އެމަޝްރޫޢަށް ބޭނުންވާ ފައިސާ ހަމަނުޖެހޭކަމަށް ކޮމިޓީގައި ފިނޭންސް މިނިސްޓަރ ވިދާޅުވި
ކުޅުދުއްފުށި އުތުރު ދާއިރާގެ މެމްބަރ ޔާސިރު އަބްދުލްލަތީފު
ފުށިދިއްގަރު ފަޅު ހިއްކުމުގެ މަޝްރޫޢު މިވަގުތު ފެށުމަށްވުރެ މިހާރު ފަށާފައިހުރި މުހިންމު މަޝްރޫޢުތައް އެގޮތުގައި ކުރިޔަށްގެންދިޔުން މާމުހިންމު ކަމަށް ކުޅުދުއްފުށި އުތުރު ދާއިރާގެ މެމްބަރ ޔާސިރު އަބްދުލްލަތީފު ވިދާޅުވެއްޖެއެވެ.
ބަޖެޓް ދިރާސާކުރި ކޮމިޓީން އަންނަ އަހަރުގެ ބަޖެޓް ދިރާސާކޮށް ނިންމާ ބަޖެޓް ފާސްކުރިއިރު ވަނީ ފުށިދިއްގަރުފަޅު މަޝްރޫޢު އުނިކޮށްފައެވެ. އެކަމާއި ގުޅިގެން ފާޑުކިޔުންތައް ވަނީ އެމްޑީޕީއަށް އަމާޒުވެފައެވެ. އެމަޝްރޫޢަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ މުހިންމު ވައުދެކެވެ. އެހެންއެކަން އޮއްވާ އެމްޑީޕީގެ މެޖޯރިޓީ އޮންނަ ކޮމިޓީން އެމަޝްރޫޢު އުނިކުރުމާއި ގުޅިގެން އެކަން ކުރި ސަބަބު ސާފުކޮށްދެއްވަމުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ޔާސިރު ވިދާޅުވީ ބަޖެޓް ދިރާސާކުރި މަރުހަލާގައި މިހާރުގެ ފިނޭންސް މިނިސްޓަރ ކޮމިޓީއަށް ހާޒިރުކުރެވުނުކަމަށެވެ.
އަދި އެމަޝްރޫޢަށް ބޭނުންވާ ފައިސާ ހަމަނުޖެހޭކަމަށް ކޮމިޓީގައި ފިނޭންސް މިނިސްޓަރ ވިދާޅުވިކަމަށް ޔާސިރު ވިދާޅުވިއެވެ. އެހެން އެކަން އޮއްވާ ފައިސާ ހަމަނުޖެހި އޮތް މަޝްރޫޢެއް ބަޖެޓްގައި ހިމަނައިގެން ކުރިޔަށްދިޔުމަށްވުރެ މިހާރުވެސް ހިންގަމުން އަންނަ މަޝްރޫޢުތައް ކުރިޔަށް ގެންދިޔުން މުހިންމުކަމަށް ޔާސިރު ވިދާޅުވިއެވެ.
އަނެއްކޮޅުން ރަށްރަށުގައި ހިނގާ ޕީއެސްއައިޕީ ހުރިހާ މަޝްރޫޢުތައް ކުރިޔަށް ނުގެންދަވާނެކަމަށް ފިނޭންސް މިނިސްޓަރ ބަޖެޓް ކޮމިޓީގައި ވިދާޅުވެފައިވާކަމަށާއި މިސަރުކާރުން އިސްކަންދޭ މަޝްރޫޢުތައް ކަނޑައަޅުއްވާނެކަމަށް ވިދާޅުވެފައިވާކަމަށެވެ. އެހެންކަމުން މިހާރު ހިނގަމުން އަންނަ މަޝްރޫޢުތައް އެގޮތުގައި ކުރިޔަށްގެންދިޔުމަކީ މުހިންމު ކަމެއްކަމަށް ޔާސިރު ވިދާޅުވިއެވެ.
ޔާސިރު ވިދާޅުވީ އެމްޑީޕީން ތަރައްގީގެ މަޝްރޫޢުތަކަށް ހުރަސްނާޅާނެކަމަށެވެ. ސަރުކާރުގެ ތަރައްގީގެ މަޝްރޫޢުތަކަށް އެއްބާރުލުން ދޭނެކަމަށާއި ނަމަވެސް ހިނގަމުންދާ މަޝްރޫޢުތައް ހުއްޓާލުމަށްފަހު އައު މަޝްރޫޢެއް ހިންގުމަށް ތާއީދުނުކުރެވޭކަމަށެވެ.
ފުށިދިއްގަރު ފަޅު ހިއްކުމުގެ މަޝްރޫއަކީ ހުޅުމާލެ ވަރުގެ 3 ތަން ހިއްކުންކަމަށާއި އެތަނުގައި 75،000 އާއިލާއަށް ބޯހިޔާވަހިކަން ހޯދުމަށް ސަރުކާރުން ވިސްނާފައިވާއިރު އެއީ އަނެއްކާވެސް މާލެ ސަރަހައްދަށް ބޮޑު އާބާދީއެއް ތޮއްޖެއްސުންކަމަށް ޔާސިރު ވިދާޅުވިއެވެ.
