މާފަންނު ދެކުނު ދާއިރާއަށް އަހުމަދު އިމްރާން ވާދަކުރައްވައެވެ.
ފޯމުތައް ހަވާލުކުރެއްވުމަށްފަހު ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒު ވިދާޅުވީ ޖެނުއަރީ މަހު އޮންނަ މާލެ ސިޓީ ކައުންސިލުގެ ބައި އިލެކްޝަން އެމްޑީޕީއަށް ކާމިޔާބު ކުރެވޭނެ ކަމުގެ ޔަގީންކަން އެބައޮތް ކަމަށެވެ. އަދި އިންތިޚާބަށް އެއް މަސް ދުވަސް އޮތްއިރު އެމްޑީޕީގެ "ސްޓައިލު" ގެ ކެމްޕޭނެއް ކުރިއަށްދާނެ ކަމަށް ވެސް އޭނާ ވިދާޅުވިއެވެ.
މާލެ ސިޓީ ކައުންސިލަށް ކުރިން މެންބަރުން އިންތިޚާބުކޮށްގެން ރައްޔިތުން ބޭނުންވި ބަދަލު ނުފެނުނުކަން ފާހަގަކުރައްވައި މުއިއްޒު ވިދާޅުވީ އެމްޑީޕީގެ ފަރާތުން ނުކުންނަ ކެންޑިޑޭޓުންނަކީ ރައްޔިތުންނަށް ޚިދުމަތް ފޯރުކޮށްދިނުމުގައި އަމަލީ ތަޖުރިބާ ލިބިފައިވާ ބޭފުޅުން ކަމަށެވެ.
މުއިއްޒު ވިދާޅުވީ މާލެ ސިޓީ ފެހި ކުރުމާއި ޓްރެފިކް މައްސަލައަކީ ވަރަށް ބޮޑު ދެ މައްސަލަ ކަމަށާއި އެކަންކަން ހައްލު ކުރުމަށް ކުރަން ޖެހޭ ކަންކަން އެމްޑީޕީން މިހާރު ފައިނަލް ކޮށްފައިވާ ކަމަށެވެ. އަދި ރައްޔިތުންނާ ބައްދަލުކޮށް މާލެއަށް ގެންނަން ބޭނުންވާ ބަދަލުތައް ދެނެގަނެ، އެކަންކަން މެނިފެސްޓޯއެއްގެ ގޮތުގައި އެކުލަވާލެވޭނެ ކަމަށް ވެސް އޭނާ ވިދާޅުވިއެވެ.
މީގެ އިތުރުން މިފަހަރު މާލޭގެ ރައްޔިތުން ސިޓީ ކައުންސިލް ހޮވުމުގައި ތަޖުރިބާ ހުރި ބޭފުޅުންނަށް ބަލަން ޖެހޭ ކަމަށާއި މޭޔަރު ކަމަށް އެމްޑީޕީން ނުކުންނަވާ އާޒިމް އަކީ އެ ތަޖުރިބާ އަމަލީ ގޮތުން ދައްކަވާފައިވާ ކެންޑިޑޭޓެއް ކަން ވެސް މުއިއްޒު ފާހަގަކުރެއްވިއެވެ.
މާލެ ސިޓީ ކައުންސިލް ހުސްވެފައިވާ ގޮނޑިތަކަށް މެންބަރުން އައްޔަން ކުރުމަށް ބާއްވާ ބައި އިލެކްޝަން 13 ޖެނުއަރީ 2024 ގައި ބޭއްވުމަށް އިލެކްޝަންސް ކޮމިޝަނުން ވަނީ ނިންމާފައެވެ. އެގޮތުން، އެ ދުވަހުގެ ހެނދުނު 8:00 ން ހަވީރު 4:00 އަށް ވޯޓުލުން ކުރިއަށްދާއިރު އިންތިޚާބުގެ ރަސްމީ ނަތީޖާ 15 ޖެނުއަރީގައި އިއުލާން ކުރާނެ ކަމަށް އީސީން ވަނީ ބުނެފައެވެ.
