ހިޔާ ފްލެޓްތަކުގެ ފިނިޝިންގއަށް ޚަރަދުވި ފައިސާގެ ތެރެއިން، އެވްރެޖެއް ކަމަށް ބަލައި، ދެ ލައްކަ ރުފިޔާ، ނަގުދު ފައިސާގެ ބަދަލުގައި ކުލިން މައާފްކުރާ ގޮތަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.

ހިޔާ ފްލެޓު ފިނިޝިންގއަށް ޚަރަދުވި ފައިސާގެ ތެރެއިން ދެ ލައްކަ ރުފިޔާ މައާފްކޮށްދެއްވާނެ ކަމަށް ނިންމެވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. އަންގާރަ ދުވަހު ރައީސް އެފަދައިން ވިދާޅުވީ، ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.

ރައީސް ވިދާޅުވީ ހިޔާ ފްލެޓްތަކުގެ ފިނިޝިންގއަށް ދިޔަ ޚަރަދުތަކުގެ ތެރެއިން، އެވްރެޖްގޮތެއްގައި ދެ ލައްކަ ރުފިޔާ، އެ ފްލެޓްތަކުގެ ވެރިންނަށް ޑިސްކައުންޓްވާނެ ގޮތަށް ހައްދަވައިދެއްވާނެ ކަމަށް އޮތުމަކީ އެމަނިކުފާނުގެ ރިޔާސީ ވައުދުފުޅެއް ކަމަށެވެ.

އެހެންކަމުން އެ ކަންތައް ކުރުމަށް ވަޒީރުންގެ މަޖިލީހަށް ހުށަހަޅައި، ހިޔާ ފްލެޓްތަކުގެ އަގުން ދެ ލައްކަ ރުފިޔާ ފްލެޓްތަކުގެ އަގުން އުނިކުރާގޮތަށް ނިންމާފައިވާކަމަށް ރައީސް ވިދާޅުވިއެވެ.

ރައީސް ވިދާޅުވީ، އެއާއެކު، މިހާރު އޮތް އެއްބަސްވުމުގެ ދަށުން ކުރިއަށް އޮތް ހަތް އަހަރަށް މަހަކު ހިޔާ ފްލެޓަށް ދައްކަން ޖެހޭނީ 5،300 ރުފިޔާ ކަމަށާއި، އެހެން ނަމަވެސް ދެ ލައްކަ ރުފިޔާ ކަނޑާލުމާއެކު ކުރިއަށް އޮތް 7 އަހަރަށް، މަހަކު ދައްކަން ޖެހޭނީ 3،984.21 ރުފިޔާ ކަމަށެވެ.