ކޭ-ޕާކު، ސީ-ލައިފް އަދިވެސް ފްލެޓުތަކާއި ގުޅުންހުރި މައްސަލަތަކުގައި ސަރުކާރާއި ގުޅިގެން ހައްލު ހޯދުމުގެ މަސައްކަތް ކުރަނީ
ފްލެޓުތަކާއި ގުޅުންހުރި ވަރަށް ގިނަ މައްސަލަތައް ސަމާލުކަމަށް އައިސްފައިވޭ
އަރބަންކޯގެ ހެޑް އޮފީސް
ކޭ-ޕާކު، ސީ-ލައިފް އަދިވެސް ފްލެޓުތަކާއި ގުޅުންހުރި މައްސަލަތަކުގައި ސަރުކާރާއި ގުޅިގެން ހައްލު ހޯދުމުގެ މަސައްކަތް ކުރަމުންދާ ކަމަށް އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.
ބުދަ ދުވަހުގެ ހަވީރު އާބަންކޯގައި ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ، އެޕާޓްމަންޓް ނުވަތަ ފްލެޓުތަކާއި ގުޅުންހުރި ވަރަށް ގިނަ މައްސަލަތައް ސަމާލުކަމަށް އައިސްފައިވާ ކަމަށާއި، އާބަންކޯއިން މަސައްކަތް ކުރަމުންދަނީ ސަރުކާރާއި ގުޅިގެން މަސައްކަތްކޮށް، ހައްލު ހޯދުމުގެ މަސައްކަތް ކަމަށެވެ.
ފަޒުލް ވިދާޅުވީ ޕްރޯ މޯލްޑިވްސްގެ ސިޔާސަތު ތަންފީޒު ކުރަމުންދާނެ ކަމަށާއި، ރައްޔިތުންނަށް ހެވާލާބަޔާއި މަންފާ ލިބޭ ގޮތަށް ކަންކަން ކުރިއަށް ގެންދާނެ ކަމަށެވެ.
ކުރިއަށް އޮތްތަނުގައި އާބަންކޯގެ ކެޕޭސިޓީ އިތުރުކުރާނެކަން ފާހަގަކުރައްވައި ފަޒުލް ވިދާޅުވީ ލޭންޑްގެ ވެލިއު ދުވަހުން ދުވަހަށް އިތުރުވާނެ ކަމަށާއި، ކުންފުންޏަށް ގެއްލުމެއް ނެތް ކަމަށެވެ. އަދި އަބަދުވެސް މަސައްކަތް ކުރާނީ ކުންފުންޏަށް ލޭންޑް އިތުރު ކުރުމުގެ މަސައްކަތް ކަމަށް އޭނާ ވިދާޅުވިއެވެ.
ކުރިއަށް އޮތްތަނުގައި ސަރުކާރާއި މަޝްވަރާކޮށް، ކުންފުނި ކުރިއެރުވުމަށް މަސައްކަތް ކުރާނެ ކަމަށެވެ. އެގޮތުން އިތުރު ވިޔަފާރިތައް ޖަނަރޭޓްކޮށް، އިތުރު އިންވެސްޓްމަންޓްތައް ހޯދުމަށް މަސައްކަތް ކުރާނެ ކަމަށް ފަޒުލް ވިދާޅުވިއެވެ. އަދި ވިދާޅުވީ މިހާރު ވެސް އާބަންކޯ އޮތީ ސްޓޭބަލްކޮށް ކަމަށެވެ.
ކޭ-ޕާކު އަދި ސީލައިފުން އެޕާޓްމަންޓް ގަތުމަށް ގިނަ ބަޔަކު ވަނީ ބޮޑެތި އަދަދުތަކުން ފައިސާ ނަގާފައެވެ. ނަމަވެސް އެ މަސައްކަތް ކުރާ ކުންފުނީގެ ދިވެހި ހިއްސާދާރުން ފައިސާއަށް ހިޔާނަތްތެރިވެފައިވާ ކަމަށް ތުހުމަތުކޮށް، އެ މައްސަލަތައް ދަނީ ތަހުގީގު ކުރަމުންނެވެ.
