ގެޒެޓު ލިސްޓުގައި ނަން އޮވެއްޖެނަމަ، ގޯތި އަދި ފުލެޓުވެސް ލިބޭނެ - ރައީސް

ކުރީ ސަރުކާރުގެ ބޯހިޔާވަހިކަމުގެ މަޝްރޫއުގެ ތެރެއިން ލިބިފައިވާ ފުލެޓާއި ގޯތި ލިބުނުކަމަށް، ގެޒެޓުކުރެވުނު ލިސްޓުގައި އޮތްނަމަ އެމީހަކަށް އެތަނަކުން ގޯތި އަދި ފުލެޓު ދެއްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ފުރަތަމަ ފަހަރަށް ނޫސްވެރިންނާ ބައްދަލުކުރައްވައި ރައީސް މުއިއްޒު ވިދާޅުވީ، އެމަނިކުފާނު ކެމްޕޭނުގައި ވައުދުވެވަޑައިގެންނެވި ގޮތަށް އެކަން ކުރިއަށް ގެންދަވާނެކަމަށާއި، ފުލެޓެއް ނުވަތަ ގޯއްޗެއް އެމީހަކަށް ލިބިފައިވާނަމަ، އެ ލިބުނު ގޯއްޗެއް އެމީހަކު އަތުން އަތުނުލައްވާނެ ކަމަށެވެ. އަދި ރަސްމީކޮށް ގެޒެޓުކުރެވިފައިވާނަމަ، ލިޔުން ނުލިބުނުކަމުގައި ވީނަމަވެސް އެމީހަކަށް އެ ތަނެއް ލިބޭނެކަމަށެވެ. އަދި ފައިނަލް ލިސްޓެއް ގެޒެޓުކުރެވިފައިވާނަމަ އެއީ ސަރުކާރުގެ ނިންމުމެއް ކަމަށާއި، ސަރުކާރުގެ ނިންމުމެއް އޮތްނަމަ ލިބޭނެކަމަށެވެ. އަދި އެކަމަށް ބަދަލެއް ނާންނާނެ ކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ، ލިސްޓު ގެޒެޓުނުކުރެވި އޮތްނަމަ އެއީ މުޅިން އެހެން ކަމެއް ކަމަށާއި، އެކަމާ ގުޅޭގޮތުން އެޗްޑީސީން އެ ޕްރޮސެސްގައި ތަނެއް ހުރިކަމުގެ މައުލޫމާތު ލިބިވަޑައިގެންފައި ނެތްކަމަށެވެ. ރައީސް ވިދާޅުވީ ރަޖިސްޓްރީ ހަދައިދިނުމާ ގުޅޭގޮތުން ގެޒެޓުގައި ގަވާއިދަށް ބަަދަލެއް ގެނެސްފައިވާކަމަށާއި، އެއީ ގާނޫނީގޮތުން ކިހާ ބުރަދަނެއް ހުރި ކަމެއްތޯ އެޓަރނީ ޖެނެރަލް ލަފާދެއްވާނެ ކަމަށެވެ.

ރައީސް ވިދާޅުވީ މިހާރު އޭސީސީގައި އޮތް މައްސަލައަކީ ފުލެޓު ދިނުމާއި ނުދިނުމާބެހޭ ކަމެއް ނޫންކަމަށާއި، އޮޅުވާލައިގެން ޕޮއިންޓް ހޯދައިގެން ފުލެޓު ލިބިފައިވާނަމަ އެއީ މުޅިން އެހެން ކޭސްއެއް ކަމަށެވެ. އޭސީސީން ނުވަތަ އެހެންތަނަކުންވެސް ބަލައި، އެހެންވީ މީހަކަށް ހުކުމެއްވެސް އަތުވެދާނެ ކަމަށެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލޭ ސަރަހައްދުން ފުލެޓު ދޫކުރުމަށްޓަކައި ހިންގާ ގެދޮރުވެރިޔާ ސްކީމުގެ ދަށުން ފްލެޓު ލިބުނު މީހުންގެ ދާއިމީ ލިސްޓު އާންމުކޮށްފައިވަނީ ނޮވެމްބަރު 15 ވަނަ ދުވަހުއެވެ.

ލިސްޓަށް އައިސްފައިވާ ބަދަލާއެކު، ފުރަތަމަބުރުގައި 3 ކޮޓަރީގެ ފުލެޓު ލިބެނީ 76ން ފެށިގެން މަތިން މާކްސް ލިބިފައިވާ ފަރާތްތަކަށް ފުލެޓު ނެގުމަށްފަހު ބާކީވާ ފުލެޓްތައް، 75 މާކްސް ލިބިފައިވާ ފަރާތްތަކުގެ ތެރެއިން ގުރުއަތަކުން ހޮވޭ ފަރާތްތަކަށް ކަމަށާއި، އަދި ފުރަތަމަ ބުރުގައި 2 ކޮޓަރީގެ ފުލެޓު ލިބެނީ 73ން ފެށިގެން މާތިން މާކްސް ލިބިފައިވާ ފަރާތްތަކަށް ކަމަށް މިނިސްޓްރީން ބުންޏެވެ.