ކޭންގެ ޕެނަލްޓީން މޮޅުވެ، ބަޔާނުން ލީޑު ފުޅާ ކޮށްފި

ޖަރުމަނު ލީގުގައި ބޮރޫޝިއާ މޮންޗެންގްބްލަކާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކް އިން އެއް ވަަނައިގައި ލީޑު ފުޅާ ކޮށްފި އެވެ.

ހޮނިހިރު ދުވަހުގެ ރޭ ރަަށުން ބޭރުގައި ކުޅުނު މެޗު ބަޔާން އިން ކާމިޔާބު ކުރީ 1-0 އިންނެވެ. މެޗުގައި ބަޔާނުން އެ ޓީމުގެ ލަނޑު ޖެހީ ވެސް ދެ ވަނަ ހާފުގަ އެވެ.

މެޗުގައި ބަޔާނުން ރަނގަޅަށް ކުޅެފައިވާއިރު، އެ ޓީމުން ވަނީ ލަނޑު ޖަހާނެ ފުރުސަތުތަކެއް ވެސް ތަނަވަސްކޮށްފަ އެވެ. މެޗުގެ ފުރަތަމަ ހާފުގައި ބަޔާންގެ ލެރޯން ގޮރެޓްޒްކާ ފޮނުވާލި ބޯޅަ ގޯލާ އަމާޒުވާ ގޮތެއް ނުވި އެވެ. އޭގެ ފަހުން ބަޔާންގެ ތޯމަސް މުލާ އަށް ލިބުނު ފުރުސަތުގައި އޭނާ ފޮނުވާލި ބޯޅަ ބްލޮކުވީ މޮންޗެންގްބްލަކްގެ ގޯލު ކީޕަރުގެ ގައިގައި ޖެހިފަ އެވެ.

މެޗުގެ ދެ ވަނަ ހާފުގައި ބަޔާން އަށް ޕެނަލްޓީ ލިބުނީ މޮންޗެންގްބްލަކްގެ އޭރިޔާ ތެރެއިން ބަޔާންގެ މިކޭލް އޮލައިސޭ އަށް ކުރި ފައުލަކާ ގުޅިގެންނެވެ. ޕެނަލްޓީ ކާމިޔާބުކޮށް މެޗުގައި ބަޔާން އަށް ކުރި ހޯދައިދިނީ އިންގްލެންޑުގެ ހެރީ ކޭން އެވެ. މިއީ މި ސީޒަންގެ ޖަރުމަނު ލީގުގައި ކޭން ޖެހި 15 ވަނަ ލަނޑެވެ.

މޮޅާއެކު ބަޔާނުން ވަނީ އެއް ވަނައިގައި ހަތަރު ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 16 މެޗުން ބަޔާނަށް ލިބެނީ 39 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އެންމެ ފަހުގެ ޗެމްޕިއަން ބަޔާ ލެވަކޫސަން އަށް ލިބެނީ 35 ޕޮއިންޓެވެ.