އައްޑޫ ސިޓީގައި ހުންނަ އިންޓަނޭޝަނަލް މެޑިކަލް އެންޑް ޑައިގްނޯސްޓިކް ސެންޓަރު (އައިއެމްޑީސީ)ގައި ސިޒޭރިއަން އޮޕަރޭޝަން ހެދި މާބަނޑު މީހެއްގެ ހާލު ކުއްލިއަކަށް ސީރިއަސްވެގެން ނިޔާވެއްޖެ އެވެ.

މި ހާދިސާގައި ނިޔާވީ ސ.ހިތަދޫ، ތަމަންނާގެ، އުމުރުން 28 އަހަރުގެ އާއިޝަތު ނަޒާހަތު އަހުމަދު ދީދީ އެވެ. އޭނާ އަކީ އައްޑޫ ސިޓީ ކައުންސިލުގައި ޕްރޮޖެކްޓް ޑިވެލޮޕްމަންޓް ޔުނިޓުގެ އެސޯސިއޭޓް ކައުންސިލް އޮފިސަރުގެ ވަޒީފާ އަދާކުރި މީހެކެވެ.

މި މަރާ ގުޅިގެން އައިއެމްޑީސީ އިން ނެރުނު ބަޔާނެއްގައި ވަނީ މި ހާދިސާގެ ތަފްސީލު ހާމަކޮށްފަ އެވެ. އެ ހޮސްޕިޓަލުގައި އެޑްމިޓްކޮށްގެން ވިހެއުމުގެ ކަންތައްތައް ކުރިއަށް ގެންދިޔަ މާބަނޑު މީހާ ހޯމަ ދުވަހުގެ ހެނދުނު ވިއްސަން ޝެޑިއުލްކޮށްފައި ވަނިކޮށް، އެ ރޭ ފަތިހު ކުއްލިއަކަށް ހާލު ގޯސްވި ކަމަށް ބަޔާނުގައި ބުނެފައިވެ އެވެ.

ވިހެއުމުގެ ކަންކަން ކުރިއަށް ގެންދިއުމަށް ހޮސްޕިޓަލުގައި އެޑްމިޓްކޮށްގެން ފަރުވާދެމުން އައި އެ މީހާގެ ހާލު އެ ހާދިސާއާ ހަމައަށް ވެސް ރަނގަޅު ކަމަށް ހޮސްޕިޓަލްގެ ބަޔާނުގައި ބުނެފައިވެ އެވެ. އެ ހިސާބަށް ވެސް ލިބެމުންދިޔަ ފަރުވާއާ މެދު ހިތްހަމަޖެހި މެޑިކަލް ޓީމާ އެކު ބަލިމީހާ ދިޔައީ ކަންތައްތައް ހިއްސާކުރަމުން ކަމަށް ވެސް އެ ހޮސްޕިޓަލުން ބުނެފައިވެ އެވެ.

އައިއެމްޑީސީ އިން ބުނީ އެ މީހާގެ ހާލަތު ކުއްލިއަކަށް ހޯމަ ދުވަހުގެ ރޭ ފަތިހު ގޯސްވި އިރު އެއީ ކުރިން ބަލިމީހާގެ ފަރާތުން ފެނިފައި ނެތް ހާލަތެއް ކަމަށާއި އެހެންވެ އިމަޖަންސީގައި ވަގުތުން ފަރުވާދޭން ފެށި ކަމަށެވެ. އިމަޖަންސީ މެޑިކަލް ހާލަތް ދިމާވީ ގާތްގަނޑަކަށް ފަތިހު 4:39 ގައި ކަމަށް ބަޔާނުގައި ބުނެފައިވެ އެވެ.

އެވަގުތުން ފެށިގެން ބަލިމީހާއަށް ފަރުވާދޭން ފަށައި އޮޕަރޭޝަން ތިއޭޓަރު ޓީމުގެ ފުރިހަމަ އެހީތެރިކަމާ އެކު ކުއްލި އޮޕަރޭޝަނެއް ވަގުތުން ފެށި ކަމަށް ބަޔާނުގައި ބުނެފައިވެ އެވެ. އެ އޮޕަރޭޝަނުގައި ކުޑަ ދަރިފުޅު ރައްކާތެރިކަމާ އެކު ދުނިޔެއަށް ގެނެވުނު ކަމަށް ވެސް އައިއެމްޑީސީ އިން ބުނެފައިވެ އެވެ.

އެހެންނަމަވެސް ޑޮކްޓަރުންނާއި ނަރުހުންނާއި ކްލިނިކަލް ސްޓާފުން ވަރުބަލި ކަމެއް ނެތިކުރި މަސައްކަތުން ވެސް ކުއްލި ސިއްހީ ހާލަތާ ގުޅިގެން މައިމީހާގެ ފުރާނަ ސަލާމަތްކުރެވިފައި ނުވާކަމަށްޓަކައި ވަރަށް ބޮޑަށް ހިތާމަކުރާ ކަމަށް ބަޔާނުގައި ފާހަގަ ކޮށްފައިވެ އެވެ.

މިއީ 2011 ވަނަ އަހަރު އެ ހޮސްޕިޓަލު ހުޅުވިފަހުން އެފަދަ ހާދިސާއެއް ހިނގި ފުރަތަމަ ފަހަރު ކަމަށް އައިއެމްޑީސީން ބުނެފައިވެ އެވެ. އަދި ސްޕެޝަލިސްޓް ޓީމުން ވަނީ އެ ކުއްލި ހާލަތުގައި ވެސް އެންމެ މަތީ ފެންވަރުގެ ފަރުވާ ދިނުމަށް މަސައްކަތްކޮށްފައި ކަމަށް ވެސް ބުނެފައިވެ އެވެ.

އައިއެމްޑީސީން ބުނީ އެ މައްސަލަ ހެލްތު މިނިސްޓްރީ އާއި ގުޅުން ހުރި އެހެން އިދާރާތަކުން ވެސް ބަލައި ދިރާސާކުރަމުން އަންނައިރު އެކަމަށް ފުރިހަމަ އެއްބާރުލުން ދޭނެ ކަމަށެވެ. އަދި އެކަމުގައި އާއިލާއަށް އެހީތެރިކަން ފޯރުކޮށްދެވެން އޮތް ހުރިހާ ކަމެއްގައި ވެސް އެހީ ފޯރުކޮށްދޭނެ ކަމަށް ވެސް ބަޔާނުގައި ފާހަގަ ކޮށްފައި އެވެ.