ބައްސާމްގެ ޕާސްޕޯޓް ހިފަހައްޓައިފި

އެފްއޭއެމްގެ ރައީސް ބައްސާމް އަދީލް ޖަލީލް, ރާއްޖެއިން ބޭރަށް ފުރުން މަނާކޮށް އަންގާރަ ދުވަހު އޭނާގެ ޕާސްޕޯޓް ހިފަހައްޓައިފިއެވެ.

ބައްސާމްގެ ޕާސްޕޯޓް ހިފެހެއްޓިކަން އިމިގްރޭޝަން ތެރެއިން ޔަޤީންވި ނަމަވެސް, އިމިގްރޭޝަން މީޑިޔާއިން އެކަން ކަށަވަރުކޮށެއް ނުދެއެވެ. އިމިގްރޭޝަނުގެ މީޑިޔާ އޮފިޝަލް ވިދާޅުވީ އެކަން ޔަޤީންކޮށްލުމަށްފަހު ދަންނަވާނެ ކަމަށެވެ.

ބައްސާމްގެ ޕާސްޕޯޓް ހިފެހެއްޓީ ކޮން އިދާރާއެއްގެ އަމުރަށް, ކޮންމައްސަލައެއްގައި ކަން ޔަޤީނެއް ނޫނެވެ. އެކަމަކު އެފްއޭއެމް އަށް ބޭރުގެ އިދާރާތަކުން ދޭ ފައިސާއަށް ހިޔާނާތްތެރިވާ ކަމުގެ ތުހުމަތުގައި އެ މައްސަލަ ދިވެހި ފުލުހުން ދަނީ ތަހުޤީޤު ކުރަމުންނެވެ. އަދި ޕީޖީގެ އަމުރަށް ފުލުހުން އެފްއޭއެމް އަށް ވަދެ އެތަން ބަލާ ތަހުގީގަށް ބޭނުންވާ މައުލޫމާތު ހޯދިއެވެ. ފުލުހުންގެ މީޑިޔާއިން ވެސް ބުނީ އެކަން ޔަޤީންކުރުމަށްފަހު ދަންނަވާނެ ކަމަށެވެ.

ބައިނަލްއަޤްވާމީ އިދާރާތަކުން އެފްއޭއެމް އަށް ފޮނުވާ ފައިސާ އެ އިދާރާގެ ވެރިންނާއި އެ އިދާރާގެ ވެރިންނާ ގުޅުން އޮންނަ ފަރާތްތަކުގެ އެކައުންޓަށް ޖަމާކުރާ ކަމަށް ވެސް ތުހުމަތު ކުރެއެވެ. މައްސަލަ ތަހުގީގު ކުރަނީ އެ ފައިސާ ނަހަމަ ގޮތުގައި ބޭނުން ކުރާކަމުގެ ތުހުމަތަށެވެ. ނަމަވެސް ތުހުމަތުތަކަށް އެފްއޭއެމްއިން އިންކާރު ކުރެއެވެ.

ދާދިފަހުން ބޭއްވި ނޫސްވެރިންގެ ބައްދަލުވުމެއްގައި ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވީ އެފްއޭއެމްގެ ރައީސް ހިމެނޭ ގޮތަށް އެ އިދާރާގެ ވެރިންގެ މައްޗަށް ދައުވާކުރެވޭނެ ހެކި ލިބިފައިވާ ކަމަށެވެ. އެ ތަހުގީގުގައި އެންމެ އިސް ތުހުމަތު ކުރެވެނީ އެ އިދާރާގެ ރައީސް ބައްސާމް އަދީލް ޖަލީލްގެ މައްޗަށް ކަމަށް ޕީޖީ ވިދާޅުވިއެވެ.