މިނިވަންކަމާއި ހަމަހަމަކަމާއި އިންސާފުވެރިކަން ލިބިދިނުމުގައި އެއްވެސް ރައްޔިތަކު ބާކީ ނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އިންސާނީ ހައްގުތަކުގެ ދުވަހާއި ގުޅިގެން އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ އަޒުމަކީ މިނިވަންކަމާއި ހަމަހަމަކަމާއި އިންސާފުވެރިކަން ލިބިދިނުމުގައި އެއްވެސް ރައްޔިތަކު ބާކީ ނުކުރުން ކަމަށެވެ.

10 ޑިސެމްބަރު 2023 ވާ އާދީއްތަ ދުވަހަކީ އިންސާނީ ހައްގުތަކުގެ ބައިނަލްއަގުވާމީ ގަރާރަށް 75 އަހަރު ފުރޭ އަލިމަސް ޔޫބީލްއެވެ. އާއްމުކޮށް މިފަދަ ދުވަސްތަކާއި ގުޅިގެން ޚާއްސަ ޚިތާބުތައް ސަރުކާރުން ނެރެއެވެ. ނަމަވެސް މިއަހަރުގެ މި ދުވަހާއި ގުޅިގެން ޚާއްސަ ޚިތާބެއް އާއްމުކޮށްފައިނުވެއެވެ.

މިނިވަންކަމާއި ހަމަހަމަކަމާއި އިންސާފުވެރިކަން ލިބިދިނުމުގައި އެއްވެސް ރައްޔިތަކު ބާކީ ނުކުރައްވާނެ ރައީސް މުއިއްޒު ވިދާޅުވެފައިވާއިރު އެމަނިކުފާނު ވެރިކަމަށް ހަވާލުވެވަޑައިގެންނެވުމަށްފަހު ނުހައްގުން ގިނަ އަދަދެއްގެ މުވައްޒަފުން ވަޒީފާއިން ވަކިކުރަމުންދާ ކަމަށް ގިނަ ބަޔަކު ދަނީ ބުނަމުންނެވެ. އޭގެ ތެރޭގައި ސަރުކާރުގެ އެކި ކުންފުނިތަކުގެ މުވައްޒަފުންނާއި ރައީސުލްޖުމްހޫރިއްޔާގެ ރަސްމީގެކޮޅުގެ މުލިއާގޭގައި މަސައްކަތް ކުރަމުންދިޔަ ދުވަސްވީ މުވައްޒަފުން ވަޒީފާއިން ވަކިކޮށްފައިވާ މައްސަލަތައް ހިމެނެއެވެ.