ޔުވެންޓަސްގެ އެއްބަސްވުމާމެދު، ރާބިއޮޓް ވަކި ގޮތެއް ނުނިންމާ

އިޓާލިއަން ލީގުގައި ޔުވެންޓަސް އަށް ކުޅެމުން އަންނަ ފްރާންސްގެ އެޑްރިއަން ރާބިއޮޓް، އެ ކުލަބުގެ އެއްބަސްވުން އައު ކުރުމާމެދު ވަކި ގޮތެއް ނިންމާފައި ނުވާ ކަމަށް އޭނާގެ މަންމަ ބުނެފި އެވެ.

އުމުރުން 28 އަހަރުގެ ކުޅުންތެރިޔާ ޔުވެންޓަސް އަށް ބަދަލުވީ 2019 ވަނަ އަހަރު އެވެ. އެ އެއްބަސްވުމުގެ މުއްދަތު މިއަހަރުގެ ޖޫން މަހުގެ ނިޔަލަށް ހަމަވާން އޮއްވާ، އޭނާ ވަނީ އެއް އަހަރަށް އެއްބަސްވުން އައު ކޮށްފަ އެވެ. އެހެންކަމުން، އެންމެ ފަހުން އެ ކުލަބާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. އަނެއްކާ ވެސް ޔުވެންޓަސް އިން އަންނަނީ އޭނާގެ އެއްބަސްވުން އައު ކުރުމަށް މަސައްކަތް ކުރަމުންނެވެ. އެކަމުގައި އެ ކުލަބުން ވަނީ ރާބިއޮޓާއެކު މަޝްވަރާ ވެސް ކޮށްފަ އެވެ.

އިޓަލީގެ ބައެއް މީޑިއާ ތަކުގައި ބުނެފައިވާ ގޮތުންް، ޔުވެންޓަސް އާއެކު އައު އެއްބަސްވުމެއްގައި ސޮއި ކުރުމަށް ރާބިއޮޓް ވަނީ އެއްބަސްވެފަ އެވެ. ނަމަވެސް އޭނާގެ މަންމަ ވަނީ އެ ވާހަކަތައް ދޮގު ކޮށްފަ އެވެ. ރާބިއޮޓްގެ މަންމަ ބުނީ، މީޑިއާ ތަކުގައި ދައުރުވަމުން ދަނީ އެއްވެސް އަސްލެއް ނެތް ދޮގު ވާހަކަތަކެއް ކަމަށެވެ. އަދި ރާބިއޮޓް އޭނާގެ މުސްތަޤުބަލާމެދު ވަކި ގޮތެއް ނިންމާފައި ނުވާ ކަމަށް ވެސް އޭނާގެ މަންމަ ވަނީ ބުނެފަ އެވެ.

ޔުވެންޓަސްގައި އޭނާ ރަނގަޅު ކުޅުމެއް ދައްކަމުން އަންނާތީ ކުލަބުން ބޭނުންވަނީ އޭނާ އެ ކުލަބުގައި ބެހެއްޓުމަށެވެ. މިހާތަނަށް ރާބިއޮޓް ވަނީ ޔުވެންޓަސް އަށް ކުޅެދިން 190 މެޗުން 19 ލަނޑު ޖަހައިފަ އެވެ. އެކުލަބާއެކު އޭނާ ވަނީ ތިން ތައްޓެއް ކާމިޔާބުކޮށްފަ އެވެ. އެއީ އިޓާލިއަން ލީގު، އިޓާލިއަން ކަޕް އަދި އިޓާލިއަން ސުޕަ ކަޕް އެވެ. ރާބިއޮޓް ހޯދުމުގެ ޝައުޤުވެރިކަން އިނގިރޭސި ޕްރިމިއާ ލީގުގެ ކުލަބުތަކުން ގެންގުޅޭ ކަމަށް ރިޕޯޓުތައް ބުނާއިރު، ސައުދީ އަރަބިޔާގެ، ސައުދީ ޕްރޯ ލީގުން ވެސް އޭނާ ހޯދުމުގެ ޝައުޤުވެރިކަން މީގެ ކުރިން ފާޅުކޮށްފައިވެ އެވެ.