ސައުދީ ޕްރޯ ލީގުގައި އަލް އަހްލީ ސައުދީ އާއި އަލް ޝަބާބު ބައްދަލު ކުރި މެޗު އެއްވަރުވެގެން ނިމިއްޖެ އެވެ.

މި ދެ ޓީމުގެ ކުރިމަތިލުން ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވި އެވެ. ނަމަވެސް، ދެ ޓީމަށް ވެސް ވަނީ މެޗުގައި ލަނޑު ޖަހާނެ ފުރުސަތުތަކެއް ލިބިފަ އެވެ. މެޗު ފަށައިގެން ކުރީ ކޮޅު އަލް އަހްލީ ސައުދީގެ ރިޔާދު މާރޭޒް އަށް ލިބުނު ފުރުސަތެއްގައި އޭނާ ފޮނުވާލި ބޯޅަ ދިޔައީ ގޯލުގެ ހުރަސް ދަނޑި މަތިން ބޭރަށެވެ. އޭގެ ފަހުން އަލް ޝަބާބުގެ އޭރިޔާ ތެރެއިން ލިބުނު ބޯޅައެއް އެ ޓީމުގެ ގަބްރީ ވެއިގާ ފޮނުވާލިއިރު، އަލް ޝަބާބުގެ ގޯލް ކީޕަރު ވަނީ ކޯނަރަކަށް ބޯޅަ ބޭރުކޮށްލައިފަ އެވެ.

މެޗުގައި އަލް ޝަބާބުގެ ފެރެއިރާ ކަރަސްކޯ ފޮނުވާލި ބާރު ހަމަލާއެއް އަލް އަހްލީ ސައުދީގެ ގޯލް ކީޕަރު އެޑުއާޑް މެންޑީ ވަނީ މަތަަކޮށްފަ އެވެ. އޭގެ އިތުރުން އެ ޓީމުގެ ކާލޮސް ފޮނުވާލި ނުރައްކާތެރި ބޯޅަ ވެސް މެންޑީ މަތަކުރި އެވެ. ދެ ވަނަ ހާފުގައި ކާލޮސް ވަނީ ބާރު ހަމަލާއެއް ފޮނުވާލައިފަ އެވެ. ނަމަވެސް ގޯލާ އަމާޒު ނުވެ ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ.

މެޗުން ލިބުނު އެއް ޕޮއިންޓާއެކު އަލް އަހްލީ ސައުދީ އޮތީ ލީގު ތާވަލްގެ ތިން ވަނައިގަ އެވެ. އެއީ ލީގުގައި މިހާތަނަށް ކުޅުނު 14 މެޗުން 27 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން 16 ޕޮއިންޓާއެކު އަލް ޝަބާބު އޮތީ 11 ވަނައިގަ އެވެ.