އިނގިރޭސި ގައުމީ ކެޕްޓަން ހެރީ ކޭން ޖަރުމަނުގެ ބަޔާން މިއުނިކަށް ބަދަލުވުމަކީ އޭނާ ނިންމި ރަނގަޅު ނިންމުމެއް ކަމަށާއި، އޭގެ ފައިދާ އޭނާއާއި ގައުމީ ޓީމަށްވެސް ކުރާނެކަމަށް، ގައުމީ ކޯޗު ގެރެތު ސައުތުގޭޓް ބުނެފިއެވެ.

އިނގިރޭސިވިލާތުގެ ޓޮޓެންހަމް ދޫކޮށް ޖަރުމަނުގެ ޗެމްޕިއަން ޓީމަށް ބަދަލުވި ފޯވާޑާ ބެހޭގޮތުން އިނގިރޭސި ކޯޗު މިހެން ބުނީ، ކޭންގެ މުސްތަގްބަލާމެދު ގޮތެއް ނުނިމިދިޔަ މުއްދަތުގައި ކުޅުންތެރިޔާގެ ފަރާތުން ނުތަނަވަސްކަން ފެނިފައިވާކަމަށް ބުނެ ވާހަކަ ދައްކަމުންނެވެ.

ކޭންއަކީ އިނގިރޭސި ގައުމީ ޓީމަށް އެންމެ ގިނަ ގޯލު ޖަހައިދިން ކުޅުންތެރިޔާއެވެ. އަދި 2018 ވަނަ އަހަރުގެ ވޯލްޑްކަޕުގެ ރަންބޫޓުވެސް ހޯދިއެވެ. އެކަމަކު ގައުމީ ޓީމާއެކު ތައްޓެއް ހޯދޭގޮތެއް ނުވިއެވެ. އެންމެ ބޮޑުވަރަކަށް ވީވެސް ޔޫރޯ 2020ގެ ފައިނަލް ކުޅުމެވެ.

އޭރުވެސް ގައުމީ ކޯޗުކަމުގައި ހުރި ސައުތުގޭޓް ބުނީ ކޭންއަކީ މޮޅު ކުޅުންތެރިއެއް ކަމަށާއި، އޭނާއަކީ ތަށި ލިބޭ ފެންވަރުގެ ޓީމެއްގައި ކޮންމެހެން ހުންނަންޖެހޭ ކުޅުންތެރިއެއް ކަމަށެވެ.

މި އަހަރަކީ ގައުމީ ޓީމުގެ ގިނަ މެޗުތަކެއް އޮތް އަހަރެއްކަން ފާހަގަކުރަމުން ސައުތުގޭޓް އިތުރަށް ބުނީ، އިނގިރޭސިންގެ އަމާޒަކީ އަންނަ އަހަރުގެ ޔޫރޯ ކާމިޔާބުކުރުން ކަމަށެވެ. އަދި އެ މުބާރާތަށް ކޭން ނަފްސާނީ ގޮތުންނާއި ޖިސްމާނީ ގޮތުން ފިޓްކޮށްހުރުން ވަރަށް މުހިންމު ކަމަށެވެ.