އެމްޑީޕީގެ މާލެ ސިޓީ ކައުންސިލުގެ ބައި އިލެކްޝަނުގެ ކެމްޕޭން ރަސްމީކޮށް ލޯންޗުކުރުން އާދިއްތަ ދުވަހުގެ ރޭ
"ފެހި ތަނަވަސް މާލެ" ކެމްޕެއިން ރަސްމީކޮށް ފެށުމުގެ ރަސްމިއްޔާތު އޮންނާނީ އާދިއްތަ ދުވަހުގެ ރޭ 8:30 ގައި ސޯސަން ޖަގަހަ ކުރިމަތީގައި
އެމްޑީޕީގެ 4 ވަނަ ދައުރުގެ ނުވަ ވަނަ ޤައުމީ މަޖިލީހުގެ ޖަލްސާގެ ތެރެއިން
މޯލްޑިވިއަން ޑިމޮކްރޮޓިކް ޕާޓީ (އެމްޑީޕީ)ގެ މާލެސިޓީ ކައުންސިލްގެ ބައި އިލެކްޝަންގެ ކެމްޕޭން ރަސްމީކޮށް ލޯންޗުކުރުން އާދިއްތަ ދުވަހު އޮންނާނެކަމަށް އެޕާޓީން ބުނެފިއެވެ.
ކުރިން ކެމްޕެއިން ރަސްމީކޮށް ލޯންޗުކުރުމަށް ހަމަޖެހިފައި އޮތީ ބުރާސްފަތި ދުވަހުގެ ރެ އެވެ. ނަމަވެސް މޫސުން ގޯސްވުމުގެ ސަބަބުން އެރޭގެ ރަސްމިއްޔާތު ވަނީ ކެންސަލުކޮށްފައެވެ.
އެމްޑީޕީން ބުނީ "ފެހި ތަނަވަސް މާލެ" ކެމްޕެއިން ރަސްމީކޮށް ފެށުމުގެ ރަސްމިއްޔާތު އޮންނާނީ އާދިއްތަ ދުވަހުގެ ރޭ 8:30 ގައި ސޯސަން ޖަގަހަ ކުރިމަތީގައި ކަމަށެވެ.
މާލޭގެ މޭޔަރާއި ކައުންސިލްގެ 3 ދާއިރާތަކަށް މެމްބަރުން ހޮވުމަށް ބާއްވާ ބައި-އިލެކްޝަނުގައި، އެމްޑީޕީގެ ފަރާތުން ވާދަކުރާ ކެންޑިޑޭޓުން ހޮވުމަށް ބާއްވާ ޕްރަައިމަރީއަށް، ދާއިރާއަކުން އެކަކު ފޯމު ހުށަހަޅާފައިވާތީ ވޯޓަކާނުލައި ކުރިމަތިލީ ފަރާތްތަކަށް ޓިކެޓު ދޭން އެޕާޓީން ވަނީ ނިންމާފައެވެ.
މާލޭގެ މޭޔަރުކަމަށް އެ ޕާޓީން ނެރޭނެ ކެންޑިޑޭޓަކަށް ވެވަޑައިގަތުމަށް ފޯމު ހުށަހެޅުއްވީ އެމްޓީސީސީގެ ކުރީގެ ސީއީއޯ އާދަމް ޢާޒިމް އެކަންޏެވެ. މާލޭ ސިޓީ ކައުންސިލުގައި މިހާރު މެމްބަރަކު ނެތް ދާއިރާތައް ކަމަށްވާ؛ މެދު ހެންވޭރު ދާއިރާ، ހެންވޭރު ދެކުނު ދާއިރާ، އަދި މާފަންނު ދެކުނު ދާއިރާއަށް ވާދަކުރައްވަންވެސް ހުށަހެޅުއްވީ ކޮންމެ ދާއިރާއަކަށް އެންމެ ބޭފުޅެކެވެ.
