ފަރުވާއަށް ފަހު ފަނޑިޔާރު އަލީ ހަމީދު ރާއްޖެ ވަޑައިގަންނަވައިފި
27 ޖުލައި 2017 | ބުރާސްފަތި 03:06ސުޕްރީމް ކޯޓުގައި ހުންނަވަނިކޮށް ސްޓްރޯކެއް ޖެހުނު
ސުޕްރީމް ކޯޓުގެ ފަނޑިޔާރު އަލީ ހަމީދު
އާލާސްކަންފުޅަށް ރާއްޖެއިން ބޭރުން ފަރުވާ ހޯއްދެވުމަށް ފަހު ސުޕްރީމް ކޯޓުގެ ފަނޑިޔާރު އަލީ ހަމީދު ރާއްޖެ ވަޑައިގަންނަވައިފި އެވެ.
ރާއްޖެއެމްވީއަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ތައިލޭންޑުގެ ވެރިރަށް ބޭންކޮކް އިން ފަރުވާ ހޯއްދެވުމަށް ފަހު ފަނޑިޔާރު އަލީ ހަމީދު ރާއްޖެ ވަޑައިގެންނެވީ ބުދަ ދުވަހު އެވެ.
އިތުރު ފަރުވާ ހޯއްދެވުމަށް އަލީ ހަމީދު ރާއްޖެއިން ބޭރަށް ފުރާވަޑައިގެންނެވީ މިމަހުގެ 17 ވަނަ ދުވަހު އެވެ.
ސުޕްރީމް ކޯޓުގައި ހުންނަވަނިކޮށް ސްޓްރޯކެއް ޖެހިވަޑައިގަތުމުގެ ސަބަބުން އައިޖީއެމްއެޗް ގައި އަލީ ހަމީދު އެޑްމިޓް ކޮށްފައިވަނީ މިމަހުގެ ހަ ވަނަ ދުވަހު އެވެ. 10 ދުވަސް ވަންދެން އެޑްމިޓް ކޮށްގެން ފަރުވާ ދިނުމަށް ފަހު އައިޖީއެމްއެޗް އިން އަލީ ހަމީދު ދޫކޮށްލާފައިވަނީ މިމަހުގެ 16 ވަނަ ދުވަހު އެވެ.
އައިޖީއެމްއެޗްގައި އެޑްމިޓް ކޮށްގެން ފަރުވާ ދެމުންދަނިކޮށް، ޖުޑިޝަލް ސާވިސް ކޮމިޝަނުން އަލީ ހަމީދު ވަނީ ވަކިކުރައްވާފަ އެވެ. އެ ކޮމިޝަނުގެ ރައީސްގެ މަގާމުގައި ހުންނެވި އަލީ ހަމީދު ކޮމިޝަނުން ވަކިކޮށް، އަލީ ހަމީދުގެ މަގާމަށް ސުޕްރީމް ކޯޓުގެ ފަނޑިޔާރު އަބްދުﷲ އަރީފް ވަނީ އައްޔަން ކުރައްވާފަ އެވެ.
