ކުރީ ސަރުކާރުގައި ބްލަޑްބޭންކާއި ތެލެސީމިއާ ސެންޓަރު ގާއިމްކޮށް އިތުރު ޚިދުމަތް ހިމެނޭގޮތަށް އިމާރާތެއް އަޅަން ބިން ހަވާލުކޮށްފައިވޭ: އާދިލް
11 ޑިސެމްބަރު 2023 | ހޯމަ 09:05ތެލެސީމިއާ ސެންޓަރު ވަނީ ވަރަށް ބޮޑަށް ބާވެފައި
ލޭ ހަދިޔާ ކުރަނީ
ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުގައި ނޭޝަނަލް ހެލްތު ލެބޯޓްރީ، ވެކްސިން ސްޓޯރޭޖްގެ 5 ބުރީގެ އިމާރާތް، ނޭޝަނަލް ބްލަޑް ބޭންކް އަދި ތެލެސީމިއާ ސެންޓަރު ގާއިމްކުރުމަށް ހުޅުމާލޭގައި ބިން ކަނޑަޅާ ހެލްތު މިނިސްޓްރީއާ ހަވާލުކޮށްފައިވާ ކަމަށް ކުރީ ސަރުކާރުގެ ހެލްތް މިނިސްޓްރީގެ ސްޓޭޓް މިނިސްޓަރު އަހްމަދު އާދިލް ވިދާޅުވެއްޖެއެވެ.
އާދިލް ވިދާޅުވީ މިހާރު މާލޭގައި ހިންގަމުންދާ ތެލެސީމިއާ ސެންޓަރު ވަރަށް ބޮޑަށް ބާވެ ހަލާކުވެފައިވާ ކަމަށާއި، އެއީ ޚިދުމަތް ފޯރުކޮށްދިނުމަށް އެކަށީގެންވާ އިމާރާތެއް ނޫން ކަމަށެވެ. އަދި އެ އިމާރާތުގައި ބްލަޑް ބޭންކްގެ ޚިދުމަތް ފޯރުކޮށްދެމުންދާ ކަމަށް އާދިލް ވިދާޅުވިއެވެ.
އާދިލް ވިދާޅުވީ ރަނގަޅު ސިއްހީ ޚިދުމަތްތައް ފޯރުކޮށްދިނުމަށް ކުރަމުންދިޔަ މަސައްކަތުގެ ދަށުން ހުޅުމާލެއިން ޚާއްސަ ބިމެއް ކަނޑައަޅައި، އެބިން ހެލްތު މިނިސްޓްރީގެ ދަށަށް ރަޖިސްޓްރީކޮށްފައިވާ ކަމަށެވެ. އަދި އެ ބިމުގައި ނޭޝަނަލް ހެލްތު ލެބޯޓްރީ، ވެކްސިން ސްޓޯރޭޖް 5 ބުރީގެ އިމާރާތް، ނޭޝަނަލް ބްލަޑް ބޭންކް އަދި ތެލެސީމިއާ ސެންޓަރު ގާއިމްކުރުމަށް ނިންމާފައިވާ ކަމަށާއި، ބަޖެޓުގައި ހިމަނާ އެކަން އައު ސަރުކާރުގެ ސަމާލުކަމަށް ގެނެސްފައިވާ ކަމަށް އާދިލް ވިދާޅުވިއެވެ.
އާދިލް ވިދާޅުވީ ނޭޝަނަލް ހެލްތު ލެބޯޓްރީ ގާއިމްކުރުމަށް ޔޫރަޕިއަން އިވެސްޓްމަންޓް ބޭންކްގެ އެހީ ލިބިފައިވާ ކަމަށާއި، 18.9 މިލިއަން ޔޫރޯ ލިބިފައިވާ ކަމަށެވެ. ވެކްސިން ސްޓޯރޭޖް ގާއިމްކުރުމަށް އޭޑީބީގެ ފަންޑު ލިބިފައިވާ ކަމަށް އޭނާ ވިދާޅުވިއެވެ. އަދި އެބިމުގައި ތެލެސީމިއާގެ ޚާއްސަ ސެންޓަރު ވެސް ގާއިމްކުރެވިގެންދާނެ ކަމަށާއި، ވަކިން ހޮސްޕިޓަލްގެ ނަން ނުދޭ ކަމަށް އާދިލް ވިދާޅުވިއެވެ.
މީގެ އިތުރުން އާދިލް ވިދާޅުވީ ތެލެސީމިއާ ކުދިންނަށް ބޭނުންވާ ފަރުވާއާއި ބޭސް ވީހާވެސް ލުއިފަސޭހަ ގޮތެއްގައި ފޯރުކޮށްދިނުމަކީ ކުރީ ސަރުކާރުގެ ވެސް އަމާޒު ކަމަށެވެ. އެގޮތުން ބޯންމެރޯ ޓްރާންސްޕްލާންޓް ހެދުމަށް 5 ކުދިން ފޮނުވިކަން އާދިލް ފާހަގަކުރެއްވިއެވެ. އަދި ވިދާޅުވީ ތެލެސީމިއާގެ ޚިދުމަތްތަކަކީ އާސަންދައިން ލިބޭ ޚިދުމަތްތަކެއް ކަމަށާއި، ބޯންމެރޯގެ ޚިދުމަތަކީ ކުރީ ސަރުކާރުތަކުން ދެމުންދިޔަ ޚިދުމަތެއް ކަމަށެވެ.
ކުރީ ސަރުކާރުން ހުޅުމާލޭގައި ޚާއްސަ ބިމެއް ކަނޑައަޅައި، ފަންޑު ހަމަޖައްސާފައިވާއިރު، އާދިއްތަ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ އަންޑަރ ސެކްރެޓަރީ, ޕަބްލިކް ޕޮލިސީ, މުހައްމަދު ފިރުޒުލް އަބްދުالله ހަލީލް ވިދާޅުވީ ތެލަސީމިއާ ހޮސްޕިޓަލް އެޅުމަށް 25 މިލިއަން ޑޮލަރު ހޭދަވާނެ ކަމަށް ބެލެވޭ ކަމަށާއި އަދި ހޮސްޕިޓަލް ގާއިމުކުރާނީ މާލެ ސަރަހައްދުގައި ކަމަށެވެ. ނަމަވެސް ހޮސްޕިޓަލް އަޅާނެ ވަކި ތަނެއް މިހާތަނަށް ނިންމާފައިނުވާ ކަމަށް އޭނާ ވިދާޅުވިއެވެ.
