ނޭމާގެ ލޯބިވެރިޔާ ގުޅުން ކަނޑާލައިފި

ބްރެޒިލްގެ ފުޓްބޯޅަ ތަރި ނޭމާއާއި އޭނާގެ ލޯބިވެރިޔާ އަދި މަޝްހޫރު މޮޑެލް ބުރޫނާ ބިއަންކާޑީ ގުޅުން ކަނޑާލައިފިއެވެ.

މިކަން އިއުލާނުކުރީ ބްރެޒިލްގެ ސޯޝަލް މީޑިއާ ސެލެބްރިޓީ ބިއަންކާޑީއެވެ.

މި ދެ ތަރިންގެ ލޯބީގެ ހަޔާތް ނިމުމަކަށް ގެނައިކަން ބިއަންކާޑީ އިއުލާންކުރީ މި ދެ މީހުންނަށް އަންހެން ދަރިއަކު ލިބުނުތާ އެއް މަސްދުވަސް ފަހުންނެވެ. މިއީ ބިއަންކާޑީގެ ފުރަތަމަ ދަރިފުޅެވެ. ނޭމާއަށް މީގެ ކުރިން އެހެން މީހަކަށް ފިރިހެން ކުއްޖަކުވެސް ލިބިފައިވެއެވެ.

ކުއްޖަކު ލިބުނުފަހުން ނޭމާއާއި ބިއަންކާޑީ ވަކިވާން ޖެހުނީ ނޭމާގެ އުޅުން ގޯސްވުމުގެ ސަބަބުން ކަމަށް ގިނަ މީޑިއާތަކުން ބުނެއެވެ. މިގޮތުން، ބޭފަވާތެރިވުމާއި އޮޅުވާލުން ހިމެނޭ ކަމަށްވެސް ބްރެޒިލްގެ ނޫސްތަކުން ބުނެއެވެ. މި ގޮތުން މިއަހަރުގެ ކުރީކޮޅު ބްރެޒިލްގެ އަންހެން ދެ ވޮލީ ކުޅުންތެރިން ވަނީ އެއްމާބަނޑު އެ ކުޅުންތެރިންނާވެސް ނޭމާ ރައްޓެހިވާން އެހިކަމަށް ބުނެ ފަޅާ އަރުވާލާއެވެ. މިފަދަ އެތައް މައްސަލައެއް ބިއަންކާޑީއާއި ނޭމާގެ ވަކިވުމުގައި ހިމެނޭ ކަމަށްވެސް މީޑިއާތަކުން ބުނެއެވެ.

ސައޫދީ އަރަބިއާގެ އަލްހިލާލަށް ކުޅެމުން އަންނަ ނޭމާ މިވަގުތު ދަނީ ފަޔަށް ލިބިފައިވާ ބޮޑު އަނިޔާއަކަށް ފަރުވާ ކުރަމުންނެވެ. ނަމަވެސް ދަނޑު ބޭރުގެ އަޚުލާގީ މައްސަލަތަކާހުރެ އޭނާގެ ކުޅުން ވަރަށް ބޮޑަށް މިދިޔަ ހައެއްކަ އަހަރުތެރޭގައި ވަނީ ދަށްވެފައެވެ. ސައޫދީ ލީގަށް އޭނާ ދާންޖެހުނީ ވެސް ޔޫރަޕުގައި ނޭމާ ގެންދަން ބޭނުންވާ ކުލަބެއް ނެތުމުންނެވެ.