އިންޑިއާ އެމްބަސީގައި ހުޅުޖަހަން ގޮވާލި އައްބާސްއަށް ދައުވާ އިއްވައިފި
އަންގާރަ ދުވަހުގެ އަޑުއެހުމަކީ މި މައްސަލައިގައި ބޭއްވޭ ފުރަތަމަ އަޑުއެހުން
ކ. މާލެ / ހ. ނޫކުރިކީލަ، ޢައްބާސް ޢާދިލް ރިޟާ
ރާއްޖޭގައި ހުންނަ އިންޑިއާގެ ހައިކޮމިޝަންގައި ހުޅުޖެހުމަށް ގޮވާލުމުގެ ތުހުމަތުގައި ދައުލަތުން ދައުވާ އުފުލާފައިވާ, ކ. މާލެ / ހ. ނޫކުރިކީލަ، ޢައްބާސް ޢާދިލް ރިޟާއަށް ކުރާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
އަންގާރަ ދުވަހުގެ އަޑުއެހުމަކީ މި މައްސަލައިގައި ބޭއްވޭ ފުރަތަމަ އަޑުއެހުމެވެ.
ގާޒީ ވަނީ އައްބާސްއަށް ލިޔުންތައް ލިބިފައިވޭތޯ ކަށަވަރު ކުރެއްވުމަށްޓަކައި ސުވާލު ކުރައްވާފައެވެ. އެގޮތުން އެއްވެސް ލިއުމެއް މަދުވާނަމަ، ޝަރީއަތުގެ ސަމާލުކަމަށް ގެނައުމަށް ގާޒީ ދެންނެވިއެވެ.
މި އަޑުއެހުމުގައި އައްބާސް ވަނީ އޭނާ ވަކީލެއްގެ ފުރުސަތު ބޭނުންވާކަމަށް ބުނެފައެވެ.
އެހެންކަމުން ޝަރީއަތުން ވަނީ ވަކީލަކު އައްޔަނު ކުރުމަށް 10 ދުވަހުގެ މުއްދަތެއް އައްބާސްއަށް ދެއްވާފައެވެ. އެއީ އިބްތިދާއީ މަރުޙަލާގައި ދެއްވަން ލާޒިމުކުރާ މުއްދަތެކެވެ.
އެއަށްފަހު ދައުލަތުން ވަނީ ދައުވާ އިއްވާފައެވެ. އެގޮތުން އޭނާގެ މައްޗަށް ކޮށްފައިވަނީ ފަނާކޮށްފާނެ ކަމުގެ ބިރު ދެއްކުމުގެ ކުށުގެ ދައުވާއެވެ.
އޭނާގެ މައްޗަށް ދައުވާ އުފުލާފައިވަނީ, ޑިސެންބަރު 2022ގައި، ސޯޝަލް މީޑިއާ ޕްލެޓްފޯމެއް ކަމަށްވާ "ކްލަބްހައުސް" ގައި ވާހަކަ ދައްކަމުން، ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން އަބްދުލްގައްޔޫމްގެ މައްޗަށް ތުހުމަތުކުރެވޭ މަނީ ލޯންޑަރިންގެ މައްސަލައެއްގެ ޝަރީއަތް ކްރިމިނަލް ކޯޓުގައި ކުރިއަށްދާ ގޮތާމެދު ހިތްހަމަނުޖެހިގެން، ޕެޓްރޯލާއި ގާބުރިފަދަ ތަކެތި ހޯދައި، މާލޭގެ އެކި ތަންތަނުގައި ހުޅުޖަހައި، ހަމަނުޖެހުން ހިންގުމަށް ހިތްވަރުދީފައިވާތީއެވެ.
އަދި، 23 ޑިސެންބަރު 2022 ދުވަހު، އޭނާ ބޭނުންކުރާ ޓުވިޓަރ އެކައުންޓުން، ރާއްޖޭގައި ހުންނަ އިންޑިއާގެ ހައި ކޮމިޝަނަށް ނިސްބަތްކޮށް، އިންޑިއާ އެމްބަސީގައި ހުޅުޖެހުމަށް ގޮވާލައި ޓްވީޓްކޮށްފައިވެސްވެއެވެ.
އޭނާގެ މައްޗަށް ކުށް ސާބިތުވެއްޖެނަމަ 1 އަހަރާއި 7 މަހާއި 6 ދުވަހުގެ ޖަލުގެ ހުކުމެއް އަންނާނެއެވެ.
މި އަޑުއެހުމުގައި ވާހަކަ ދައްކަމުން އައްބާސް ވަނީ ޕީޖީ އޮފީހުން "ސެލެކްޓިވް ޖަސްޓިސް" ގެންގުޅޭކަމަށް ބުނެފައެވެ. އަދި ވަކީލަކާއެކު ދައުވާއަށް ޖަވާބުދާރީވާނެކަމަށް އޭނާގެ ފަރާތުން ބުނެފައިވެއެވެ.
މި އަޑުއެހުން ނިންމަވާލައްވަމުން ގާޒީ ވަނީ ރާއްޖެއިން ބޭރަށް ދާކަމުގައިވާނަމަ، ކޯޓަށް އެންގުމަށްފަހު ދިއުމަށް ދަންނަވާފައެވެ.
އައްބާސްއަށް ޗިޓު ރައްދުނުކޮށްދެވިގެން މި މައްސަލަ ނުފެށި ގިނަ ދުވަސްތަކެއް ވެގެންދިޔައެވެ.
އޭނާ ޝަރީއަތަށް ހާޒިރު ނުކުރެވިގެން އެންމެ ފަހުން އޭނާ ބަންދުގައި ބަހައްޓައިގެން ކޯޓަށް ހާޒިރުކުރަން ފުލުހުން އިއުލާނު ކުރީ 23 މެއި 2023 ގައެވެ. އެއީ މި މައްސަލައާ ގުޅިގެން ކޯޓަށް ހާޒިރުކުރަން ބޭނުންވެ ހާޒިރުކުރެވިފައިނުވާތީ ފުލުހުންގެ ބަންދުގައި ބަހައްޓައިގެން ކްރިމިނަލް ކޯޓަށް ހާޒިރުކުރުމަށް ކޮށްފައިވާ އަމުރާ ގުޅިގެންނެވެ.
އެހެންނަމަވެސް އެ ދުވަހުގެ އަޑުއެހުމަށް ފުލުހުންނަށްވެސް އޭނާ ހާޒިރު ކުރެވިފައެއް ނުވެއެވެ.
އޭގެ ދުވަސްތަކެއް ފަހުންވެސް މި މައްސަލައިގެ އަޑުއެހުމެއް ކްރިމިނަލް ކޯޓުގައި ތާވަލުކުރިއެވެ. ނަމަވެސް އޭނާއަށް ޗިޓް ރައްދުކޮށް ނުދެވޭތީ އެ އަޑުއެހުންވެސް ކުރިއަކަށް ނުގެންދެވެއެވެ.
