ބުޅަލަށް އަނިޔާކުރި މީހާ ފިހާރަ ކައިރީގައި އޮތް އެހެން ބުޅަލަކަށް ޙަމަލާ ދޭ މަންޒަރުވެސް ފެނިފައިވޭ
4 ޑިސެމްބަރު 2023 | ހޯމަ 08:52ޖަނަވާރުންނަށް އަނިޔާވެރިވުމަކީ ކުށެއްކަމަށް ދިވެހިރާއްޖޭގެ ޤާނޫނުލްއުޤޫބާތުގައިވެސް ބަޔާންކޮށްފައިވޭ
މި މައްސަލައިގައި ހައްޔަރުކޮށްފައިވަނީ މ ކޮޅުފުށީ ޖަވާހިރުވާދީ އަޙްމަދު ނަސީމް
ބުޅަލަކަށް އަނިޔާކުރި މައްސަލައިގައި ހައްޔަރުކުރި މީހާ އިތުރު 10 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ މ ކޮޅުފުށީ ޖަވާހިރުވާދީ އަޙްމަދު ނަސީމެވެ.
އޭނާގެ މައްޗަށް ކޮށްފައިވަނީ ޖަނަވާރުންނަށް އަނިޔާވެރި އަމަލެއް ކުރުމުގެ ކުށުގެ ތުހުމަތެވެ.
އޭނާ ބުޅަލަށް އަނިޔާކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވެފައިވެއެވެ. އެގޮތުން ބުޅާ ކައިރިއަށް ގޮސް، ކުއްލިއަކަށް ވަޅިއަކުން އެ ބުޅަލަށް ޙަމަލާދޭތަނާއި، ޙަމަލާ ދިނުމާއެކު އެ ބުޅާ ދުއްވައިގަނެގެންދާ މަންޒަރު އެ ވީޑިއޯގައި ފެނެއެވެ.
އެހެންނަމަވެސް ބަންދާމެދު ގޮތެއް ނިންމުމަށް ބޭއްވި މަޖިލީހުގައި އޭނާ ބުނީ، ވީޑިއޯއަކީ މިހާރު ކޮންމެ މީހަކަށްވެސް ހެދިދާނެ އެއްޗެއް ކަމަށެވެ.
ކޯޓުން ފުރަތަމަ ވަނީ އޭނާ 15 ދުވަހަށް ބަންދު ކުރުމަށް އަމުރުކޮށްފައެވެ. އޭނާގެ ބަންދުގެ މުއްދަތު ހަމަވުމުން އަނެއްކާވެސް އިތުރު 10 ދުވަހަށް ބަންދުކޮށްފައިވާއިރު، އޭނާގެ ބަންދުގެ މުއްދަތު ހަމަވާނީ 13 ޑިސެމްބަރު 2023 ގައެވެ.
ކޯޓު އަމުރުގައި ބުނެފައިވާ ގޮތުގައި އޭނާ ބުޅަލަށް ޙަމަލާ ދިނުމަށްފަހު، ފިހާރަ ކައިރީގައި އޮތް އެހެން ބުޅަލަކަށް ޙަމަލާ ދޭ މަންޒަރު ފެނިފައިވާކަމަށް ބުނެ މީހަކު ބަޔާންވެސް ދީފައިވެއެވެ.
އޭނާ ބަންދުގައި ބަހައްޓަން އަމުރުކުރި ހާލަތުގެ ގޮތުގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 49 ވަނަ މާއްދާއާއި ގާނޫނު ނަންބަރު 12/2016 ޖިނާއީ އިޖުރާއަތުގެ ގާނޫނުގެ 59 ވަނަ މާއްދާއާއި 60 ވަނަ މާއްދާއަށް ރިއާޔަތްކޮށް، މުޖްތަމައުގެ ސަލާމަތާއި ރައްކާތެރިކަމަށްޓަކައި ކަމަށެވެ.
އޭނާއަކީ ހައްޔަރު/ބަންދު ލޮގް އޮތް ފަރާތެއްކަން ވެސް ކޯޓު އަމުރުން އެނގެއެވެ.
ޖަނަވާރުންނަށް އަނިޔާވެރިވުމަކީ ކުށެއްކަމަށް ދިވެހިރާއްޖޭގެ ޤާނޫނުލްއުޤޫބާތުގައި ވެސް ބަޔާންކޮށްފައިވެއެވެ.
