ބިޑްނުކޮށް ސަރުކާރަށް ޕްރޮޕޯސަލް ހުށަހެޅޭ އުސޫލު އުވާލައިފި
7 ޑިސެމްބަރު 2023 | ބުރާސްފަތި 13:00އުސޫލު އުވާލާފައިވަނީ ބުދަ ދުވަހުން ފެށިގެން
މާލޭގެ ކޮންސްޓްރަކްޝަން ސައިޓެއް
ސަރުކާރުގެ މަޝްރޫއުތަކަށް، ބިޑްނުކޮށް ޕްރޮޕޯސަލް ހުށަހެޅޭގޮތަށް ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުން ހަދާފައިވާ އުސޫލު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުވާލައްވައިފިއެވެ.
އުސޫލު އުވާލެއްވިކަން ބުދަ ދުވަހު ގެޒެޓްގައި ވަނީ އިއުލާންކޮށްފައެވެ. އެ އިއުލާނުގައި ބުނެފައިވަނީ، ބުދަ ދުވަހުން ފެށިގެން އެ އުސޫލު އުވާލާފައިވާކަމަށެވެ.
މާލިއްޔަތު ގަވާއިދުގެ ދަށުން އެކުލަވާލި ގަވާއިދުގައި، ދެ ދާއިރާއަކުން ޕްރޮޕޯސަލް ހުށަހެޅުމުގެ ފުރުސަތު ވަނީ ދީފައެވެ. އެގޮތުން ޕްރޮޕޯސަލް ހުށަހަޅަން އެ އުސޫލުން ފުރުސަތު ދީފައިވަނީ ސަރުކާރުން ކަނޑައަޅާފައިވާ ވަކި މަޝްރޫއަކަށް ނުފެތޭ، ނަމަވެސް ސަރުކާރުގެ ތަރައްގީގެ އަމާޒުތަކަށް ވާސިލުވުމަށް އެހީތެރިކަން ފޯރުކޮށްދޭ ފަދަ މަޝްރޫއުތަކާގުޅޭ ޕްރޮޕޯސަލާއި، ސަރުކާރުގެ ސްޓްރެޓެޖިކް ޑިވެލޮޕްމަންޓް ޕްލޭނުގައި ބަޔާންކޮށްފައިވާ ކަންތައްތައް އީޖާދީ ގޮތެއްގައި (އިނޮވޭޓިވް ގޮތެއްގައި) އަދި ފުދުންތެރި ގޮތެއްގައި ހާސިލުކުރުމަށް މަގުފަހިކޮށްދިނުމަށް ހުށަހަޅާ ޕްރޮޕޯސަލްތަކެވެ.
އާއްމު އުސޫލެއްގެ ދަށުން ސަރުކާރުން ހިންގާ މަޝްރޫތައް ހަވާލުކުރަނީ، އެ މަޝްރޫއެއް ހިންގުމަށް އިއުލާން ކުރުމުން ކުރިމަތިލާ ފަރާތްތަކުގެ ތެރެއިން އެންމެ ރަނގަޅު ޕްރޮޕޯސަލެއް ހުށަހަޅާ ފަރާތެއް ބެލުމަށްފަހުގައެވެ.
