އައްޑޫ ސިޓީގައި ހިނގި ދެ މާރަމާރީއާ ގުޅިގެން ކޯޓު އަމުރެއްގެ ދަށުން ފުލުހުން ހޯދަމުންދަނިކޮށް، އަމިއްލައަށް ފުލުހުންގެ އިދާރާއަށް ހާޒިރުވި މީހާ، ޝަރީއަތް ނިމެންދެން ބަންދުގައި ބަހައްޓަން ހިތަދޫ މެޖިސްޓްރޭޓް ކޯޓުން އަމުރުކޮށްފި އެވެ.

އައްޑޫ ސިޓީގެ ހިތަދޫގައި މިދިޔަ ހުކުރު ދުވަހުގެ ރޭ ނުރައްކާތެރި މާރަމާރީއެއް ހިންގައި 30 އަހަރުގެ ފިރިހެނަކު ވަނީ ޒަހަމްކޮށްލާފަ އެވެ. މި މާރާމަރީގެ އިތުރުން، މިދިޔަ އާދިއްތަ ދުވަހު ވެސް އައްޑޫގައި މާރަމާރީއެއް ހިންގައި، 20 އަހަރުގެ ފިރިހެނަކަށް އަނިޔާ ކޮށްފައިވެއެވެ.

މި ދެ މަރާމާރީއާ ގުޅިގެން މިހާތަނަށް 12 މީހަކު ހައްޔަރުކޮށްފައިވާއިރު، 21 އަހަރުގެ މީހަކު ވަނީ ދޫކޮށްލާފަ އެވެ. އޭނާ ދޫކޮށްލާފައިވަނީ މިދިޔަ ހޯމަ ދުވަހު އެވެ.

އެ މާރަމާރީގެ މައުލޫމާތު ދެމުން ފުލުހުން ބުނީ އެ މާރަމާރީތަކާ ގުޅިގެން ބުރާސްފަތި ދުވަހު ފުލުހަށް ހާޒިރުވި މީހާގެ ބަންދާމެދު ގޮތެއް ނިންމުމަށް ހިތަދޫގެ މެޖިސްޓްރޭޓް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރުމަށް ކޯޓުން އަމުރުކޮށްފައިވާ ކަމަށެވެ.