އިންތިފް ރައޫފް ބަޑި ގެންގުޅުނު ކަމަށް ބުނާ މައްސަލަ ޕީޖީ އޮފީހުން އަނބުރާ ގެންގޮސްފި
ހައިކޯޓުން ވަނީ ދައުލަތުން އެދިފައިވާ ގޮތަށް މި މައްސަލައިގެ ދައުވާ ފޯމު ބާތިލުކޮށްފައި
ހ. ހިލްޓަން، މުހައްމަދު އިންތިފް ރައޫފް
ހ. ހިލްޓަން، މުހައްމަދު އިންތިފް ރައޫފްގެ މައްޗަށް ކުރި މަގުބޫލު ސަބަބެއް ނެތި ނުރައްކާތެރި ހަތިޔާރު ބެހެއްޓި ކަމުގެ ދައުވާ ސާބިތުނުވާކަމަށް ކްރިމިނަލް ކޯޓުން ކުރި ޙުކުމް ދައުލަތުން ހައިކޯޓުގައި އިސްތިއުނާފުކޮށްފައިވާއިރު، އެ މައްސަލައިގެ އިސްތިއުނާފު ދައުލަތުން އަނބުރާ ގެންގޮސްފިއެވެ.
އިންތިފްގެ މައްޗަށް ދައުވާކޮށްފައިވަނީ، 2015 ވަނަ އަހަރުގެ އޮކްޓޯބަރު މަހުގެ 30 ވަނަ ދުވަހު މއ. ގޯލްޑަންބީމް ބަލައި ފާސްކުރުމަށް ދިޔުމުން އެ ގޭގެ ވައި ގޮޅީގެ ތެރެއިން އިންތިފު ފިސްތޯލައެއް އެއްލާލާފައިވާ ކަމަށް ބުުނާ މައްސަލައިގައެވެ. ނަމަވެސް ކްރިމިނަލް ކޯޓުން މައްސަލަ ބޭރުކޮށްލީ އިންތިފްގެ އަތުން ފެނިފައިވަނީ އޭގެ ޒާތުގައި ނުރައްކާތެރި ހަތިޔާރެއްކަން ޝަރީއަތަށް ސާބިތުކޮށްދެވިފައިނުވާ ކަމަށް ބުނެއެވެ.
ވުމާއެކު އޭރު އެ ޙުކުމާމެދު ހިތްހަމަނުޖެހިގެން ދައުލަތުން ހައިކޯޓުގައި ޙުކުމް އިސްތިއުނާފު ކުރީއެވެ.
އެހެންނަމަވެސް އެ މައްސަލަ މިހާރު އިތުރަށް ކުރިއަށް ގެންދަން ބޭނުން ނުވާކަމަށް ބުނެ ދައުލަތުން ވަނީ 27 ނޮވެމްބަރު 2023ގައި ހައިކޯޓަށް ސިޓީއެއް ހުށައަޅާފައެވެ.
އެ ސިޓީގައި މި މައްސަލަ އަނބުރާ ގެންދަން ބޭނުންވާ ސަބަބުތައް ވެސް ޕީޖީ އޮފީހުން ބަޔާންކޮށްފައިވެއެވެ.
ދައުލަތުގެ ސިޓީގައި ބަޔާންކޮށްފައިވާ ގޮތުގައި އިންތިފް ރައޫފުގެ މައްޗަށް މި މައްސަލައިގެ ފަހުން އިތުރު މައްސަލައެއް ހުށައެޅިފައި ނުވުމާއި، މި މައްސަލައިގެ ފަހުން އޭނާގެ ކުށުގެ ރެކޯޑެއް ނެތުމަކީ އޭގެ ސަބަބެކެވެ.
އަދި ޙާދިސާ ހިނގިތާ ގިނަ އަހަރުތަކެއް ވެފައިވާއިރު، މި މައްސަލަ ސާބިތުވެއްޖެނަމަ ތަންފީޒު ކުރަންޖެހޭނެ ޖަލު އަދަބަކީ 2 މަސް ދުވަހުގެ މުއްދަތު ކަމަށާއި، މި މައްސައިގެ އިސްތިއުނާފު ކުރިއަށް ގެންދަންޖެހޭ ޤާނޫނީ ޚާއްސަ ސަބަބެއްވެސް ނެތްކަމަށް ދައުލަތުން ހައިކޯޓަށް ފޮނުވި ސިޓީގައި ބުނެފައިވެއެވެ.
ވުމާއެކު، ހައިކޯޓުން ވަނީ ދައުލަތުން އެދިފައިވާ ގޮތަށް މި މައްސަލައިގެ ދައުވާ ފޯމު ބާތިލުކޮށްފައެވެ.
