މާލެ ސިޓީއަށް އާޒިމް ވެވަޑައިގެންނެވީ އުއްމީދީ ވައުދުތަކެއް، ވިދާޅުވީ ވާނެ އަދި ކުރާނެ ކަމަށް

ދިވެހިރައްޔިތުންގެ ޑިމޮކްރެޓިކް ޕާޓީގެ ފަރާތުން މާލެ ސިޓީގެ މޭޔަރުކަމަށް ވާދަކުރައްވާ އާދަމް އާޒިމް މާލެ ސިޓިއަށް އުއްމީދީ ވައުދުތަކެއް ވެވަޑައިގެން، އެ ވައުދު ފުއްދައިދެއްވާނެކަމުގެ ޔަގީންކަން ދެއްވައިފިއެވެ.

"ފެހި ތަނަވަސް މާލެ" ކެމްޕޭންގެ ތެރެއިން މާލެ ސިޓީ މޭޔަރު އަދި ކައުންސިލްގެ ހުސްވެފައިވާ 3 ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓުންގެ ކެމްޕޭން ރަސްމީކޮށް ފެށުމުގެ ޖަލްސާގައި ވާހަކަ ދައްކަވަމުން އާޒިމް ވިދާޅުވީ އެމްޑީޕީގެ ޓިކެޓުގައި، މާލޭގެ މޭޔަރުކަމަށް ނިކުމެ ހުންނެވީ، މާތްﷲގެ އިރާދަފުޅާއެކު އިންތިޚާބު އެމްޑީޕީއަށް، މާލޭ ރައްޔިތުންނަށް، މާލޭގައި ދިރިއުޅެމުންދާ ރައްޔިތުންނަށް، އަދި ހުރިހާ ލޮބުވެތި ދިވެހިންނަށް ކާމިޔާބުކޮށްދެއްވުމަށް ކަމަށެވެ.

އާޒިމް ވިދާޅުވީ މާލެ ސިޓީ ކައުންސިލްގެ ހިންގުމާއި ހަވާލުވުމަށްފަހު އެންމެ އިސްކަމެއްދެއްވާނީ އެތަނެއް ޓްރާންސްޕޭރެންޓް ކުރުމަށް ކަމަށެވެ. އަދި މާލެ ސިޓީ ކައުންސިލް ހިންގަނީ ދައުލަތުގެ ބަޖެޓުން ޓެކްސް ފައިސާ ދީގެން ކަމަށެވެ. ނަމަވެސް އެތަނުގައި ހުރީ ރައްޔިތުންގެ މުދާ ކަމަށާއި، ރައްޔިތުންގެ މުދާ އަދި ފައިސާ ހޭދަކުރާގޮތް ރައްޔިތުންނަށް ސަފުކޮށް އެނގެންޖެހޭ ކަމަށެވެ.

އާޒިމް ވިދާޅުވީ ބިންވެރިޔާ އަދި ގެދޮރުވެރިޔާ ސްކީމުން ބިމާއި ފުލެޓް ލިބުނު ފަރާތްތައް މަގުމަތިވިޔަ ނުދެއްވާނެ ކަމަށެވެ. ގާނޫނީ އިމުގެ ތެރެއިން ބިން އަދި ފުލެޓް ޔަގީންކުރަން ކުރެވެންހުރި ހުރިހާ ކަމެއް ކުރައްވާނެކަމަށާއި، ފުށިދިއްގަރު ފަޅަކީ އޮތް އޮޕްޝަނެއް ނޫން ކަމަށް އާޒިމް ވިދާޅުވިއެވެ.

އާޒިމް ވިދާޅުވީ މާލޭގެ ޕާކިންއަށް ހައްލު ހޯދުމުގެ އިތުރުން ޕާކުތަކާއި ހިތްފަސޭހަކޮށްލަން ދުވަސްވީ މީހުންނާއި، ތުއްތު ކުދިން އަދި ގޭތެރޭގައި ބަންދުވެފައި ތިބި މީހުން ނުކުމެލާނެ ތަންތަން ތަރައްގީކުރަައްވާނެ ކަމަށެވެ. އަދި ތޮއްޖެހިފައިވާ މާލޭގައި ރައްޔިތުން ގަނަތެޅެނީ ކަމަށާއި، މާލޭގެ ބިމުގެ އޮޑިޓެއް ހަދާ ބިން ބޭނުންކުރަނީ އެންމެ ރަނގަލަށްތޯ ބައްލަވާނެ ކަމަށެވެ.

އާޒިމް ވިދާޅުވީ ކުނީގެ މައްސަލަ މާލޭގައި ބޮޑުކަމަށެވެ. މިކަންކަން ދިމާވަނީ ގަވާއިދުތައް ތަންފީޒު ނުކުރެވޭތީ ކަމަށާއި، ރަނގަޅު އުސޫލުތައް ވެސް ނެތްކަމަށެވެ.

އާޒިމް ވިދާޅުވީ އޭނާ ހިދުމަތްކުރާނީ ރައްޔިތުންނަށް ފައިދާވާ ގޮތަށް ކަމަށެވެ. އަދި ހިދުމަތް ޑުޕްލިކޭޓްކޮށް ރައްޔިތުންގެ ފައިސާ އިސްރާފްވާ ކަންތައްތަކުގައި ބައިވެރިއެއް ނުވާނެ ކަމަށެވެ. އާޒިމް ވިދާޅުވީ އޭނާގެ ވިސްނުމަކީ ސްޓެލްކޯ، އެމްޑަބްލިއުއެސްސީ، ވެމްކޯ ފަދަ ތަންތަނާ ގުޅިގެން ރައްޔިތުންނަށް ފޯރުކޮށްދޭ ހިދުމަތުގެ ފެންވަރު މަތިކޮށްދެއްވާނެ ކަމަށެވެ.

އާޒިމް ވިދާޅުވީ އެއްވެސް މީހަކާ ޒާތީއެއް ނުވާނެ ކަމަށާއި، ހުރިހާ އެންމެނާވެސް ގުޅިގެން މަސައްކަތް ކުރައްވާނެ ކަމަށެވެ. އާޒިމް ވިދާޅުވީ އޭނާއަކީ ވިސްނައިގެން ޕްލޭންކޮށްގެން ދެމެހެއްޓެނެވި ގޮތަކަށް މަސައްކަތްކުރާ މީހެއް ކަމަށެވެ. އަދި އޭނާގެ ޓްރެކް ރެކޯޑަށް ރައްޔިތުންގެ އިތުބާރު އެބައޮތް ކަމަށާއި، އެންމެންނަށް ވެސް އޭނާއަށް ކަންތައްތައް ކުރެވޭނެކަމަށް އިއްތިފާގުވާނެ ކަމަށެވެ.

މާލެ ސިޓީއަކީ ގޮންޖެހުންތައް ގިނަ، އެތައް ޒަމާނެއް ވަންދެން އަޅާނުލެވި އޮތް ސިޓީއެއް ކަމަށާއި، ކަމެއް ނުކުރަން 1 ހާސް އުޒުރު ދެއްކޭނަމަ، ކަމެއް ކުރަންވެސް 1 ހާސް ގޮތް ދެއްކޭނެ ކަމަށެވެ.